ବସରେ ନିଆଁ ଲାଗି ୪୨ ଭାରତୀୟ ମୃତ, ହେଲ୍ପଲାଇନ୍ ନ° ଜାରି
ନୂଆଦିଲ୍ଲୀ: ସୋମବାର ସାଉଦି ଆରବରେ ଏକ ସଡ଼କ ଦୁର୍ଘଟଣାରେ ୪୨ ଭାରତୀୟଙ୍କ ମୃତ୍ୟୁ ଘଟିଛି। ମକ୍କାରୁ ମଦିନା ଯାଉଥିବା ଏକ ବସ୍ ଆଉ ଏକ ଡିଜେଲ ଟ୍ୟାଙ୍କର ସହିତ ଧକ୍କା ହେବାରୁ ନିଆଁ ଲାଗିଯାଇଛି। ମୃତକଙ୍କ ମଧ୍ୟରେ ୨୦ ଜଣ ମହିଳା ଏବଂ ୧୧ଜଣ ଶିଶୁ ଥିଲେ।
ରିପୋର୍ଟ ଅନୁଯାୟୀ, କେବଳ ବସ୍ ଡ୍ରାଇଭର ଏହି ଦୁର୍ଘଟଣାରୁ ବଞ୍ଚି ଯାଇଛନ୍ତି। ମୃତକଙ୍କ ମଧ୍ୟରୁ ଅଧିକାଂଶ ହାଇଦ୍ରାବାଦର ବୋଲି କୁହାଯାଉଛି। ମଦିନାରୁ ପ୍ରାୟ ୧୬୦ କିଲୋମିଟର ଦୂରରେ ମୁହରାସ ନିକଟରେ ଭାରତୀୟ ମାନକ ସମୟ (IST) ପ୍ରାୟ ୧:୩୦ରେ ଦୁର୍ଘଟଣା ଘଟିଥିଲା। ସେହି ସମୟରେ ଅନେକ ଯାତ୍ରୀ ଶୋଇଥିଲେ ଏବଂ ସେମାନଙ୍କର ବଞ୍ଚିବାର କୌଣସି ସମ୍ଭାବନା ନଥିଲା।
ଏହି ଘଟଣା ପରେ ତେଲେଙ୍ଗାନା ସରକାର ରିୟାଦରେ ଥିବା ଭାରତୀୟ ଦୂତାବାସ ସହିତ ଯୋଗାଯୋଗରେ ଅଛି। ରାଜ୍ୟ ସରକାରଙ୍କ ଦ୍ୱାରା ଜାରି ଏକ ବିବୃତ୍ତିରେ କୁହାଯାଇଛି ଯେ ମୁଖ୍ୟମନ୍ତ୍ରୀ ରେୱନ୍ତ ରେଡ୍ଡି ଦିଲ୍ଲୀର ଅଧିକାରୀମାନଙ୍କୁ ପୀଡିତମାନଙ୍କୁ ଚିହ୍ନଟ କରିବା ଏବଂ ଅନ୍ୟାନ୍ୟ ଔପଚାରିକତାରେ ସହାୟତା କରିବା ପାଇଁ ଦୂତାବାସ ସହିତ ଘନିଷ୍ଠ ଭାବରେ ସମନ୍ୱୟ ସ୍ଥାପନ କରିବାକୁ ନିର୍ଦ୍ଦେଶ ଦେଇଛନ୍ତି। ସେହିପରି ଜେଦ୍ଦାହରେ ଥିବା ଭାରତୀୟ ଦୂତାବାସ ଏକ ହେଲ୍ପଲାଇନ୍ ନ° ଆରମ୍ଭ କରିଛି।
ଦୂତାବାସ କହିଛି, “ସାଉଦି ଆରବର ମଦିନା ନିକଟରେ ଭାରତୀୟ ଉମରାହ ତୀର୍ଥଯାତ୍ରୀଙ୍କ ସହିତ ଘଟିଥିବା ଦୁଃଖଦ ବସ୍ ଦୁର୍ଘଟଣାକୁ ଦୃଷ୍ଟିରେ ରଖି ଜେଦ୍ଦାସ୍ଥିତ ଭାରତୀୟ କନସୁଲେଟ୍ ଜେନେରାଲରେ ଏକ 24×7 ନିୟନ୍ତ୍ରଣ କକ୍ଷ ସ୍ଥାପନ କରାଯାଇଛି। ହେଲ୍ପଲାଇନ୍ ଯୋଗାଯୋଗ ବିବରଣୀ ହେଉଛି 8002440003।” ଘଟଣା ପରେ, ତେଲେଙ୍ଗାନା ସରକାର ସଚିବାଳୟରେ ଏକ ନିୟନ୍ତ୍ରଣ କକ୍ଷ ସ୍ଥାପନ କରିଛନ୍ତି ଯାହା ଦ୍ଵାରା ପରିବାରମାନେ ସେମାନଙ୍କ ପ୍ରିୟଜନଙ୍କ ବିଷୟରେ ସୂଚନା ପାଇପାରିବେ। ପରିବାର ସଦସ୍ୟମାନେ ଏହି ନମ୍ବରଗୁଡ଼ିକରେ ଯୋଗାଯୋଗ କରିପାରିବେ: 79979-59754 ଏବଂ 99129-19545।
