ଦିଲ୍ଲୀ କୋର୍ଟଙ୍କ ବଡ଼ ରାୟ! ମହିଳା ରେସଲରଙ୍କ ଯୌନ ଉତ୍ପୀଡ଼ନ ମାମଲାରେ ବୃଜଭୂଷଣ ସରଣ ସିଂହ ନିର୍ଦ୍ଦୋଷ
ନୂଆଦିଲ୍ଲୀ: ପୂର୍ବତନ ଭାରତୀୟ କୁସ୍ତି ମହାସଂଘ (WFI) ମୁଖ୍ୟ ବୃଜଭୂଷଣ ସରଣ ସିଂହଙ୍କ ବିରୋଧରେ ୬ ଜଣ ମହିଳା ରେସଲର ଦାଖଲ କରିଥିବା ଯୌନ ଉତ୍ପୀଡ଼ନ ମାମଲାରେ ସୋମବାର ଦିଲ୍ଲୀର ଏକ ଅଦାଲତ ତାଙ୍କୁ ନିର୍ଦ୍ଦୋଷ ଘୋଷଣା କରିଛନ୍ତି। ଭାରତୀୟ କ୍ରୀଡ଼ା ଇତିହାସର ସବୁଠାରୁ ଚର୍ଚ୍ଚିତ ଆଇନଗତ ମାମଲାମାନଙ୍କ ମଧ୍ୟରୁ ଏହା ଗୋଟିଏ ଥିଲା। ଅଭିଯୋଗକାରୀଙ୍କ ମଧ୍ୟରେ ରେସଲର ଭିନେଶ ଫୋଗାଟ ମଧ୍ୟ ଥିଲେ। ବୃଜଭୂଷଣ ଆରମ୍ଭରୁ ସମସ୍ତ ଅଭିଯୋଗକୁ ଅସ୍ୱୀକାର କରିଆସୁଥିଲେ।
୨୦୨୩ ମସିହାରେ ଏହି ଅଭିଯୋଗକୁ ନେଇ ଦେଶବ୍ୟାପୀ ଆନ୍ଦୋଳନ ଆରମ୍ଭ ହୋଇଥିଲା। ଅଲିମ୍ପିକ୍ ପଦକ ବିଜେତା ସହ ଅନେକ ଶୀର୍ଷ ରେସଲର ଦିଲ୍ଲୀର ଜନ୍ତର-ମନ୍ତରରେ ଦୀର୍ଘଦିନ ଧରି ଧାରଣା ଦେଇ ବୃଜଭୂଷଣଙ୍କ ଗିରଫ ଓ WFI ପଦରୁ ହଟାଇବା ଦାବି କରିଥିଲେ। ନୂଆ ସଂସଦ ଭବନ ଅଭିମୁଖେ ପଦଯାତ୍ରା ବେଳେ ପୁଲିସ ରେସଲରମାନଙ୍କୁ ଅଟକ ରଖିବା ଘଟଣା ଅନ୍ତର୍ଜାତୀୟ ସ୍ତରରେ ମଧ୍ୟ ଚର୍ଚ୍ଚାର ବିଷୟ ହୋଇଥିଲା।
ରାୟ ପରେ ବୃଜଭୂଷଣ ସରଣ ସିଂହ କହିଛନ୍ତି, “ମୁଁ ପ୍ରଥମ ଦିନରୁ କହିଥିଲି ଯେ, ଯଦି ଅଭିଯୋଗ ସତ ହୁଏ ତେବେ ମୁଁ ନିଜେ ଫାଶୀ ଦେବି । ଆଜି ମୋତେ ନିର୍ଦ୍ଦୋଷ ଘୋଷଣା କରାଯାଇଥିବାରୁ ମୁଁ ଖୁସି।” ଉଲ୍ଲେଖଯୋଗ୍ୟ, ଏହା ପୂର୍ବରୁ ଜଣେ ନାବାଳିକା ରେସଲରଙ୍କ ଅଭିଯୋଗ ଆଧାରରେ ରୁଜୁ ହୋଇଥିବା ପୋକ୍ସୋ ମାମଲାରେ ମଧ୍ୟ ଦିଲ୍ଲୀ ଅଦାଲତ ପୁଲିସର କ୍ଲୋଜର ରିପୋର୍ଟକୁ ଗ୍ରହଣ କରି ମାମଲା ବନ୍ଦ କରିଥିଲେ।
