Rohit Sharma: ୯ ବର୍ଷ ହେଲା ଅତୁଟ ରହିଛି ରୋହିତଙ୍କ ରେକର୍ଡ, T20Iରେ ଭାରତ ପାଇଁ ୩୫ ବଲ୍ରେ ଶତକ; ଟପ୍-୫ରେ କିଏ କିଏ?
ନୂଆଦିଲ୍ଲୀ: ଟି-୨୦ ଅନ୍ତର୍ଜାତୀୟ କ୍ରିକେଟ୍ରେ ଦ୍ରୁତ ଶତକ ବ୍ୟାଟିଂ ପାଇଁ ଭାରତୀୟ ବ୍ୟାଟରଙ୍କ ତାଲିକାରେ ରୋହିତ ଶର୍ମା ଏବେ ବି ଶୀର୍ଷରେ ରହିଛନ୍ତି । ୨୦୧୭ରେ ଶ୍ରୀଲଙ୍କା ବିପକ୍ଷରେ ଇନ୍ଦୋରରେ ରୋହିତ ମାତ୍ର ୩୫ ବଲ୍ରେ ଶତକ ପୂରଣ କରିଥିଲେ। ସେହି ମ୍ୟାଚ୍ରେ ସେ ୪୩ ବଲ୍ରୁ ୧୧୮ ରନ୍ର ବିସ୍ଫୋରକ ପାଳି ଖେଳିଥିଲେ, ଯେଉଁଥିରେ ୧୨ଟି ଚୌକା ଓ ୧୦ଟି ଛକା ଥିଲା। ରୋହିତଙ୍କ ଏହି ରେକର୍ଡକୁ ଗତ ୯ ବର୍ଷ ମଧ୍ୟରେ କୌଣସି ଭାରତୀୟ ବ୍ୟାଟର ଭାଙ୍ଗିପାରିନାହାନ୍ତି। ତାଙ୍କ ସହ କେଏଲ୍ ରାହୁଲ ୧୬୫ ରନ୍ର ଓପନିଂ ଭାଗିଦାରୀ କରିଥିଲେ।
ରୋହିତଙ୍କ ନିକଟତମ ପ୍ରତିଦ୍ୱନ୍ଦ୍ୱୀ ଭାବେ ଅଭିଷେକ ଶର୍ମା ରହିଛନ୍ତି। ୨୦୨୫ରେ ଇଂଲଣ୍ଡ ବିପକ୍ଷରେ ଅଭିଷେକ ୩୭ ବଲ୍ରେ ଶତକ ମାରିଥିଲେ ଏବଂ ୫୪ ବଲ୍ରୁ ୧୩୫ ରନ୍ କରିଥିଲେ। ତାଙ୍କ ଇନିଂସ୍ରେ ୭ଟି ଚୌକା ଓ ୧୩ଟି ଛକା ଥିଲା। ଏହା ଭାରତ ପାଇଁ T20Iରେ ଦ୍ୱିତୀୟ ଦ୍ରୁତତମ ଶତକ। ଏହାପରେ ସଞ୍ଜୁ ସାମସନ ୪୦ ବଲ୍, ତିଳକ ବର୍ମା ୪୧ ବଲ୍ ଏବଂ ଈଶାନ କିଶନ ୪୨ ବଲ୍ରେ ଶତକ ମାରି ଭାରତୀୟ ତାଲିକାରେ ପରବର୍ତ୍ତୀ ସ୍ଥାନରେ ଅଛନ୍ତି।
ଭାରତୀୟଙ୍କ ମଧ୍ୟରେ ରୋହିତଙ୍କ ୩୫ ବଲ୍ର ଶତକ ଏବେ ବି ନମ୍ବର-୧। ଟପ୍-୫ ତାଲିକା ଅନୁସାରେ ମାତ୍ର ୩୫ ବଲ୍ରେ ଶତକ କରି ରୋହିତ ଶର୍ମା ପ୍ରଥମ ସ୍ଥାନରେ ଥିବା ବେଳେ ୩୭ ବଲ୍ରେ ଶତକ ସହ ଅଭିଷେକ ଶର୍ମା ଦ୍ୱିତୀୟ, ୪୦ ବଲ୍ରେ ସଞ୍ଜୁ ସାମସନ ତୃତୀୟ, ୪୧ ବଲ୍ରେ ତିଳକ ବର୍ମା ଚତୁର୍ଥ ଏବଂ ୪୨ ବଲ୍ରେ ଈଶାନ କିଶନ ପଞ୍ଚମ ସ୍ଥାନରେ ରହିଛନ୍ତି। ଫୁଲ୍-ମେମ୍ବର ଦେଶଗୁଡ଼ିକ ମଧ୍ୟରେ ରୋହିତଙ୍କ ୩୫ ବଲ୍ର ଶତକ ବିଶ୍ୱର ଦ୍ରୁତତମ ଶତକଗୁଡ଼ିକ ମଧ୍ୟରେ ରହିଛି, ଯଦିଓ ତାଙ୍କଠାରୁ ଦ୍ରୁତ ୩୩ ବଲ୍ରେ ଶତକ ହାସଲ କରିଛନ୍ତି ସିକନ୍ଦର ରଜା ଓ ଫିନ୍ ଆଲେନ।
