Kushabhadra River Tragedy: ୪ ସାଙ୍ଗ ନଦୀରେ ଭାସିଲେ, ୩ ଉଦ୍ଧାର; ଦଶମ ଛାତ୍ର Soumyaranjanଙ୍କ ମୃତ୍ୟୁ
ସୋମବାର ଅପରାହ୍ଣରେ କୁଶଭଦ୍ରା ନଦୀର ରାମଚନ୍ଦ୍ରପୁର ପଠାରେ ଅଘଟଣ ଘଟି ଦଶମ ଶ୍ରେଣୀର ଜଣେ ୧୫ ବର୍ଷୀୟ ଛାତ୍ରଙ୍କ ମୃତ୍ୟୁ ହୋଇଛି। ମୃତ ଛାତ୍ର ହେଲେ ଭିଙ୍ଗାରପୁର ବକ୍ରେଶ୍ୱର ହାଇସ୍କୁଲର ଛାତ୍ର ଏବଂ ଜିତିକାର ସୁଆଁଲୋ କାଣ୍ଡିସାହିର ସନ୍ତୋଷ କାଣ୍ଡିଙ୍କ ପୁଅ ସୌମ୍ୟରଞ୍ଜନ। ସୂଚନା ଅନୁସାରେ, ସୌମ୍ୟରଞ୍ଜନ ସକାଳେ ସ୍କୁଲ ଯିବା ପାଇଁ ଘରୁ ବାହାରିଥିଲେ। ହେଲେ ସ୍କୁଲ ନଯାଇ ଅନ୍ୟ ତିନିଜଣ ସାଙ୍ଗଙ୍କ ସହ ରାମଚନ୍ଦ୍ରପୁର ନଦୀପଠାକୁ ଯାଇ ଭୋଜି କରିଥିଲେ। ଭୋଜି ସରିବା ପରେ ବାସନକୁସନ ଧୋଇବା ପାଇଁ ନଦୀକୁ ଯାଇଥିବା ବେଳେ ଚାରିଜଣ ନଦୀର ପ୍ରଖର ସୁଅରେ ଭାସିଯାଇଥିଲେ।
ପିଲାମାନେ ଭାସିଯାଉଥିବା ଦେଖି ନଦୀରେ ଗାଧୋଉଥିବା କିଛି ମହିଳା ଚିତ୍କାର କରି ଲୋକଙ୍କୁ ଡାକିଥିଲେ। ନିକଟରେ ଗାଈ ଚରାଉଥିବା ଜଣେ ଗୋପାଳକ ତୁରନ୍ତ ନଦୀକୁ ଡେଇଁ ପଡ଼ି ମହିଳାମାନଙ୍କ ସହାୟତାରେ ଜଣ ଜଣ କରି ତିନିଜଣ ଛାତ୍ରଙ୍କୁ ସୁଅ ମୁହଁରୁ ଉଦ୍ଧାର କରିଥିଲେ। ପରେ ସେ ସୌମ୍ୟରଞ୍ଜନଙ୍କୁ ମଧ୍ୟ ଖୋଜିଖୋଜି ପାଣିରୁ ଉଦ୍ଧାର କରିଥିଲେ। ତେବେ ସେତେବେଳକୁ ସୌମ୍ୟରଞ୍ଜନ ସଂଜ୍ଞାହୀନ ହୋଇପଡ଼ିଥିଲେ। ସ୍ଥାନୀୟ ଲୋକେ ତାଙ୍କୁ ପ୍ରଥମେ ଏକ ଘରୋଇ ହସ୍ପିଟାଲକୁ ନେଇଥିଲେ। ଅବସ୍ଥା ସଂକଟାପନ୍ନ ଥିବାରୁ ଡାକ୍ତର ତାଙ୍କୁ କ୍ୟାପିଟାଲ ହସ୍ପିଟାଲକୁ ପଠାଇଥିଲେ। କିନ୍ତୁ ସେଠାରେ ଡାକ୍ତର ସୌମ୍ୟରଞ୍ଜନଙ୍କୁ ମୃତ ଘୋଷଣା କରିଥିଲେ।
ଘଟଣାର ଖବର ପାଇ ବାଲିଅନ୍ତା ଥାନା ପୁଲିସ କ୍ୟାପିଟାଲ ହସ୍ପିଟାଲରେ ପହଞ୍ଚିଥିଲା। ମୃତଦେହକୁ ମର୍ଗରେ ରଖାଯାଇଥିବା ବେଳେ ପରବର୍ତ୍ତୀ ଦିନ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯିବ ବୋଲି ଜଣାପଡ଼ିଛି। ସ୍କୁଲ ଯିବା ବଦଳରେ ସାଙ୍ଗମାନଙ୍କ ସହ ଭୋଜି କରିବାକୁ ଯାଇ ଏଭଳି ଅଘଟଣ ଘଟିବାରୁ ଭିଙ୍ଗାରପୁର ଅଞ୍ଚଳରେ ଶୋକର ଛାୟା ଖେଳିଯାଇଛି। ଅନ୍ୟପକ୍ଷରେ ନିଜ ଜୀବନକୁ ବିପଦରେ ପକାଇ ୩ ଜଣ ଛାତ୍ରଙ୍କୁ ନିଶ୍ଚିତ ମୃତ୍ୟୁମୁଖରୁ ଉଦ୍ଧାର କରିଥିବା ଗୋପାଳକ ଓ ସ୍ଥାନୀୟ ମହିଳାମାନଙ୍କ ସାହସିକତାକୁ ସ୍ଥାନୀୟ ଲୋକେ ପ୍ରଶଂସା କରିଛନ୍ତି।
