୨୦୨୬ ମାର୍ଚ୍ଚ ସୁଦ୍ଧା ସବୁ ପିଏମ୍ଶ୍ରୀ ବିଦ୍ୟାଳୟରେ ଲାଗିବ ସିସିଟିଭି: ଗଣଶିକ୍ଷା ମନ୍ତ୍ରୀ
ଭୁବନେଶ୍ବର,୨୯|୧୧: ଗତକାଲି ବିଧାନସଭାରେ ଶୀତ ଅଧିବେଶନର ଦ୍ଵିତୀୟ ଦିନ ଥିଲା | ଅଧିବେଶନରେ ପ୍ରଶ୍ନକାଳରେ ବିଭିନ୍ନ ଗୁରୁତ୍ୱପୂର୍ଣ୍ଣ ବିଷୟ ଉପରେ ଶାସକ ଏବଂ ବିରୋଧୀ ଦଳ ମଧ୍ୟରେ ଆଲୋଚନା ହୋଇଥିଲା | ତେବେ ପ୍ରଶ୍ନକାଳ ସମୟରେ ବିଧାୟକ ଟଙ୍କଧର ତ୍ରିପାଠୀଙ୍କ ପ୍ରଶ୍ନର ଉତ୍ତର ଦେବାକୁ ଯାଇ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ କହିଛନ୍ତି ଯେ, ରାଜ୍ୟର ସରକାରୀ ହାଇସ୍କୁଲ ଓ କେନ୍ଦ୍ରୀୟ ବିଦ୍ୟାଳୟର ମୋଟ ୧୩ହଜାର ୪୧୩ଜଣ ବିଦ୍ୟାର୍ଥୀ ୯ମ ଶ୍ରେଣୀ ପାସ୍ କରିପାରି ନାହାନ୍ତି। ନବମରେ ଫେଲ୍ ହୋଇ ସେମାନେ ପୁଣିଥରେ ଶିକ୍ଷା ଗ୍ରହଣ କରୁଛନ୍ତି। ଚଳିତବର୍ଷ ରାଜ୍ୟ ସରକାରୀ ହାଇସ୍କୁଲର ନବମ ଶ୍ରେଣୀରେ ପରୀକ୍ଷା ଦେଇଥିବା ୩ଲକ୍ଷ ୮୬ହଜାର ୭୮୬ଜଣଙ୍କ ମଧ୍ୟରୁ ୧୨ହଜାର ୭୫୬ଜଣ ଫେଲ୍ ହୋଇଥିଲେ। ସେମାନଙ୍କ ମଧ୍ୟରୁ ଦ୍ବିତୀୟ ଥରରେ ପରୀକ୍ଷା ଦେଇ ୫ହଜାର ୩୪୧ ଜଣ ପାସ୍ କରିଛନ୍ତି। ୭ହଜାର ୪୧୫ଜଣ ଦ୍ବିତୀୟ ଥର ପରୀକ୍ଷା ନ ଦେଇ ଫେଲ୍ ହୋଇଛନ୍ତି। ଅନୁରୂପ ଭାବେ କେନ୍ଦ୍ରୀୟ ବିଦ୍ୟାଳୟଗୁଡ଼ିକରେ ୯ମ ପରୀକ୍ଷା ଦେଇଥିବା ୮,୮୧୫ ଛାତ୍ରଛାତ୍ରୀଙ୍କ ମଧ୍ୟରୁ ୬୫୭ଜଣ ଫେଲ୍ ହୋଇଥିଲେ। ୫୨୭ଜଣ ଦ୍ବିତୀୟ ଥର ପରୀକ୍ଷା ଦେଇ ପାସ୍ କରିଥିବା ବେଳେ ୧୦୦ ଜଣ ପରୀକ୍ଷା ନ ଦେଇ ଫେଲ୍ ହୋଇଛନ୍ତି।
ବିଜେଡି ବିଧାୟକ ଅରୁଣ କୁମାର ସାହୁ ପ୍ରଶ୍ନକାଳ ସମୟରେ ବେସରକାରୀ ଅନୁଦାନପ୍ରାପ୍ତ ଡିଗ୍ରି କଲେଜ ଗୁଡ଼ିକରେ ଅଧ୍ୟାପକଙ୍କ ପଦବୀ ଖାଲି ପଡିଥିବା ଉପରେ ପ୍ରଶ୍ନ କରିଥିଲେ | ଯାହାର ଉତ୍ତର ଦେବାକୁ ଯାଇ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଏହି ସୂଚନା ଦେଇ କହିଛନ୍ତି ଯେ, ବେସରକାରୀ ଶିକ୍ଷାନୁଷ୍ଠାନ ଗୁଡିକରେ ମୋଟ ଅନୁମୋଦିତ ଅଧ୍ୟାପକ ସଂଖ୍ୟା ୭,୧୧୦। ସେଥିମଧ୍ୟରୁ ଏପର୍ଯ୍ୟନ୍ତ ଖାଲିପଡ଼ିଥିବା ଅଧ୍ୟାପକଙ୍କ ସଂଖ୍ୟା ହେଉଛି ୧,୬୮୯ ଏବଂ ୩୦୦ଜଣ ଅଧ୍ୟାପକ ସ୍କୁଲ ଓ ଗଣଶିକ୍ଷା ବିଭାଗରେ ଡେପ୍ଲଏମେଣ୍ଟରେ କାର୍ଯ୍ୟରତ ଅଛନ୍ତି। ୨୦୨୬ ଡିସେମ୍ବର ସୁଦ୍ଧା ୪୨୩ଜଣ ରିଡର ଅବସର ଗ୍ରହଣ କରିବେ। ସେହିପରି ରାଜ୍ୟର ସରକାରୀ ଡିଗ୍ରି ମହାବିଦ୍ୟାଳୟରେ ଶିକ୍ଷାଦାନ ପ୍ରକ୍ରିୟା ଜାରି ରଖିବାକୁ ୩୪ଜଣ ଅବସରପ୍ରାପ୍ତ ଅଧ୍ୟାପକଙ୍କୁ ଅତିଥି ଅଧ୍ୟାପକ ଭାବେ ପୁଣିଥରେ ଦିଆଯାଇଛି। ଏବେ ସୁଦ୍ଧା ୭୬୬ଟି ଅଧ୍ୟାପକ ପଦବି ଖାଲିପଡ଼ିଛି। ତେବେ ୨୦୨୬ ଡିସେମ୍ବର ସୁଦ୍ଧା ୪୨ଜଣ ଅଧ୍ୟାପକ ଅବସର ଗ୍ରହଣ କରିବେ ବୋଲି ଉଚ୍ଚଶିକ୍ଷା ମନ୍ତ୍ରୀ କହିଛନ୍ତି |
୨୦୨୬ ମାର୍ଚ୍ଚ ସୁଦ୍ଧା ସବୁ ପିଏମ୍ଶ୍ରୀ ବିଦ୍ୟାଳୟରେ ଲାଗିବ ସିସିଟିଭି କ୍ୟାମେରା | ଏନେଇ ସୂଚନା ଦେଇଛନ୍ତି ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ | ବିଧାୟିକା ସୁବାସିନୀ ଜେନାଙ୍କ ଏକ ପ୍ରଶ୍ନର ଉତ୍ତର ଦେବାକୁ ଯାଇ ସେ କହିଛନ୍ତି ଯେ , ପିଏମ୍ଶ୍ରୀ ଯୋଜନାରେ ଅନ୍ତର୍ଭୁକ୍ତ ହୋଇଥିବା ରାଜ୍ୟର ୭୩୬ଟି ହାଇସ୍କୁଲକୁ ସାମିଲ କରାଯାଇଛି | ଗଞ୍ଜାମ ଜିଲ୍ଲାରେ ସର୍ବାଧିକ ୬୮ଟି ହାଇସ୍କୁଲ ରହିଥିବା ବେଳେ ମୟୂରଭଞ୍ଜରେ ୪୬, ସୁନ୍ଦରଗଡ଼ରେ ୩୬, ବଲାଙ୍ଗୀରରେ ୩୪, କେନ୍ଦୁଝରରେ ୩୪, କଟକରେ ୩୩, ଝାରସୁଗୁଡ଼ାରେ ୩୦ଟି ବିଦ୍ୟାଳୟ ରହିଛି। ୨୦୨୫-୨୬ ଆର୍ଥିକ ବର୍ଷରେ ଏହି ଯୋଜନାରେ ୭୬୨ ବିଦ୍ୟାଳୟ ପାଇଁ ୭୪,୮୬୦.୫୨ ଲକ୍ଷ ଟଙ୍କା ମଞ୍ଜୁର ହୋଇଛି।
ଅଧିବେଶନରେ ପ୍ରଶ୍ନକାଳ ସମୟରେ ବିଧାୟକ କଳିକେଶ ନାରାୟଣ ସିଂଦେଓ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜଙ୍କୁ ଏକ ପ୍ରଶ୍ନ ପଚାରିଥିଲେ | ଯାହାର ଉତ୍ତର ଦେଇଛନ୍ତି ଉଚ୍ଚ ଶିକ୍ଷାମନ୍ତ୍ରୀ ଏବଂ ତାଙ୍କ ଉତ୍ତରରେ କହିଛନ୍ତି ଯେ, ଉଚ୍ଚଶିକ୍ଷା ବିଭାଗ ଅଧୀନ କୌଣସି ଶିକ୍ଷାନୁଷ୍ଠାନରେ ନାବାଳିକା ଶିଶୁ ଜନ୍ମ କରିବା ଘଟଣା ସାମ୍ନାକୁ ଆସିନାହିଁ। ତେବେ ଯୌନ ନିର୍ଯାତନା ସମ୍ପର୍କରେ ବିଭିନ୍ନ ମହାବିଦ୍ୟାଳୟରୁ ୫ଟି ଅଭିଯୋଗ ଆସିଛି। ତତ୍କ୍ଷଣାତ୍ ଅଭିଯୋଗଗୁଡ଼ିକର ତଦନ୍ତ କରାଯିବା ସହ କାର୍ଯ୍ୟାନୁଷ୍ଠାନ ମଧ୍ୟ ନିଆଯାଇଛି | ରାଉରକେଲା ସରକାରୀ ସ୍ବୟଂଶାସିତ ମହାବିଦ୍ୟାଳୟ, ଫକୀରମୋହନ ସ୍ବୟଂଶାସିତ ମହାବିଦ୍ୟାଳୟ, ଗଙ୍ଗାଧର ମେହେର ବିଶ୍ବବିଦ୍ୟାଳୟ, ଯାଜପୁର ବାଲିଆସ୍ଥିତ ଅଭିମନ୍ୟୁ ସାମନ୍ତସିଂହାର ଡିଗ୍ରି କଲେଜ ଓ ଅନୁଗୁଳ ଜିଲ୍ଲା ଆଠମଲ୍ଲିକ କଲେଜରୁ ଯୌନ ନିର୍ଯାତନା ଅଭିଯୋଗ ଆସିବା ପରେ କାର୍ଯ୍ୟାନୁଷ୍ଠାନ ନିଆଯାଇଛି।
ସେହିପରି ବିଧାୟକ ଅଶ୍ବିନୀ କୁମାର ପାତ୍ରଙ୍କ ଏକ ପ୍ରଶ୍ନରେ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଉତ୍ତର ଦେଇ କହିଛନ୍ତି ଯେ, ରାଜ୍ୟରେ ମୋଟ ୪,୮୪୯ ସରକାରୀ ଉଚ୍ଚ ବିଦ୍ୟାଳୟ ତଥା ହାଇସ୍କୁଲ ରହିଛି। ସେଥିମଧ୍ୟରୁ ଏପର୍ଯ୍ୟନ୍ତ ୨,୫୮୫ଟି ବିଦ୍ୟାଳୟରେ ପ୍ରଧାନଶିକ୍ଷକ ପଦବି ଖାଲି ପଡ଼ିଛି। ପଦବୀଗୁଡ଼ିକ ପୂରଣ କରିବାକୁ ପ୍ରକ୍ରିୟା ଜାରି ରହିଛି ବୋଲି ଗଣଶିକ୍ଷା ମନ୍ତ୍ରୀ କହିଛନ୍ତି |
ପିଜିଟି, ଟିଜିଟି ଓ ଅନ୍ୟାନ୍ୟ ବର୍ଗର ଶିକ୍ଷକ ପଦବୀ ଖାଲି ରହିଥିବା ନେଇ ବିଧାୟିକ ସୁବାସିନୀ ଜେନା ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ପ୍ରଶ୍ନକାଳ ସମୟରେ ଉଠାଇଥିଲେ। ଯାହାର ଉତ୍ତରରେ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଉତ୍ତର ଦେଇ କହିଛନ୍ତି, ରାଜ୍ୟର ୩୦ଟି ଜିଲ୍ଲାରେ ସମୁଦାୟ ୩୧୫ଟି ଆଦର୍ଶ ବିଦ୍ୟାଳୟ ରହିଛି। ସେହି ବିଦ୍ୟାଳୟଗୁଡ଼ିକରେ ୧ଲକ୍ଷ ୨୪ ହଜାର ୫୯ଜଣ ଛାତ୍ରଛାତ୍ରୀ ପଢ଼ୁଛନ୍ତି। ଛାତ୍ରଛାତ୍ରୀଙ୍କୁ ପଢ଼ାଇବାକୁ ୭ହଜାର ୩୬ ଶିକ୍ଷକ ପଦବି ମଞ୍ଜୁର ହୋଇଛି। ସେଥିରୁ ୨,୪୬୭ ଶିକ୍ଷକ ପଦବୀ ଖାଲି ପଡ଼ିଛି। ୨୬୧ ଅଧ୍ୟକ୍ଷ ପଦବୀ ଖାଲିଥିବା ବେଳେ ୧୮୫ଟି ଉପାଧ୍ୟକ୍ଷ ପଦବିରେ କେହି ନାହାନ୍ତି ବୋଲି ମନ୍ତ୍ରୀ ନିତ୍ୟାନନ୍ଦ ଗଣ୍ଡ ସୂଚନା ଦେଇଛନ୍ତି |
