Bijnor Loudspeaker: ଅନୁମତି ବିନା ଜୋରରେ ବାଜୁଥିବା ଲାଉଡ୍ସ୍ପିକର୍ ବିରୋଧରେ କଡ଼ା କାର୍ଯ୍ୟାନୁଷ୍ଠାନ, ୯୦ରୁ ଅଧିକ ସ୍ଥାନରୁ ହଟିଲା ଲାଉଡ୍ସ୍ପିକର୍
ଉତ୍ତରପ୍ରଦେଶ: ଉତ୍ତରପ୍ରଦେଶର ବିଜନୌର ଜିଲ୍ଲାରେ ଅନୁମତି ବିନା ଏବଂ ନିର୍ଦ୍ଧାରିତ ମାନକଠାରୁ ଅଧିକ ଶବ୍ଦରେ ବାଜୁଥିବା ଲାଉଡ୍ସ୍ପିକର୍ ବିରୋଧରେ ପୁଲିସ ୩ ଦିନିଆ ସ୍ୱତନ୍ତ୍ର ଅଭିଯାନ ଆରମ୍ଭ କରିଛି। ଜିଲ୍ଲା ଜେଲ୍ ପରିଦର୍ଶନ ସମୟରେ ଡିଏମ୍ ଜସଜିତ୍ କୌର ଓ ଏସ୍ପି କେ.କେ. ବିଶ୍ନୋଇ ଏକ ମସଜିଦରୁ ଅତ୍ୟଧିକ ଶବ୍ଦରେ ଆଜାନ୍ ଶୁଣିବା ପରେ ଏହି କାର୍ଯ୍ୟାନୁଷ୍ଠାନର ନିର୍ଦ୍ଦେଶ ଦେଇଥିଲେ।
ଡିଏମ୍ ଓ ଏସ୍ପିଙ୍କ ନିର୍ଦ୍ଦେଶ ପରେ ପୁଲିସ ଟିମ୍ ବିଭିନ୍ନ ସ୍ଥାନରେ ଯାଞ୍ଚ ଆରମ୍ଭ କରିଥିଲା। ଅଭିଯାନର ପ୍ରଥମ ଦିନରେ ହିଁ ୯୦ରୁ ଅଧିକ ସ୍ଥାନରୁ ନିୟମ ବାହାରେ ଲଗାଯାଇଥିବା କିମ୍ବା ଅଧିକ ଶବ୍ଦରେ ବାଜୁଥିବା ଲାଉଡ୍ସ୍ପିକର୍ ହଟାଇ ପୁଲିସ ନିଜ କବ୍ଜାକୁ ନେଇଛି। ଏଥିସହ ଇମାମମାନଙ୍କୁ ନିର୍ଦ୍ଧାରିତ ଡେସିବେଲ୍ ସୀମା ମଧ୍ୟରେ ହିଁ ଶବ୍ଦ ରଖିବାକୁ କଡ଼ା ନିର୍ଦ୍ଦେଶ ଦିଆଯାଇଛି।
ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି ଯେ, ଧାର୍ମିକ ସ୍ଥଳରେ ଲାଉଡ୍ସ୍ପିକର୍ ବ୍ୟବହାର ସମୟରେ ନିର୍ଦ୍ଧାରିତ ନିୟମ ଓ ଶବ୍ଦ ସୀମା ପାଳନ କରିବାକୁ ହେବ। ଆଗାମୀ ଦୁଇ ଦିନ ମଧ୍ୟ ଏହି ବିଶେଷ ଅଭିଯାନ ଜାରି ରହିବ ଏବଂ ନିୟମ ଉଲ୍ଲଂଘନ କରୁଥିବା ସ୍ଥାନଗୁଡ଼ିକ ବିରୋଧରେ ଆବଶ୍ୟକ କାର୍ଯ୍ୟାନୁଷ୍ଠାନ ନିଆଯିବ।
