ସଞ୍ଜୟ କୁମାର ପାଣିଗ୍ରାହୀ24/12/2023 at 2:25 AM
କନ୍ଧମାଳ:(ସଞ୍ଜୟ କୁମାର ପାଣିଗ୍ରାହୀ): କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଅନ୍ତର୍ଗତ ମାଶିରପଡା ଛକ ଠାରେ ଏକ କାର ରାସ୍ତା କଡ ଗଛରେ ବାଡେଇ ହେବା ଫଳରେ ଜଣଙ୍କ ମୃତ୍ୟୁ ହୋଇଥିବା ବେଳେ ତିନି ଜଣ ଆହତ ହୋଇଛନ୍ତି। ମୃତକ ଜଣକ ହେଲେ କ.ନୂଆଗାଁର ଜୟରାମ ପଣ୍ଡା ବୋଲି ଜଣାପଡିଛି l ପ୍ରକାଶ ଯେ, ଜୟରାମ କୌଣସି କାମରେ ସପରିବାର ଫୁଲବାଣୀ ଆସିଥିଲେ। ଅପରାହ୍ନରେ କ.ନୂଆଗାଁ ଫେରିବା ସମୟରେ ମାଶିରପଡା ଛକ ନିକଟରେ ହଠାତ ଏକ ଛେଳି ଗାଡି ଆଗକୁ ଚାଲି ଆସିଥିଲା। ଛେଳିକୁ ବଞ୍ଚାଇବାକୁ ଯାଇ ଗାଡି ଚଳାଉଥିବା ଜୟରାମଙ୍କ ପୁଅ ତଥା ଯୁବ ସାମ୍ବାଦିକ ସତ୍ୟନାରାୟଣ ପଣ୍ଡା ଭାରସାମ୍ୟ ହରାଇ ଥିଲେ। ଫଳରେ ଗାଡି ରାସ୍ତା କଡରେ ଥିବା ଏକ ଗଛରେ ବାଡେଇ ହୋଇ ଯାଇଥିଲା। ଖବର ପାଇ ଫିରିଙ୍ଗିଆ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ଆହତ ମାନଙ୍କୁ ଉଦ୍ଧାର କରି ଫିରିଙ୍ଗିଆ ମେଡିକାଲକୁ ନେଇଥିଲେ। ତେବେ ସେଠାରେ ଡାକ୍ତର ଜୟରାମଙ୍କୁ ମୃତ ଘୋଷଣା କରିଥିଲେ। ଦୁର୍ଘଟଣାରେ ସତ୍ୟନାରାୟଣଙ୍କ ସମେତ ତାଙ୍କ ମା’ ମାମୀ ପଣ୍ଡା, ଭଉଣୀ ସ୍ଵର୍ଣ୍ଣଲତା ଦାସ ଓ ଶୁଭଶ୍ରୀ ପଣ୍ଡା ଆହତ ହୋଇଛନ୍ତି। ସତ୍ୟନାରାୟଣ ଫିରିଙ୍ଗିଆ ଡାକ୍ତରଖାନାରେ ଚିକିତ୍ସିତ ହେଉଥିବା ବେଳେ ସ୍ଵର୍ଣ୍ଣଲତା ଓ ଶୁଭଶ୍ରୀଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ଫୁଲବାଣୀ ଜିଲ୍ଲା ମୂଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଫିରିଙ୍ଗିଆ ପୁଲିସ ଦୁର୍ଘଟଣା ଗ୍ରସ୍ତ କାର ଜବତ କରିବା ସହ ମୃତକଙ୍କ ଶବ ବ୍ୟବଚ୍ଛେଦ ପାଇଁ ଫୁଲବାଣୀ ପଠାଇଛି। ଏ ନେଇ ଫିରିଙ୍ଗିଆ ଥାନାରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଅବ୍ୟାହତ ରଖିଛନ୍ତି ।