ସନ୍ତାନ ଜନ୍ମ କଲେ ମିଳିବ ବମ୍ପର ବୋନସ୍
ନୂଆଦିଲ୍ଲୀ: ସନ୍ତାନ ଜନ୍ମ କଲେ ମିଳିବ ବୋନସ୍। ଅଧିକ ସନ୍ତାନ ଜନ୍ମ ପାଇଁ ଲୋକଙ୍କୁ ପ୍ରୋତ୍ସାହନ ଦିଆଯାଉଛି । ଏଥିପାଇଁ ଘରୋଇ କମ୍ପାନୀମାନେ ବି ଆଗେଇ ଆସିଛନ୍ତି । ସନ୍ତାନ ଜନ୍ମ ଦେଲେ କମ୍ପାନି ଦେବ ବୋନସ। ଏମିତି ଏକ ଆକର୍ଷଣୀୟ ଅଫର ଆଣିଛି ଏକ ଚାଇନିଜ୍ କମ୍ପାନୀ । କମ୍ପାନୀ ଏହାର କର୍ମଚାରୀମାନଙ୍କୁ ସନ୍ତାନ ପ୍ରାପ୍ତି ପାଇଁ ସବସିଡି ଦେବ। ଏହି କମ୍ପାନୀ ୧ ବିଲିୟନ ୟୁଆନ୍ (୧୩୮ ମିଲିୟନ ଡ଼ଲାର୍ କିମ୍ବା 11,48,87,08,000 ଭାରତୀୟ ଟଙ୍କା) ର ଏକ ନୂତନ ଚାଇଲ୍ଡ କେୟାର୍ ସବସିଡି ଆଣିଛି । ଟ୍ରିପ୍ ଡଟ୍ କମ୍ ନାମକ ଏକ କମ୍ପାନୀ ତା କର୍ମଚାରୀଙ୍କୁ ଏହି ସବସିଡି ଦେବ। ଯେଉଁମାନେ ଅତି କମରେ କମ୍ପାନୀ ସହ ତିନି ବର୍ଷ ଧରି ଜଡିତ ଅଛନ୍ତି ସେମାନଙ୍କୁ ଏହି ସୁବିଧା ମିଳିବ। ଏହିପରି କର୍ମଚାରୀମାନେ ଶିଶୁର ପ୍ରଥମ ଜନ୍ମଦିନ ଠାରୁ ୫ ବର୍ଷ ବୟସ ପର୍ଯ୍ୟନ୍ତ ପ୍ରତ୍ୟେକ ପିଲାଙ୍କ ପାଇଁ ବାର୍ଷିକ ୧୦୦୦୦ ୟୁଆନ୍ କିମ୍ବା 1,13,178.44 ଟଙ୍କା ବୋନସ୍ ପାଇବେ । ଟ୍ରିପ୍ ଡଟ୍ କମ୍ ବିଶ୍ୱର ସର୍ବବୃହତ ଅନ୍ଲାଇନ୍ ଟ୍ରାଭେଲ୍ ଏଜେନ୍ସି ମଧ୍ୟରେ ଗଣାଯାଏ।
ଟ୍ରିପ୍ ଡଟ୍ କମ୍ ଏକ ବିବୃତ୍ତିରେ କହିଛି ଯେ ତିନି ବର୍ଷ ଧରି କାର୍ଯ୍ୟ କରୁଥିବା ସମସ୍ତ ପୂର୍ଣ୍ଣକାଳୀନ କର୍ମଚାରୀମାନେ ଏହି ବୋନସର ସୁବିଧା ପାଇପାରିବେ। ଅନେକ ଚାଇନାର କମ୍ପାନୀ ସେମାନଙ୍କ କର୍ମଚାରୀଙ୍କ ପାଇଁ ଏଭଳି ଯୋଜନା ଘୋଷଣା କରିଛନ୍ତି। ବାସ୍ତବରେ ଚୀନ୍ ଜନସଂଖ୍ୟା ସଙ୍କଟ ଦେଇ ଗତି କରୁଛି। ୬୦ ବର୍ଷ ମଧ୍ୟରେ ପ୍ରଥମ ଥର ପାଇଁ ଚାଇନାର ଜନସଂଖ୍ୟା ହ୍ରାସ ପାଇଛି ଏବଂ ଶତାବ୍ଦୀର ଶେଷ ଭାଗରେ ଏହା ଅଧା ହେବାକୁ ଯାଉଛି। ଜାତୀୟ ଜନ୍ମ ହାର ରେକର୍ଡ ପ୍ରତି ୧୦୦୦ ଲୋକଙ୍କ ପ୍ରତି ୬.୭୭ ପହଞ୍ଚିଛି।
ଦଶନ୍ଧି ଧରି ଚାଇନାରେ ଗୋଟିଏ ଶିଶୁ ନୀତି ଥିଲା ଯାହା ୨୦୧୫ ରେ ରଦ୍ଦ ହୋଇଯାଇଥିଲା। ଏହା ପରେ, ପ୍ରଥମେ ବିବାହିତ ଦମ୍ପତିଙ୍କୁ ଦୁଇଟି ସନ୍ତାନ ପ୍ରାପ୍ତ କରିବାକୁ ଅନୁମତି ଦିଆଯାଇଥିଲା। ଜନ୍ମ ହାର କ୍ରମାଗତ ଭାବେ ହ୍ରାସ ହେଉଥିବାରୁ ଚୀନ୍ ପାଇଁ ଏହା ଚିନ୍ତାର ବିଷୟ ପାଲଟିଛି।
