Air India Flight Emergency Landing: ହାଇଜାକ୍ ଆଲର୍ଟ ପରେ ଜୟପୁରରେ ଜରୁରୀ ଅବତରଣ କଲା ଫ୍ରାଙ୍କଫର୍ଟ-ଦିଲ୍ଲୀ ବିମାନ
ନୂଆଦିଲ୍ଲୀ: ଫ୍ରାଙ୍କଫର୍ଟରୁ ଦିଲ୍ଲୀ ଯାଉଥିବା ଏୟାର ଇଣ୍ଡିଆର AI-2030 ବିମାନକୁ ନେଇ ହାଇଜାକ୍ ଆଲର୍ଟ ମିଳିବା ପରେ ଜୟପୁର ବିମାନବନ୍ଦରରେ ଜରୁରୀ ଅବତରଣ କରାଯାଇଥିବା ସୂଚନା ମିଳିଛି। ରିପୋର୍ଟ ଅନୁସାରେ, ଅହମଦାବାଦ ଏୟାର ଟ୍ରାଫିକ୍ କଣ୍ଟ୍ରୋଲ୍ (ATC)କୁ ବିମାନ ସମ୍ପର୍କରେ ଏକ ଆଲର୍ଟ ମିଳିଥିଲା। ଏହାପରେ ପାଇଲଟ୍ କିଛି ସେକେଣ୍ଡ ପାଇଁ ସ୍କ୍ୱାକ୍-୭୫୦୦ ସଙ୍କେତ ଦେଇଥିବାରୁ ସୁରକ୍ଷା ଏଜେନ୍ସିଗୁଡ଼ିକ ସତର୍କ ହୋଇଯାଇଥିଲେ।
ଏହାପରେ ବିମାନଟିକୁ ଜୟପୁର ବିମାନବନ୍ଦରରେ ସୁରକ୍ଷିତ ଭାବେ ଅବତରଣ କରାଯାଇଥିଲା। ସକାଳ ୯ଟା ୪୫ ମିନିଟ୍ରେ ବିମାନକୁ ଆଇସୋଲେସନ୍ ୱେ’କୁ ନିଆଯାଇଥିବା କୁହାଯାଇଛି। ଜରୁରୀ ପରିସ୍ଥିତିରେ ବିମାନକୁ ଅନ୍ୟ ବିମାନଠାରୁ ଦୂରରେ ରଖି ଯାଞ୍ଚ କରିବା ପାଇଁ ଏହି ସ୍ଥାନ ବ୍ୟବହାର କରାଯାଏ।
ଘଟଣା ପରେ ବିମାନବନ୍ଦରରେ ସୁରକ୍ଷା ଏଜେନ୍ସିଗୁଡ଼ିକ ସତର୍କ ରହିଥିଲେ। ତେବେ ବିମାନକୁ ନେଇ ଆଲର୍ଟ ମିଳିବାର ପ୍ରକୃତ କାରଣ କ’ଣ ଏବଂ ସ୍କ୍ୱାକ୍-୭୫୦୦ ସଙ୍କେତ କାହିଁକି ଦିଆଯାଇଥିଲା, ସେ ସମ୍ପର୍କରେ ଏଠାରେ ଅଧିକାରିକ ସ୍ପଷ୍ଟୀକରଣ ଉପଲବ୍ଧ ନାହିଁ।
