Ishan Kishan: ଦୁଲୀପ ଟ୍ରଫି ଫାଇନାଲରେ ଇଶାନ କିଶନଙ୍କ୨୭୦ ରନ୍ର ଧମାକା! ବୈଭବ ସୂର୍ଯ୍ୟବଂଶୀଙ୍କୁ ବଡ଼ ଇନିଂସ ଖେଳିବାର ପାଠ ପଢ଼ାଇଲେ ବିବେକ ରାଜଦାନ
ନୂଆଦିଲ୍ଲୀ: ଦୁଲୀପ ଟ୍ରଫି ଫାଇନାଲରେ ଇଷ୍ଟ ଜୋନ୍ର ଅଧିନାୟକ ଇଶାନ କିଶନଙ୍କ ବ୍ୟାଟ୍ରୁ ଦେଖିବାକୁ ମିଳିଛି ଧମାକାଦାର ଇନିଂସ। ସାଉଥ୍ ଜୋନ୍ ବିପକ୍ଷରେ ସେ ୩୩୪ ବଲ୍ରେ ୨୭୦ ରନ୍ କରି ଦଳକୁ ବଡ଼ ସ୍କୋର ଆଡ଼କୁ ନେଇଛନ୍ତି। ତାଙ୍କ ଇନିଂସରେ ୩୦ଟି ଚୌକା ଓ ୭ଟି ଛକା ସାମିଲ ରହିଛି। ଇଶାନଙ୍କ ଏହି ମାରାଥନ୍ ଇନିଂସ ସହ ଇଷ୍ଟ ଜୋନ୍ ପ୍ରଥମ ଇନିଂସରେ ୭୦୮ ରନ୍ର ବିଶାଳ ସ୍କୋର କରିଛି।
ଅନ୍ୟପଟେ, ମାତ୍ର ୧୫ ବର୍ଷୀୟ ବୈଭବ ସୂର୍ଯ୍ୟବଂଶୀ ମଧ୍ୟ ଇଷ୍ଟ ଜୋନ୍ ପାଇଁ ଭଲ ଆରମ୍ଭ ଦେଇଥିଲେ। ସେ ୩୭ଟି ବଲ୍ରେ ଦ୍ରୁତ ୪୪ ରନ୍ କରିଥିଲେ। ତେବେ ଏହି ଭଲ ଆରମ୍ଭକୁ ବଡ଼ ଇନିଂସରେ ପରିଣତ କରିପାରିନଥିଲେ। ଏହି ସମୟରେ କମେଣ୍ଟ୍ରି କରୁଥିବା ପୂର୍ବତନ ଭାରତୀୟ କ୍ରିକେଟର୍ ବିବେକ ରାଜଦାନ ବୈଭବଙ୍କୁ ଇଶାନଙ୍କଠାରୁ ଶିଖିବାକୁ ପରାମର୍ଶ ଦେଇଥିଲେ। ସେ କହିଥିଲେ, ବୈଭବଙ୍କୁ ସେଟ୍ ହୋଇଯିବା ପରେ ଲମ୍ବା ଇନିଂସ ଖେଳିବା ଶିଖିବା ଆବଶ୍ୟକ।
ଇଶାନଙ୍କ ୨୭୦ ରନ୍ର ଇନିଂସ ତାଙ୍କ ପ୍ରଥମ ଶ୍ରେଣୀ କ୍ରିକେଟ୍ରେ ଦୃଢ଼ ପ୍ରଦର୍ଶନକୁ ପୁଣିଥରେ ସାମ୍ନାକୁ ଆଣିଛି। ଦୀର୍ଘ ସମୟ କ୍ରିଜ୍ରେ ରହି ଧୈର୍ଯ୍ୟ ଓ ଆକ୍ରମଣାତ୍ମକ ବ୍ୟାଟିଂର ଉଦାହରଣ ଦେଇଥିବା ଇଶାନଙ୍କ ଏହି ପ୍ରଦର୍ଶନ ଏବେ ଭାରତୀୟ ଟେଷ୍ଟ ଦଳକୁ ତାଙ୍କ ଫେରିବା ନେଇ ଆଲୋଚନାକୁ ମଧ୍ୟ ତୀବ୍ର କରିଛି। ଅନ୍ୟପଟେ, ବୈଭବଙ୍କ ପାଇଁ ରାଜଦାନଙ୍କ ପରାମର୍ଶ ଦ୍ରୁତ ରନ୍ ସହ ଇନିଂସକୁ ବଡ଼ କରିବାର ଗୁରୁତ୍ୱକୁ ସାମ୍ନାକୁ ଆଣିଛି।
