ଗେମିଂ ସଂସ୍ଥା ୱିନ୍ଜୋର ପ୍ରତିଷ୍ଠାତାଙ୍କୁ ଗିରଫ କରିଛି ଇଡି; ୫୨୩ କୋଟିର ସମ୍ପତ୍ତି ଜବତ
ନୂଆଦିଲ୍ଲୀ,୨୯|୧୧: ଭାରତରେ ଅନେକ ଗେମକୁ ବେଆଇନ ଭାବେ ନିଷିଦ୍ଧ କରାଯାଇଛି | ତଥାପି ଭାରତରେ ବେଆଇନ ଗେମର ପ୍ରସାର ହୋଇ ଚାଲିଛି | ତେବେ ଏ ମାମଲାରେ ଦୁଇଜଣଙ୍କୁ ଗିରଫ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ | ନିକଟରେ ଅନ୍ଲାଇନ୍ ଗେମିଂ ପ୍ଲାଟଫର୍ମ ୱିନ୍ଜୋର ଦୁଇ ପ୍ରତିଷ୍ଠାତା ସୌମ୍ୟା ସିଂହ ରାଠୋର ଓ ପବନ ନନ୍ଦାଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଗିରଫ କରିଛି। ସେମାନଙ୍କ ବିରୋଧରେ ମନି ଲଣ୍ଡରିଂ, ଗ୍ରାହକଙ୍କୁ ହଇରାଣ, ପ୍ୟାନ କାର୍ଡର ଅପବ୍ୟବହାର ଭଳି ଅଭିଯୋଗ ରହିଥିଲା। କିଛି ଦିନ ତଳେ ୱିନ୍ଜୋର ବେଙ୍ଗାଲୁରୁ, ଗୁରୁଗାଓଁ ଓ ଦିଲ୍ଲୀରେ ଥିବା ଠିକଣାରେ ଇଡି ଚଢ଼ାଉ କରି ୫୨୩ କୋଟି ଟଙ୍କାର ସମ୍ପତ୍ତି ଜବତ କରିଛି। ୱିନ୍ଜୋ ଗେମ୍ ବିରୋଧରେ ରୁଜୁ ହୋଇଥିବା ଏଫ୍ଆଇଆର୍ କୁ ଆଧାର କରି ତଦନ୍ତ ପରେ ଇଡି କମ୍ପାନିର ଠିକଣାରେ ଚଢ଼ଉ କରିଥିଲା। ଚଢ଼ାଉ ପରେ ଜଣାପଡ଼ିଥିଲା ଯେ, ୱିନ୍ଜୋ ହେଉଛି ଏକ ରିଅଲ ମନି ଗେମ୍ କମ୍ପାନି। ଭାରତରେ ଏଭଳି ଗେମ୍ ନିଷିଦ୍ଧ ହୋଇଥିଲେ ମଧ୍ୟ ବ୍ରାଜିଲ, ଆମେରିକା ଓ ଜର୍ମାନୀ ଭଳି ଦେଶ ପାଇଁ ଏହାର କମ୍ପାନି ଆପ୍କୁ ଭାରତରୁ ଚଲାଉଥିଲେ |
ରିଅଲ ମନି ଗେମ୍ ନିଷିଦ୍ଧ ହେବା ପରେ ମଧ୍ୟ କମ୍ପାନି ବେଆଇନ ଭାବେ ଗ୍ରାହକଙ୍କୁ ୪୩ କୋଟି ଟଙ୍କା ଫେରାଇ ନଥିଲା। କମ୍ପାନି ଗେମରମାନଙ୍କୁ ମଧ୍ୟ ଠକୁଥିଲା ବୋଲି ଜଣାପଡିଛି| ଗେମର ମାନଙ୍କ ଅଜାଣତରେ ଆଲଗୋରିଦମ୍ ଓ ସପ୍ଟୱେରକୁ ବ୍ୟବହା ର କରାଯାଉଥିଲା। ଗେମରମାନେ କୌଣସି ଅସଲି ମଣିଷ ନୁହେଁ, ବରଂ ମେସିନ ସହ ଖେଳୁଥିଲେ। ୱିନ୍ଜୋ ରିୟଲ ମନି ଗେମ ବିରୁଦ୍ଧରେ ଠକେଇ, ଆକାଉଣ୍ଟ୍ ବ୍ଲକ୍ କରିବା, ପରିଚୟ ଚୋରି କରିବା ଓ ପାନ୍ ଅପବ୍ୟବହାର କରିବା ଭଳି ଅଭିଯୋଗ ରହିଛି। କମ୍ପାନି ଗ୍ରାହକମାନଙ୍କ କେୱାଇସିର ମଧ୍ୟ ଅପବ୍ୟବହାର କରୁଥିଲା। ଯେଉଁଥିପାଇଁ ଗ୍ରାହକମାନଙ୍କୁ ବିପୁଳ ପରିମାଣରେ କ୍ଷତି ସହିବାକୁ ପଡିଛି ବୋଲି ଇଡି ପକ୍ଷରୁ କୁହାଯାଇଛି।
