Hardik Pandya Injury: ପୁଣି ଆହତ ହାର୍ଦ୍ଦିକ ପାଣ୍ଡ୍ୟା! ୩ ସପ୍ତାହ ପର୍ଯ୍ୟନ୍ତ କ୍ରିକେଟ୍ରୁ ଦୂରେଇପାରନ୍ତି
ନୂଆଦିଲ୍ଲୀ: ଭାରତୀୟ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ଫିଟନେସ୍କୁ ନେଇ ପୁଣି ଚିନ୍ତା ବଢ଼ିଛି। ସୂଚନା ଅନୁସାରେ, ହାର୍ଦ୍ଦିକଙ୍କ ଡାହାଣ ଗୋଡ଼ର ତଳ ଭାଗରେ ନୂଆ ଆଘାତ ଲାଗିଛି। ତାଙ୍କୁ ପ୍ରାୟ ଦୁଇ ସପ୍ତାହ ସମ୍ପୂର୍ଣ୍ଣ ବିଶ୍ରାମ ନେବାକୁ କୁହାଯାଇଛି। ଏହି କାରଣରୁ ସେ ଅତିକମ୍ରେ ୩ ସପ୍ତାହ କ୍ରିକେଟ୍ରୁ ଦୂରେଇ ରହିପାରନ୍ତି। ଫଳରେ ଅକ୍ଟୋବର ୬ରୁ ଆରମ୍ଭ ହେବାକୁ ଥିବା ଅଷ୍ଟ୍ରେଲିଆ-ଏ ବିପକ୍ଷ ଦିନିକିଆ ସିରିଜ୍ରେ ତାଙ୍କ ଖେଳିବା ନେଇ ଏବେ ଅନିଶ୍ଚିତତା ରହିଛି।
PTIର ରିପୋର୍ଟ ଅନୁସାରେ, ହାର୍ଦ୍ଦିକଙ୍କ ଆଘାତର ସ୍କାନ୍ ରିପୋର୍ଟ BCCIର ଡାକ୍ତରୀ ଟିମ୍ ଦେଖିଛି। BCCI ମେଡିକାଲ୍ ପ୍ୟାନେଲ୍ର ମୁଖ୍ୟ ଡାକ୍ତର ଦିନଶା ପାର୍ଦିୱାଲା ରିପୋର୍ଟ ଦେଖିବା ପରେ ତାଙ୍କ ଚିକିତ୍ସା ଓ ଅଭ୍ୟାସ କେବେଠାରୁ ଆରମ୍ଭ ହେବ, ସେନେଇ ନିଷ୍ପତ୍ତି ନେବେ ବୋଲି ସୂତ୍ର କହିଛି। ହାର୍ଦ୍ଦିକଙ୍କୁ ସେପ୍ଟେମ୍ବର ୨୦ରୁ ପୁଣି ଖେଳିବା ପାଇଁ ଫିଟ୍ ବୋଲି ଧରାଯାଇଥିଲା ଏବଂ ଏହା ପରେ ତାଙ୍କୁ ଅଷ୍ଟ୍ରେଲିଆ-ଏ ବିପକ୍ଷ ସିରିଜ୍ ପାଇଁ ଭାରତ-ଏ ଦଳରେ ନିଆଯାଇଥିଲା। କିନ୍ତୁ ନୂଆ ଆଘାତ ଯୋଗୁଁ ତାଙ୍କ ଫେରିବା ଯୋଜନା ପୁଣି ଥରେ ପ୍ରଭାବିତ ହୋଇପାରେ ବୋଲି ଅନୁମାନ କରାଯାଉଛି |
ସୂତ୍ରର ସୂଚନା ଅନୁସାରେ, ଗତ କିଛି ମାସ ମଧ୍ୟରେ ହାର୍ଦ୍ଦିକଙ୍କୁ ଏକାଧିକ ଥର ଫିଟନେସ୍ ସମସ୍ୟା ହୋଇଛି। ଅକ୍ଟୋବର ୨୨ରୁ ନ୍ୟୁଜିଲାଣ୍ଡ ବିପକ୍ଷ T20I ସିରିଜ୍ ଆରମ୍ଭ ହେବାକୁ ଥିବାରୁ ସେଥିରେ ମଧ୍ୟ ତାଙ୍କ ଖେଳିବା ନେଇ ପ୍ରଶ୍ନ ଉଠିଛି। ତେବେ ହାର୍ଦ୍ଦିକ କେବେ ପଡ଼ିଆକୁ ଫେରିବେ, ତାହା ତାଙ୍କ ଆଘାତର ସ୍ଥିତି ଓ ଡାକ୍ତରୀ ଯାଞ୍ଚ ପରେ ହିଁ ସ୍ପଷ୍ଟ ହେବ।
