ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

13/07/2025 at 11:55 AM

କରାଚୀ: ପାକିସ୍ତାନରେ ରାଜନୈତିକ ଅସ୍ଥିରତା ବିଷୟରେ ନିରନ୍ତର କଳ୍ପନାଜଳ୍ପନା ଚାଲିଛି। କ୍ଷମତା ପରିବର୍ତ୍ତନର ସମ୍ଭାବନା ମଧ୍ୟରେ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫ ଭାରତ ସହିତ ସାମ୍ପ୍ରତିକ ସଂଘର୍ଷ ସମୟରେ ପରମାଣୁ ଅସ୍ତ୍ର ବ୍ୟବହାରର ସମ୍ଭାବନାକୁ ଖାରଜ କରିଦେଇଛନ୍ତି।

ସେ କହିଛନ୍ତି ଯେ ତାଙ୍କ ଦେଶର ପରମାଣୁ କାର୍ଯ୍ୟକ୍ରମ “ଶାନ୍ତିପୂର୍ଣ୍ଣ କାର୍ଯ୍ୟକଳାପ ଏବଂ ଆତ୍ମରକ୍ଷା” ପାଇଁ। ଶରିଫ ଶନିବାର ରାଜଧାନୀ ଇସଲାମାବାଦରେ ପାକିସ୍ତାନୀ ଛାତ୍ରଙ୍କ ଏକ ଗୋଷ୍ଠୀକୁ ସମ୍ବୋଧିତ କରିବା ସମୟରେ ଏହି ମନ୍ତବ୍ୟ ଦେଇଥିଲେ। ମେ ମାସରେ ହୋଇଥିବା ୪ ଦିନିଆ ସାମରିକ ସଂଘର୍ଷକୁ ଉଲ୍ଲେଖ କରି ପ୍ରଧାନମନ୍ତ୍ରୀ ସରିଫ କହିଛନ୍ତି ଯେ ଭାରତୀୟ ସାମରିକ ଆକ୍ରମଣରେ ୫୫ ଜଣ ପାକିସ୍ତାନୀ ନାଗରିକଙ୍କ ମୃତ୍ୟୁ ହୋଇଥିଲା। ତଥାପି ସେ ଜୋର ଦେଇ କହିଛନ୍ତି ଯେ ପାକିସ୍ତାନ ଏହି ଆକ୍ରମଣର ପୂର୍ଣ୍ଣ ବଳରେ ଜବାବ ଦେଇଛି।

ସଂଘର୍ଷ ସମୟରେ ପରମାଣୁ ଅସ୍ତ୍ର ବ୍ୟବହାରର ସମ୍ଭାବନା ବିଷୟରେ ପଚରାଯିବାରୁ ପ୍ରଧାନମନ୍ତ୍ରୀ ସରିଫ କହିଛନ୍ତି, “ପାକିସ୍ତାନର ପରମାଣୁ କାର୍ଯ୍ୟକ୍ରମ ସମ୍ପୂର୍ଣ୍ଣ ଶାନ୍ତିପୂର୍ଣ୍ଣ ଉଦ୍ଦେଶ୍ୟ ଏବଂ ଦେଶର ପ୍ରତିରକ୍ଷା ପାଇଁ ଆକ୍ରମଣ ପାଇଁ ନୁହେଁ।”