ଓଡ଼ିଶା ଡଟ୍ ନ୍ୟୁଜ୍

15/07/2024 at 2:13 PM

ଗାଜିଆବାଦ: ପାର୍ଟିକୁ ଗଲେ, ନାକ ପର୍ଯ୍ୟନ୍ତ ପିଇ ମାତଲ ହେଲେ । ଆଉ ନିଶାଶକ୍ତ ଅବସ୍ଥାରେ ନିଜ ଉପରୁ ନିୟନ୍ତ୍ରଣ ହରାଇ ସର୍ଭିସ ରିଭଲଭରରୁ ଡୋ ଡୋ କରି ବିଚ୍ ରାସ୍ତାରେ ଗୁଳି ଫୁଟାଇଲେ । ଆଉ ମଦ ପିଇ ମଙ୍ଗାମା କରିବା ଓ ଗୁଳି ଫୁଟାଇବାର ଫଳ ଏବେ ପାଇଛନ୍ତି ଦୁଇ କନଷ୍ଟେବଳ । ଉଭୟଙ୍କୁ ଗିରଫ କରାଯିବା ସହ ଚାକିରିରୁ ନିଲମ୍ବିତ କରିଦିଆଯାଇଛି । ଘଟଣା ଘଟିଛି ଉତ୍ତର ପ୍ରଦେଶର ଗାଜିଆବାଦ ଅଞ୍ଚଳରେ । ଗିରଫ ଦୁଇ କନଷ୍ଟେବଳ ହେଲେ ଧୀରଜ କୁମାର ଏବଂ ମୁକୁଳ ଯାଦବ ।

ମିଳିଥିବା ସୂଚନା ଅନୁସାରେଧୀରଜ ଏବଂ କୁମୁଳ ଇନ୍ଦିରାପୁରମ୍‌ ଥାନାରେ କାର୍ଯ୍ୟରତ ଥିଲେ । ଗତକାଲି ଉଭୟ ଦିଲ୍ଲୀ ଗାର୍ଡେନ ଗଲେରିୟା ମଲ୍‌କୁ ଏକ ପାର୍ଟିରେ ଯୋଗ ଦେବାକୁ ଯାଇଥିଲେ । ସେଠାରୁ ଫେରିବା ବେଳେ ଉଭୟ ନିଶାସକ୍ତ ଅବସ୍ଥାରେ ଥିଲେ । ନିଶାରେ ମାତାଲ ହୋଇ ନିଜ ଉପରେ ନିୟନ୍ତ୍ରଣ ନ ଥିବା ବେଳେ ସେମାନେ ପାଖରେ ଥିବା ସର୍ଭିସ ରିଭଲଭର ଫୁଟାଇଥିଲେ ।

ଏଥିରେ କେହି ମୃତାହତ ହୋଇ ନଥିବା ବେଳେ ଗୁଳି ଶବ୍ଦ ଶୁଣି ଲୋକେ ଭୟଭୀତ ହୋଇ ଦୌଡ଼ିବାକୁ ଲାଗିଲେ। ପରେ ଉଭୟ ଘଟଣାସ୍ଥଳରୁ ଫେରାର ହୋଇ ଯାଇଥିଲେ । ଏନେଇ ଅଭିଯୋଗ ହେବା ପରେ ପୋଲିସ୍‌ ସିସିଟିଭି ଫୁଟେଜ ତଦାରଖ କରି ଉଭୟଙ୍କୁ ଚିହ୍ନଟ କରିଥିଲା । ଏହାପରେ ବହୁ ଖୋଜାଖୋଜି କରି ଉଭୟଙ୍କୁ ଗିରଫ କରାଯିବା ସହ ନିଲମ୍ବନ କରାଯାଇଛି ।