Namal Rajapaksa: ଏୟାରବସ୍ ଡିଲ୍ରେ ୮ ଲକ୍ଷ ଡଲାର ଦୁର୍ନୀତି ଅଭିଯୋଗ, ଶ୍ରୀଲଙ୍କାରେ ଗିରଫ ହେଲେ ପୂର୍ବତନ ରାଷ୍ଟ୍ରପତି ମହିନ୍ଦା ରାଜପକ୍ଷଙ୍କ ପୁଅ ତଥା ସାଂସଦ ନାମଲ
ଶ୍ରୀଲଙ୍କା: ଶ୍ରୀଲଙ୍କାର ପୂର୍ବତନ ରାଷ୍ଟ୍ରପତି ମହିନ୍ଦା ରାଜପକ୍ଷଙ୍କ ପୁଅ ତଥା ସାଂସଦ ନାମଲ ରାଜପକ୍ଷଙ୍କୁ ଶୁକ୍ରବାର ଦୁର୍ନୀତି ନିରୋଧୀ କର୍ତ୍ତୃପକ୍ଷ ଗିରଫ କରିଛନ୍ତି। ୨୦୧୩ର ଏକ ଏୟାରବସ୍ ଡିଲ୍ ସହ ଜଡ଼ିତ ଭାବେ ସେ ୮ ଲକ୍ଷ ଆମେରିକୀୟ ଡଲାର ଗ୍ରହଣ କରିଥିବା ଅଭିଯୋଗ ହୋଇଛି। ଗିରଫ ପରେ କଲମ୍ବୋ ଚିଫ୍ ମାଜିଷ୍ଟ୍ରେଟ୍ ଅସଙ୍ଗ ବୋଦରଗାମା ୪୦ ବର୍ଷୀୟ ନାମଲଙ୍କୁ ଆହୁରି ଦୁଇ ସପ୍ତାହ ହେପାଜତରେ ରଖିବାକୁ ନିର୍ଦ୍ଦେଶ ଦେଇଛନ୍ତି।
ଏୟାରବସ୍ ଡିଲ୍ ସମ୍ପର୍କିତ ଆର୍ଥିକ କାରବାରରେ ନାମଲ ରାଜପକ୍ଷଙ୍କ ଭୂମିକା ନେଇ ତଦନ୍ତ ଚାଲିଥିବା ବେଳେ ଅଧିକ ତଥ୍ୟ ଯାଞ୍ଚ କରାଯାଉଛି। ରାଜପକ୍ଷ ପରିବାର ଉପରେ ଏହା ପୂର୍ବରୁ ମଧ୍ୟ ବିଭିନ୍ନ ଦୁର୍ନୀତି ଅଭିଯୋଗ ଆସିଛି। ତେବେ ଏହି ଅଭିଯୋଗଗୁଡ଼ିକୁ ରାଜପକ୍ଷ ପରିବାର ଖଣ୍ଡନ କରିଆସିଛି। ତାଙ୍କ ବିରୋଧରେ ଆସୁଥିବା ଦୁର୍ନୀତି ଅଭିଯୋଗ ରାଜନୈତିକ ଉଦ୍ଦେଶ୍ୟପ୍ରଣୋଦିତ ବୋଲି ପରିବାର ପକ୍ଷରୁ କୁହାଯାଇଛି।
ନାମଲ ରାଜପକ୍ଷ ଶ୍ରୀଲଙ୍କାର ରାଜପକ୍ଷ ପରିବାରର ଜଣେ ପ୍ରମୁଖ ରାଜନୈତିକ ଚେହେରା। ଏୟାରବସ୍ ଡିଲ୍ରେ ଟଙ୍କା ନେବା ଅଭିଯୋଗରେ ତାଙ୍କ ଗିରଫ ପରେ ଦେଶର ରାଜନୈତିକ ମହଲରେ ପୁଣିଥରେ ରାଜପକ୍ଷ ପରିବାରକୁ ନେଇ ଚର୍ଚ୍ଚା ଆରମ୍ଭ ହୋଇଛି। ତେବେ ମାମଲାରେ ତଦନ୍ତ ଜାରି ଥିବାରୁ ଅଭିଯୋଗଗୁଡ଼ିକର ଅନ୍ତିମ ସତ୍ୟତା ତଦନ୍ତ ଓ ଆଇନଗତ ପ୍ରକ୍ରିୟା ପରେ ସ୍ପଷ୍ଟ ହେବ।
