ବ୍ଲୁ ଡ୍ରମ୍ ହତ୍ୟା ମାମଲା; କନ୍ୟା ସନ୍ତାନ ଜନ୍ମ ଦେଲା ଅଭିଯୁକ୍ତ ମୁସ୍କାନ
ମେରଠ: ଉତ୍ତର ପ୍ରଦେଶର ମେରଠରେ କୁଖ୍ୟାତ ବ୍ଲୁ ଡ୍ରମ୍ ହତ୍ୟା ମାମଲାରେ ଜେଲରେ ଥିବା ଅଭିଯୁକ୍ତ ମୁସ୍କାନ ରସ୍ତୋଗୀ ମା ହୋଇଛନ୍ତି। ଶନିବାର ବିଳମ୍ବିତ ରାତିରେ ପେଟରେ ପ୍ରବଳ ଯନ୍ତ୍ରଣା ଅନୁଭବ କରିବା ପରେ ତାଙ୍କୁ ମେଡିକାଲ କଲେଜକୁ ନିଆଯାଇଥିଲା, ଯେଉଁଠାରେ ଡାକ୍ତରମାନେ ରବିବାର ସକାଳ 6:50 ରେ ତାଙ୍କର ସାଧାରଣ ପ୍ରସବ କରିଥିଲେ। ଶିଶୁଟିର ଓଜନ 2.5 କିଲୋଗ୍ରାମ ଥିଲା। ଡାକ୍ତରଙ୍କ ଅନୁଯାୟୀ, ମାଆ ଏବଂ ପିଲା ଉଭୟ ସମ୍ପୂର୍ଣ୍ଣ ସୁସ୍ଥ ଅଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଯାହାଙ୍କ ହତ୍ୟା ପାଇଁ ମୁସ୍କାନ ଜେଲରେ ଅଛନ୍ତି, ତାଙ୍କ ସ୍ୱାମୀ ସୌରଭ ରାଜପୁତଙ୍କ ଜନ୍ମ ଦିନ ନଭେମ୍ବର ୨୪ରେ ପଡ଼ିଥାଏ। ଆଉ ସୌରଭଙ୍କ ଜନ୍ମଦିନରେ ମୁସ୍କାନ ତାଙ୍କର ଦ୍ୱିତୀୟ କନ୍ୟାକୁ ଜନ୍ମ ଦେଇଥିଲେ।
ଦ୍ୱିତୀୟ କନ୍ୟାକୁ ଜନ୍ମ ଦେବା
ମୁସ୍କାନଙ୍କ ପ୍ରଥମ କନ୍ୟା ପିହୁ ବର୍ତ୍ତମାନ ସୌରଭଙ୍କ ପିତାମାତାଙ୍କ ସହିତ ରହୁଛନ୍ତି। ଯେତେବେଳେ ପୋଲିସ ମୁସ୍କାନଙ୍କୁ ତାଙ୍କ ପ୍ରେମିକ ସାହିଲ ସହିତ ଗିରଫ କରିଥିଲା ସେତେବେଳେ ସେ ଦେଢ଼ ମାସର ଗର୍ଭବତୀ ଥିଲେ। ରବିବାର ରାତିରେ ହଠାତ୍ ଯନ୍ତ୍ରଣା ବଢ଼ିବା ପରେ ତାଙ୍କୁ ମେଡିକାଲ କଲେଜକୁ ରେଫର କରାଯାଇଥିଲା। ସ୍ତ୍ରୀ ରୋଗ ବିଭାଗର ମୁଖ୍ୟ ଡାକ୍ତର ଶାଗୁନ ଏବଂ ପାଞ୍ଚ ଜଣିଆ ଡାକ୍ତରୀ ଦଳ ତାଙ୍କର ସୁରକ୍ଷିତ ସାଧାରଣ ପ୍ରସବ କରିଥିଲେ।
ଏନେଇ ସୌରଭଙ୍କ ବଡ଼ ଭାଇ ରାହୁଲ କହିଛନ୍ତି, “ଆମେ ପିଲାଟିର ଡିଏନଏ ପରୀକ୍ଷା କରିବୁ। ଯଦି ପିଲାଟି ମୋ ଭାଇର, ତେବେ ଆମେ ତାକୁ ପୋଷ୍ୟ ଗ୍ରହଣ କରିବୁ।” ଆମେ ଏହି ମାମଲାରେ ଏବେ ବି ଭାବପ୍ରବଣ, କିନ୍ତୁ ପିଲାଟିର ଦାୟିତ୍ୱ ନେବାକୁ ପଛଘୁଞ୍ଚା ଦେବୁ ନାହିଁ।
ତେବେ ମୁସ୍କାନ ରସ୍ତୋଗୀ ଏବଂ ତାଙ୍କ ପ୍ରେମିକ ସାହିଲ ମିଶି ତାଙ୍କ ସ୍ୱାମୀ ସୌରଭ ରାଜପୁତଙ୍କୁ ହତ୍ୟା କରିଥିବା ଅଭିଯୋଗ ହୋଇଥିଲା। ପୋଲିସର ସୂଚନା ଅନୁଯାୟୀ, ହତ୍ୟା ପରେ ସୌରଭଙ୍କ ମୃତଦେହକୁ ଏକ ନୀଳ ପ୍ଲାଷ୍ଟିକ୍ ଡ୍ରମରେ ଭର୍ତ୍ତି କରାଯାଇଥିଲା। ଡ୍ରମକୁ ଲୁଚାଇ ମୃତଦେହକୁ ଫିଙ୍ଗି ଦେବାକୁ ଚେଷ୍ଟା କରାଯାଇଥିଲା। ମାମଲା ସାମ୍ନାକୁ ଆସିବା ପରେ ମୁସ୍କାନ ଏବଂ ସାହିଲଙ୍କୁ ଗିରଫ କରାଯାଇଥିଲା। ଉଭୟେ ବର୍ତ୍ତମାନ ନ୍ୟାୟିକ ହେପାଜତରେ ଅଛନ୍ତି।
ଗିରଫ ହେବା ସମୟରେ ମୁସ୍କାନଙ୍କ ଗର୍ଭବତୀ ଥିବା ଜଣାପଡ଼ିଥିଲା। ସେ ବର୍ତ୍ତମାନ ହସ୍ପିଟାଲରେ ସ୍ୱତନ୍ତ୍ର ପର୍ଯ୍ୟବେକ୍ଷଣରେ ଅଛନ୍ତି। ହସ୍ପିଟାଲ ପ୍ରଶାସନର ସୂଚନା ଅନୁଯାୟୀ, ମୁସ୍କାନଙ୍କୁ ଏକ ସ୍ୱତନ୍ତ୍ର ମହିଳା ୱାର୍ଡରେ ରଖାଯାଇଛି। ସୁରକ୍ଷା ଦୃଷ୍ଟିରୁ ସାଧାରଣ ଲୋକଙ୍କ ପ୍ରବେଶ କଡ଼ାକଡ଼ି ନିଷେଧ। ଡାକ୍ତରୀ ଦଳ ତାଙ୍କ ସ୍ୱାସ୍ଥ୍ୟ ଉପରେ ନିରନ୍ତର ନଜର ରଖୁଛନ୍ତି।
