ସୌମିତ୍ରି ମେହେର10/01/2025 at 5:27 PM
ବୀରମହାରାଜପୁର : (ସୌମିତ୍ରି ମେହେର) ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ସଦର ମହକୁମା ସ୍ଥିତ ଅବସରପ୍ରାପ୍ତ ସରକାରୀ କର୍ମଚାରୀ ଓ ବରିଷ୍ଠ ନାଗରିକ ସଂଗଠନ କାର୍ଯ୍ୟାଳୟ ପରିସରରେ ଅନୁଷ୍ଠାନର ସଭାପତି ଡ.ପ୍ରଫୁଲ୍ଲ କୁମାର ରଥଙ୍କ ସଭାପତିତ୍ବରେ ଏକ ସାଧାରଣ ବୈଠକ ଅନୁଷ୍ଠିତ ହୋଇଯାଇଛି । ପ୍ରାରମ୍ଭରେ ସଂପାଦକ ସନ୍ତୋଷ କୁମାର ଷଡ଼ଙ୍ଗୀ ସମସ୍ତଙ୍କୁ ସ୍ବାଗତ କରିବା ସଙ୍ଗେ ସଙ୍ଗେ ଅନୁଷ୍ଠାନର ବାର୍ଷିକ ଉତ୍ସବ ପାଳନ ସଂକ୍ରାନ୍ତୀୟ କାର୍ଯ୍ୟକ୍ରମ ଉପସ୍ଥାପନ କରିଥିଲେ । ଆଗାମୀ ଜାନୁଆରୀ ୧୮ତାରିଖରେ ହେବାକୁ ଥିବା ଏହି ବାର୍ଷିକୋତ୍ସବ ସଂପର୍କରେ ଉପସ୍ଥିତ ସମସ୍ତ ସଦସ୍ୟ ଆଲୋଚନା କରିଥିଲେ । ପ୍ରତିବର୍ଷ ଭଳି ସମାଜ ପ୍ରତି ଅବଦାନ ଥିବା ଅଞ୍ଚଳ ର ବିଶିଷ୍ଟ ବ୍ୟକ୍ତି ବିଶେଷଙ୍କୁ ସମ୍ବର୍ଦ୍ଧିତ କରିବା ପାଇଁ ଏକ ଚୟନ କମିଟି ଗଠନ କରା ଯାଇଥିଲା । ଏହି କମିଟିରେ କୃଷ୍ଣଚନ୍ଦ୍ର ପାଢ଼ୀ, ଗୋପିନାଥ ମହାକୁର , ଭଗବାନ ମିଶ୍ର , ସୌମିତ୍ରି ମେହେର ପ୍ରମୁଖ ଙ୍କୁ ଦାୟିତ୍ଵ ଅର୍ପଣ କରା ଯାଇଥିଲା । ସେମାନଙ୍କ ସୁପାରିଶ କ୍ରମେ ଚଳିତ ବର୍ଷ ଚମ୍ପାମାଳର ଖତୁ ପ୍ରସାଦ ହୋତାଙ୍କୁ କଳା କ୍ଷେତ୍ରରେ ବିଶେଷ ଅବଦାନ ପାଇଁ ଏବଂ ବାଗବରର ବ୍ରଜକୃଷ୍ଣ ପଣ୍ଡାଙ୍କୁ ସଂଗୀତ କ୍ଷେତ୍ରରେ ଅବଦାନ ପାଇଁ ସମ୍ବର୍ଦ୍ଧିତ କରାଯିବାକୁ ନିଷ୍ପତ୍ତି ଗ୍ରହଣ କରାଯାଇଛି । କୋଷାଧ୍ୟକ୍ଷ ଦୟାନିଧି ହୋତା ଉତ୍ସବର ଆୟବ୍ୟୟ ର ଏକ ଅଟକଳ ଉପସ୍ଥାପନ କରିଥିଲେ । ଏହି ବୈଠକରେ ବଳରାମ କାଣ୍ଡ , ତ୍ରିନାଥ ମିଶ୍ର , ସୁରୁ ସାହୁ , ନାରାୟଣ ପ୍ରସାଦ ନାୟକ ପ୍ରମୁଖ ମନ୍ତବ୍ୟ ପ୍ରଦାନ କରିଥିଲେ । ମୁଖ୍ୟ ବକ୍ତା ଭାବରେ ଇଂ. ଡ.ସଞ୍ଜୟ କୁମାର ପଣ୍ଡା ଙ୍କୁ ନିମନ୍ତ୍ରଣ କରିବା ପାଇଁ ନିଷ୍ପତ୍ତି ଗ୍ରହଣ କରା ଯାଇଛି । ଶେଷରେ ଡ.ଦ୍ବିତୀକୃଷ୍ଣ ପଣ୍ଡା ଧନ୍ୟବାଦ ଅର୍ପଣ କରିଥିଲେ।