Nashik Shankh Record: ସିଂହସ୍ଥ କୁମ୍ଭମେଳା ପୂର୍ବରୁ ନାସିକରେ ବିଶ୍ୱ ରେକର୍ଡ, ଏକାଠି ଶଙ୍ଖ ବଜାଇଲେ ୫୧୭ ଶ୍ରଦ୍ଧାଳୁ
ମହାରାଷ୍ଟ୍ର: ମହାରାଷ୍ଟ୍ରର ନାସିକରେ ସିଂହସ୍ଥ କୁମ୍ଭମେଳାର ଧ୍ୱଜାରୋହଣ ସମାରୋହ ପୂର୍ବରୁ ଏକ ନୂଆ ରେକର୍ଡ ସୃଷ୍ଟି ହୋଇଛି। ଗୋଦାବରୀ ନଦୀ କୂଳରେ ୫୧୭ ଜଣ ଶ୍ରଦ୍ଧାଳୁ ଏକାସାଙ୍ଗରେ ଶଙ୍ଖ ବଜାଇ ଗିନିଜ୍ ୱାର୍ଲ୍ଡ ରେକର୍ଡ ହାସଲ କରିଥିବା ଦାବି କରାଯାଇଛି। ଏହି ସମୟରେ ପରିବେଶ ‘ଭାରତ ମାତା କୀ ଜୟ’ ନାରାରେ ଗୁଞ୍ଜରି ଉଠିଥିଲା।
ଏହି ସାମୂହିକ ଶଙ୍ଖନାଦ କାର୍ଯ୍ୟକ୍ରମରେ ବହୁ ସଂଖ୍ୟାରେ ଶ୍ରଦ୍ଧାଳୁ ଏକାଠି ହୋଇଥିଲେ। ସିଂହସ୍ଥ କୁମ୍ଭମେଳାର ଧ୍ୱଜାରୋହଣ ପୂର୍ବରୁ ଆୟୋଜିତ ଏହି କାର୍ଯ୍ୟକ୍ରମ ଧାର୍ମିକ ଉତ୍ସାହ ଓ ଭକ୍ତିମୟ ପରିବେଶ ସୃଷ୍ଟି କରିଥିଲା। ଏକାସାଙ୍ଗରେ ଏତେ ସଂଖ୍ୟକ ଲୋକ ଶଙ୍ଖ ବଜାଇବା ଏହି ଆୟୋଜନର ମୁଖ୍ୟ ଆକର୍ଷଣ ଥିଲା।
ଏହା ପୂର୍ବରୁ ୨୦୧୯ରେ ଆମେରିକାର ନ୍ୟୁ ଜର୍ସିରେ ୩୦୩ ଜଣ ଏକାସାଙ୍ଗରେ ଶଙ୍ଖ ବଜାଇ ବିଶ୍ୱ ରେକର୍ଡ କରିଥିଲେ। ନାସିକରେ ୫୧୭ ଜଣଙ୍କ ଅଂଶଗ୍ରହଣ ସହ ସେହି ରେକର୍ଡ ଭାଙ୍ଗିଥିବା ଖବର ସାମ୍ନାକୁ ଆସିଛି। ଏହି ଆୟୋଜନ ସିଂହସ୍ଥ କୁମ୍ଭମେଳା ପୂର୍ବରୁ ନାସିକରେ ଚର୍ଚ୍ଚାର ବିଷୟ ପାଲଟିଛି।
