ସଞ୍ଜୟ କୁମାର ପାଣିଗ୍ରାହୀ1/12/2023 at 6:44 PM
କନ୍ଧମାଳ :(ସଞ୍ଜୟ କୁମାର ପାଣିଗ୍ରାହୀ): କନ୍ଧମାଳ ଜିଲ୍ଲା ଫୁଲବାଣୀ ସଦର ଥାନା ଅନ୍ତର୍ଗତ ଦଡକି ଠାରେ ଜଣେ ଯୁବକଙ୍କ ମୃତଦେହ ଉଦ୍ଧାର କରାଯାଇଛି । ମୃତକ ଜଣକ ସଞ୍ଜିତ ମଲ୍ଲିକ (୩୨)। ସେ ଦଡକି ସରପଞ୍ଚ ନମିତା ମଲ୍ଲିକ ଙ୍କ ପୁଅ ବୋଲି ଜଣାପଡିଛି । ସେ ମଧ୍ୟ ଜିଲ୍ଲା ବିଜେଡି ଉପ ସଭାପତି ଥିଲେ । ସୂଚନା ଅନୁସାରେ, ସଞ୍ଜିତ ଗୁରୁବାର ରାତିରେ ପଞ୍ଚାୟତ ଗୃହରେ ଶୋଇଥିଲେ। ସକାଳୁ ତାଙ୍କ ବାପା ତାଙ୍କୁ ଉଠାଇବା ପାଇଁ ଯାଇଥିବା ବେଳେ ସେଠାରେ ତାଙ୍କ ମୃତଦେହ ଦେଖିବାକୁ ପାଇଥିଲେ । ସଙ୍ଗେ ସଙ୍ଗେ ପରିବାର ଲୋକ ଙ୍କୁ ଏବଂ ପୁଲିସକୁ ଖବର ଦିଆଯିବା ପରେ ସଦର ଥାନା ପୁଲିସ ସହ ଏସଡିପିଓ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛନ୍ତି । ଏପଟେ ପରିବାର ପକ୍ଷରୁ ସଞ୍ଜିତଙ୍କୁ ହତ୍ୟା କରାଯାଇଥିବା ନେଇ ଅଭିଯୋଗ ହୋଇଛି । ଘଟଣା ସ୍ଥଳରେ ଡଗ୍ ସ୍କୁଆଡ଼ ଓ ସାଇଣ୍ଟିଫିକ ଟିମ ପହଞ୍ଚି ଛାନବିନ କରୁଛନ୍ତି । କିଛିଦିନ ତଳେ ସଞ୍ଜିତ ଅନ୍ୟ କିଛି ଯୁବକଙ୍କ ସହିତ କୌଣସି କାରଣକୁ ନେଇ ଝଗଡା ହୋଇଥିବା ପରିବାର ଲୋକେ କହିଛନ୍ତି । ଏ ନେଇ ଏକ ମାମଲା ରୁଜୁ କରାଯାଇ ତଦନ୍ତ ଚାଲିଥିବା ବିଷୟ ସଦର ଏସଡିପିଓ ସୁପ୍ରସନ୍ନ ମଲ୍ଲିକ ପ୍ରକାଶ କରିଛନ୍ତି ।