Delhi PG Regulation: ପିଜି ବ୍ୟବସ୍ଥାରେ ଆସିବ କଡ଼ା ନିୟମ, ଲାଇସେନ୍ସ ବାଧ୍ୟତାମୂଳକ ସହ ସିକ୍ୟୁରିଟି ଡିପୋଜିଟ୍ରେ ଲାଗିବ ସୀମା
ନୂଆଦିଲ୍ଲୀ: ଦକ୍ଷିଣ ଦିଲ୍ଲୀର ସତ୍ୟ ନିକେତନରେ ପିଜି ବିଲ୍ଡିଂ ଭୁଶୁଡ଼ି ୭ ଜଣଙ୍କ ମୃତ୍ୟୁ ପରେ ଦିଲ୍ଲୀ ସରକାର ପେଇଂ ଗେଷ୍ଟ୍ (PG) ବ୍ୟବସ୍ଥାକୁ ନିୟନ୍ତ୍ରଣ ପାଇଁ ନୂଆ ନିୟମ ଆଣିବାକୁ ପ୍ରସ୍ତାବ ଦେଇଛନ୍ତି। ପ୍ରସ୍ତାବିତ ‘Paying Guest Accommodation Regulation and Welfare Bill’ ଅନୁଯାୟୀ, ଦିଲ୍ଲୀର ପ୍ରତ୍ୟେକ PGକୁ ପଞ୍ଜୀକରଣ କରି ଲାଇସେନ୍ସ ନେବାକୁ ପଡ଼ିବ। ପୁଲିସ, ମହାନଗର ନିଗମ ଓ ସ୍ଥାନୀୟ ପ୍ରଶାସନର NOC ନେଇ ୯୦ ଦିନ ମଧ୍ୟରେ ପଞ୍ଜୀକରଣ କରିବାର ବ୍ୟବସ୍ଥା ରହିବ। ପ୍ରତ୍ୟେକ PGକୁ ଏକ ସ୍ୱତନ୍ତ୍ର PGRN ଦିଆଯିବ ଏବଂ ଯାଞ୍ଚ ହୋଇଥିବା PGଗୁଡ଼ିକର ସୂଚନା ଡିଜିଟାଲ ପ୍ଲାଟଫର୍ମରେ ଉପଲବ୍ଧ ହେବ।
ନୂଆ ପ୍ରସ୍ତାବରେ ଭଡ଼ା ଓ ସିକ୍ୟୁରିଟି ଡିପୋଜିଟ୍କୁ ନେଇ ମଧ୍ୟ ନିୟମ ରହିଛି। ଅଞ୍ଚଳ ଅନୁଯାୟୀ PG ଭଡ଼ା ନିର୍ଦ୍ଧାରଣ ପାଇଁ Rent Regulation Committee ଗଠନ କରାଯିବାର ପ୍ରସ୍ତାବ ରହିଥିବାବେଳେ, ଅପରେଟରମାନେ ୩ ମାସରୁ ଅଧିକ ଭଡ଼ାକୁ ସିକ୍ୟୁରିଟି ଡିପୋଜିଟ୍ ଭାବେ ନେଇପାରିବେ ନାହିଁ। ଲିଙ୍ଗ, ଜାତି, ଧର୍ମ କିମ୍ବା ରାଜ୍ୟ ଆଧାରରେ ଭିନ୍ନ ଭଡ଼ା ନେବାକୁ ମଧ୍ୟ ନିଷେଧ କରାଯିବ। ସୁରକ୍ଷା ପାଇଁ ସମସ୍ତ ପ୍ରବେଶପଥ ଓ ସାଧାରଣ ସ୍ଥାନରେ CCTV ବାଧ୍ୟତାମୂଳକ ହେବ ଏବଂ ଫୁଟେଜ୍ ୩୦ ଦିନ ପର୍ଯ୍ୟନ୍ତ ସଂରକ୍ଷିତ ରହିବ। ୧୫ କିମ୍ବା ତା’ଠାରୁ ଅଧିକ ଛାତ୍ର ରହୁଥିବା PGରେ ରାତି ସମୟରେ ସୁରକ୍ଷାକର୍ମୀ ମୁତୟନ କରିବାକୁ ପଡ଼ିବ। ଭିଜିଟର ରେଜିଷ୍ଟର, ୫୦୦ ମିଟର ମଧ୍ୟରେ ୱାର୍ଡେନ୍ ଏବଂ ଅଭିଯୋଗ ପାଇଁ ଅନଲାଇନ୍ ବ୍ୟବସ୍ଥା ମଧ୍ୟ ପ୍ରସ୍ତାବିତ ହୋଇଛି।
ଏହି ପ୍ରସ୍ତାବ ପଛରେ ସତ୍ୟ ନିକେତନ ଦୁର୍ଘଟଣା ଏକ ବଡ଼ କାରଣ ହୋଇଛି। ସେଠାରେ ପାଞ୍ଚ ମହଲାର PG ବିଲ୍ଡିଂ ଭୁଶୁଡ଼ି ୭ ଜଣଙ୍କ ମୃତ୍ୟୁ ଓ ୫ ଜଣ ଆହତ ହୋଇଥିଲେ। ଉଦ୍ଧାର କାର୍ଯ୍ୟ ପ୍ରାୟ ୨୭ ଘଣ୍ଟା ଚାଲିଥିଲା। ଘଟଣା ପରେ ଅବୈଧ ନିର୍ମାଣ, ବେସମେଣ୍ଟରେ ଚାଲିଥିବା କାମ ଓ ବିଲ୍ଡିଂ ସୁରକ୍ଷାକୁ ନେଇ ତଦନ୍ତ ଆରମ୍ଭ ହୋଇଛି। ଦିଲ୍ଲୀ ହାଇକୋର୍ଟ ମଧ୍ୟ PGଗୁଡ଼ିକର ଯାଞ୍ଚ ଓ ନିୟମିତ କରିବା ଉପରେ ଜୋର ଦେଇଛନ୍ତି। ଏହାପରେ MCD ନିକଟସ୍ଥ ବିପଦପୂର୍ଣ୍ଣ କୋଠାରେ ନିୟନ୍ତ୍ରିତ ଭଙ୍ଗା କାର୍ଯ୍ୟ ଆରମ୍ଭ କରିଛି।
