BRICS Summit: BRICS ସମ୍ମିଳନୀକୁ ନେଇ ଚିଦାମ୍ବରମଙ୍କ ପ୍ରଶ୍ନ, ଥରୁର କହିଲେ: ଭାରତର କୂଟନୈତିକ ଶକ୍ତିର ଏହା ଏକ ବଡ଼ ପ୍ରମାଣ
ନୂଆଦିଲ୍ଲୀ: BRICS ସମ୍ମିଳନୀରୁ ଭାରତ କ’ଣ ବାସ୍ତବ ଲାଭ ପାଇଛି ବୋଲି ବରିଷ୍ଠ କଂଗ୍ରେସ ନେତା ପି. ଚିଦାମ୍ବରମ ପ୍ରଶ୍ନ ଉଠାଇବା ପରେ ଦଳର ସାଂସଦ ଶଶୀ ଥରୁର ଏହି ସଙ୍ଗଠନର ଗୁରୁତ୍ୱ ସମ୍ପର୍କରେ ନିଜ ମତ ରଖିଛନ୍ତି। ଦିଲ୍ଲୀରେ ହେବାକୁ ଥିବା BRICS ସମ୍ମିଳନୀ ପୂର୍ବରୁ ଥରୁର କହିଛନ୍ତି ଯେ, BRICS ଭାରତର କୂଟନୈତିକ ଭାବେ ବିଭିନ୍ନ ଦେଶକୁ ଏକାଠି କରିବାର କ୍ଷମତା ପ୍ରଦର୍ଶନ କରୁଛି। ଏହା ସହ ଗ୍ଲୋବାଲ ସାଉଥ୍ର ଦେଶଗୁଡ଼ିକ ପାଇଁ ମଧ୍ୟ ଏକ ଗୁରୁତ୍ୱପୂର୍ଣ୍ଣ ମଞ୍ଚ ବୋଲି ସେ କହିଛନ୍ତି।
ଥରୁରଙ୍କ କହିବା ଅନୁସାରେ, BRICSର ୧୧ଟି ସଦସ୍ୟ ଦେଶ ବିଶ୍ୱର ବହୁ ସଂଖ୍ୟକ ଜନସଂଖ୍ୟାଙ୍କ ପ୍ରତିନିଧିତ୍ୱ କରୁଛନ୍ତି ଏବଂ ବିଶ୍ୱ GDPର ପ୍ରାୟ ୪୧ ପ୍ରତିଶତ ଅଂଶ ସହ ଜଡ଼ିତ। ଏଭଳି ଏକ ବଡ଼ ଅନ୍ତର୍ଜାତୀୟ ମଞ୍ଚର ଆୟୋଜନ ଭାରତ ପାଇଁ ସମ୍ମାନର ବିଷୟ ବୋଲି ସେ କହିଛନ୍ତି। ବିଭିନ୍ନ ଦେଶର ରାଷ୍ଟ୍ରପତି ଓ ପ୍ରଧାନମନ୍ତ୍ରୀମାନଙ୍କୁ ଏକାଠି କରିବା ଭାରତର ଅନ୍ତର୍ଜାତୀୟ କୂଟନୈତିକ ପ୍ରଭାବକୁ ମଧ୍ୟ ପ୍ରକାଶ କରୁଛି ବୋଲି ଥରୁର ମତ ଦେଇଛନ୍ତି।
ତେବେ BRICS ସମ୍ମୁଖରେ କିଛି ବଡ଼ ଚ୍ୟାଲେଞ୍ଜ ମଧ୍ୟ ରହିଛି ବୋଲି ଥରୁର ସ୍ୱୀକାର କରିଛନ୍ତି। ଇରାନ ଯୁଦ୍ଧ ଓ ରୁଷ-ୟୁକ୍ରେନ ଯୁଦ୍ଧ ଭଳି ଅନ୍ତର୍ଜାତୀୟ ପ୍ରସଙ୍ଗରେ ସଦସ୍ୟ ଦେଶମାନଙ୍କ ମଧ୍ୟରେ ସମାନ ମତ ସୃଷ୍ଟି କରିବା କଷ୍ଟକର ହେଉଛି। ଏହା ସହ BRICS ଦେଶଗୁଡ଼ିକ ସହ ଭାରତର ବାଣିଜ୍ୟିକ ସମ୍ପର୍କରେ ଆମଦାନୀ ବଢ଼ୁଥିବା ବେଳେ ରପ୍ତାନି କମୁଥିବାକୁ ସେ ଚିନ୍ତାର ବିଷୟ ବୋଲି କହିଛନ୍ତି। ଅନ୍ୟପକ୍ଷରେ, ପି. ଚିଦାମ୍ବରମ ସମ୍ପ୍ରତି BRICSର ଗତ କିଛି ସମ୍ମିଳନୀରୁ ଭାରତ କୌଣସି ସ୍ପଷ୍ଟ ଓ ବାସ୍ତବ ଲାଭ ପାଇଛି କି ନାହିଁ ବୋଲି ପ୍ରଶ୍ନ କରିଥିଲେ। ଏହାକୁ ନେଇ ଏବେ କଂଗ୍ରେସର ଦୁଇ ବରିଷ୍ଠ ନେତାଙ୍କ ଭିନ୍ନ ମତ ଚର୍ଚ୍ଚାର ବିଷୟ ହୋଇଛି।
