BAPS Eiffel Tower: ମହିଳା କର୍ମଚାରୀଙ୍କୁ ନେଇ ବିବାଦ ପରେ କ୍ଷମା ମାଗିଲା ହିନ୍ଦୁ ସଂଗଠନ, କହିଲା- କାହାକୁ ପ୍ରବେଶରୁ ରୋକାଯାଇନଥିଲା
ନୂଆଦିଲ୍ଲୀ: ପ୍ୟାରିସର ଆଇଫେଲ୍ ଟାୱାରରେ ହିନ୍ଦୁ ଧାର୍ମିକ ସଂଗଠନ BAPSର ଏକ ପ୍ରତିନିଧି ଦଳ ଗସ୍ତକୁ ନେଇ ବିବାଦ ଦେଖାଦେବା ପରେ ସଂଗଠନ ପକ୍ଷରୁ ପ୍ରତିକ୍ରିୟା ଦିଆଯାଇଛି। ଗସ୍ତ ସମୟରେ ମହିଳା କର୍ମଚାରୀଙ୍କୁ ନିଜ କାର୍ଯ୍ୟସ୍ଥଳରୁ ହଟାଇ ଦିଆଯାଇଥିବା ନେଇ ଅଭିଯୋଗ ପରେ ଆଇଫେଲ୍ ଟାୱାର କର୍ମଚାରୀମାନେ ପ୍ରତିବାଦ କରିଥିଲେ। ଏହାପରେ BAPS କହିଛି ଯେ, ଏହି ଘଟଣାକୁ ନେଇ ଉଠିଥିବା ଚିନ୍ତାକୁ ସଂଗଠନ ଗୁରୁତ୍ୱର ସହ ନେଉଛି ଏବଂ ଏଥିରେ କାହାକୁ ଅସୁବିଧା ହୋଇଥିଲେ ଦୁଃଖିତ ବୋଲି କହିଛି।
BAPSର କହିବାନୁସାରେ, ପ୍ରତିନିଧି ଦଳର ସଂଖ୍ୟା ଅଧିକ ଥିବାରୁ ଅନ୍ୟ ପର୍ଯ୍ୟଟକଙ୍କୁ ଯେପରି କୌଣସି ଅସୁବିଧା ନହୁଏ, ସେଥିପାଇଁ ଆଇଫେଲ୍ ଟାୱାର ପରିଚାଳନା ଟିମ୍ ସହ ସମନ୍ୱୟ କରି ସାଧାରଣ ଖୋଲିବା ସମୟରେ ହିଁ ଗସ୍ତର ବ୍ୟବସ୍ଥା କରାଯାଇଥିଲା। ସଂଗଠନ କହିଛି ଯେ, ତାଙ୍କ ଜାଣିବା ଅନୁସାରେ କୌଣସି ବ୍ୟକ୍ତିଙ୍କୁ ଆଇଫେଲ୍ ଟାୱାରରେ ପ୍ରବେଶ କରିବାରୁ ରୋକାଯାଇନଥିଲା। ତଥାପି ଏହି ଘଟଣା ଯୋଗୁଁ ଯେଉଁମାନେ ଆହତ କିମ୍ବା ଅସୁବିଧାର ସମ୍ମୁଖୀନ ହୋଇଥିବେ, ସେମାନଙ୍କୁ ସଂଗଠନ ଆନ୍ତରିକ କ୍ଷମା ପ୍ରାର୍ଥନା କରିଛି।
ଏହି ବିବାଦ ପରେ ଆଇଫେଲ୍ ଟାୱାର ପରିଚାଳନା ସଂସ୍ଥା SETE ମଧ୍ୟ ଘଟଣାକୁ ନେଇ ଆପତ୍ତି ପ୍ରକାଶ କରିଛି। BAPS ପ୍ରତିନିଧି ଦଳର ଗସ୍ତ ସମୟରେ ମହିଳାଙ୍କ ସହ ଯୋଗାଯୋଗ ସୀମିତ ରଖିବାକୁ ଅନୁରୋଧ ଆସିଥିବା କଥା SETE ସ୍ୱୀକାର କରିଥିବା ବେଳେ, ଏଭଳି ସର୍ତ୍ତ ଗ୍ରହଣ କରାଯିବା ଉଚିତ ନଥିଲା ବୋଲି କହିଛି। ଘଟଣାକୁ ନେଇ ପ୍ୟାରିସ୍ ମେୟର ତଦନ୍ତ ଘୋଷଣା କରିଛନ୍ତି। ଏହି ବିବାଦ ଫ୍ରାନ୍ସରେ ଲିଙ୍ଗ ସମାନତା ଓ ସାର୍ବଜନୀନ ସ୍ଥାନରେ ଧାର୍ମିକ ଆଚରଣକୁ ନେଇ ଚର୍ଚ୍ଚାକୁ ମଧ୍ୟ ତୀବ୍ର କରିଛି।
