Delhi Protest Detentions: ଦିଲ୍ଲୀରେ ବିକ୍ଷୋଭ ପୂର୍ବରୁ ଅଟକ ହେଲେ କେରଳର ପୂର୍ବତନ ମୁଖ୍ୟମନ୍ତ୍ରୀ, ରାଜ୍ୟସଭା ସାଂସଦ
ନୂଆଦିଲ୍ଲୀ: ଦିଲ୍ଲୀର ଜନ୍ତର ମନ୍ତରରେ ପ୍ରସ୍ତାବିତ ବିକ୍ଷୋଭ ପୂର୍ବରୁ ପୋଲିସ ଅନେକ ପ୍ରତିବାଦକାରୀଙ୍କୁ ଅଟକ ରଖିଛି। ଅଟକ ହୋଇଥିବା ଲୋକଙ୍କ ମଧ୍ୟରେ କେରଳର ପୂର୍ବତନ ମୁଖ୍ୟମନ୍ତ୍ରୀ ପିନରାୟୀ ବିଜୟନ, CPI(M) ସାଂସଦ ଜନ୍ ବ୍ରିଟାସ ଏବଂ ପୂର୍ବତନ ଅର୍ଥମନ୍ତ୍ରୀ କେ.ଏନ୍. ବାଲାଗୋପାଳ ଥିବା ଖବର ମିଳିଛି। ଭୋଟର ପଞ୍ଜୀକରଣ ଓ ସ୍ପେଶାଲ ଇଣ୍ଟେନ୍ସିଭ୍ ରିଭିଜନ୍ (SIR) ପ୍ରକ୍ରିୟାରେ କଥିତ ଅନିୟମିତତାକୁ ବିରୋଧ କରି କକ୍ରୋଚ୍ ଜନତା ପାର୍ଟି (CJP) ପକ୍ଷରୁ ଏହି ବିକ୍ଷୋଭ ଡାକରା ଦିଆଯାଇଥିଲା। ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ମଧ୍ୟ ଦଳର ଦାବି ରହିଛି। ପୋଲିସ ଅନୁମତି ନଦେବା ସହ ନିର୍ଦ୍ଧାରିତ ସମୟରେ ସୂଚନା ଦିଆଯାଇନଥିବା କାରଣ ଦର୍ଶାଇଛି।
ପ୍ରତିବାଦକାରୀଙ୍କୁ ପୋଲିସ ଭ୍ୟାନ୍ରେ ନେଇ ଦିଲ୍ଲୀର ଛତ୍ରସାଲ ଷ୍ଟାଡିୟମ୍ରେ ରଖାଯାଇଥିବା ଭିଡିଓ ସାମ୍ନାକୁ ଆସିଛି। ଜନ୍ ବ୍ରିଟାସ କହିଛନ୍ତି ଯେ, ତାଙ୍କୁ ଷ୍ଟାଡିୟମ୍କୁ ନିଆଯିବା ପରେ ପୋଲିସ ଜିପ୍ରେ ସହରର ବିଭିନ୍ନ ସ୍ଥାନକୁ ନିଆଯାଉଛି ଏବଂ କେଉଁଠାକୁ ନିଆଯାଉଛି ତାହା ଜଣାନାହିଁ। CJPର ନେତା ଅଭିଜିତ ଦିପକେ, ଆଶୁତୋଷ ରାଙ୍କା ଓ ସୌରଭ ଦାସଙ୍କୁ ମଧ୍ୟ ଦିଲ୍ଲୀରେ ପହଞ୍ଚିବା ପରେ ଅଟକ ରଖାଯାଇଥିବା ରିପୋର୍ଟରେ କୁହାଯାଇଛି। ଏହାସହ ପ୍ରାୟ ୪୦୦ ଜଣଙ୍କୁ ରାତିରେ ଅଟକ ରଖାଯାଇଥିବା ଏବଂ ବାମପନ୍ଥୀ ଦଳର କିଛି ନେତାଙ୍କୁ ମଧ୍ୟ ପୋଲିସ ହେପାଜତକୁ ନେଇଥିବା ଖବର ଆସିଛି।
ବିକ୍ଷୋଭକୁ ନଜରରେ ରଖି ଦିଲ୍ଲୀରେ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ରାଜୀବ ଚୌକ, ନୂଆଦିଲ୍ଲୀ, ସେଣ୍ଟ୍ରାଲ ସେକ୍ରେଟାରିଏଟ୍, ପଟେଲ ଚୌକ ଓ କାଶ୍ମୀରୀ ଗେଟ୍ ସମେତ ୪୫ଟି ମେଟ୍ରୋ ଷ୍ଟେସନର ପ୍ରବେଶ ଓ ପ୍ରସ୍ଥାନ ଗେଟ୍ ବନ୍ଦ କରାଯାଇଛି। ହଜରତ ନିଜାମୁଦ୍ଦିନ ଓ ନୂଆଦିଲ୍ଲୀ ଷ୍ଟେସନକୁ ଆସିବାକୁ ଥିବା ୨୫୦ରୁ ଅଧିକ ଟ୍ରେନ୍ ବାତିଲ କରାଯାଇଥିବା ରିପୋର୍ଟରେ ଦାବି କରାଯାଇଛି। ସେହିପରି ୨୦ ହଜାରରୁ ଅଧିକ ପୋଲିସ କର୍ମଚାରୀ ମୁତୟନ ହୋଇଥିବା, ୩୦୦ଟି CCTV କ୍ୟାମେରା ଲଗାଯାଇଥିବା ଏବଂ ଜନ୍ତର ମନ୍ତରର ୪ କିଲୋମିଟର ପରିଧିରେ ୨୪ ଘଣ୍ଟା ପାଇଁ ଇଣ୍ଟରନେଟ୍ ସେବା ବନ୍ଦ କରାଯାଇଥିବା ସୂଚନା ମିଳିଛି।
