ଓଡ଼ିଶା ଡଟ୍ ନ୍ୟୁଜ୍

10/01/2025 at 1:16 PM

କଳାହାଣ୍ଡି: ଜୁନାଗଡ଼ ଥାନା ବଳଧିଆମାଳ ନିକଟ ୨୬ ନମ୍ବର ଜାତୀୟ ରାଜପଥରେ ଚଳନ୍ତା ବସ୍ରେ ଲାଗିଲା ନିଆଁ । ଗତ ରାତି ପ୍ରାୟ ୯ଟା ବେଳେ ବସଟି ଉକ୍ତ ସ୍ଥାନ ଅତିକ୍ରମ କରୁଥିବା ବେଳେ ନିଆଁ ଲାଗି ଯାଇଥିଲା । ନିଆଁରେ ବସଟି ସମ୍ପୂର୍ଣ୍ଣ ଜଳି ଯାଇଛି । ତେବେ ନିଆଁର ପ୍ରକୋପ ଭୟାବହ ହେବା ପୂର୍ବରୁ ସ୍ଥାନୀୟ ଲୋକେ ସମସ୍ତ ଯାତ୍ରୀଙ୍କୁ ସୁରକ୍ଷିତ ଉଦ୍ଧାର କରି ନେଇଥିଲେ । ଫଳରେ କୌଣସି ଜୀବନ ହାନୀ ହୋଇନି ।

‘ଗୌରବ’ ନାମକ ଘରୋଇ ବସ୍‌ଟି କୋରାପୁଟର ଦାମନଯୋଡ଼ିରୁ ରାଉରକେଲା ଅଭିମୁଖେ ଯାଉଥିଲା । ବସ୍‌ରେ ପ୍ରାୟ ୪୦ ଯାତ୍ରୀ ଥିଲେ । ବସ୍‌ଟି ବଳଧିଆମାଳ ଛକ ନିକଟରେ ହୋଇଥିବା ବେଳେ ଏଥିରୁ ଧୂଆଁ ବାହାରୁଥିବା ଡ୍ରାଇଭର ଦେଖିବାକୁ ପାଇଥିଲେ । ସେ ସଙ୍ଗେ ସଙ୍ଗେ ବସ୍‌କୁ ଅଟକାଇ ଓହ୍ଲାଇ ପଡ଼ିଥିଲେ । ଏହାପରେ ବସ କର୍ମଚାରୀ ଓ ସ୍ଥାନୀୟ ଲୋକେ ମିଶି ସମସ୍ତ ଯାତ୍ରୀଙ୍କୁ ବସ୍ରୁ ବାହାର କରି ନେଇଥିଲେ । ବସ୍‌ରୁ ଯାତ୍ରୀମାନେ ଓହ୍ଲାଇବାର ମାତ୍ର ୪ରୁ ୫ ମିନିଟ୍ ଭିତରେ ସେଥିରେ ନିଆଁ ଲାଗି ଯାଇଥିଲା । ଦେଖୁ ଦେଖୁ ନିଆଁ ପୂରା ବସ୍‌କୁ ବ୍ୟାପୀ ଯାଇଥିଲା । ବସଟିରେ ନିଆଁ ଲାଗିବାର ଦୃଶ୍ୟ ବେଶ୍ ଭୟଙ୍କର ଥିଲା । ବସଟି ସଂପୂର୍ଣ୍ଣ ନଷ୍ଟ ହୋଇଯାଇଛି । ବହୁ ଯାତ୍ରୀଙ୍କ ଜିନିଷପତ୍ର ପୋଡ଼ି ପାଉଁଶ ହୋଇଯାଇଛି । ବସ୍‌ରେ ନିଆଁ ଲାଗିଥିବା ଖବର ପାଇ ଜୁନାଗଡ଼ ଓ ଧର୍ମଗଡ଼ରୁ ଦମକଳ ବାହିନୀ ଆସି ନିଆଁକୁ ଆୟତ୍ତ କରିଥିଲେ ।