ଏଣିକି ସବୁ ମୋବାଇଲ୍ରେ ସାଇବର୍ ସୁରକ୍ଷା ଆପ୍ (ସଞ୍ଚାର ସାଥୀ)କୁ କରାଯିବ ବାଧ୍ୟତାମୂଳକ
ନୂଆଦିଲ୍ଲୀ,୨|୧୨: ଦିନକୁ ଦିନ ସାଇବର କ୍ରାଇମ ସମସ୍ୟା ବଢ଼ିବାରେ ଲାଗିଛି | ତଥାପି ପ୍ରତି ଦିନ ଅନେକ ଲୋକ ଏହାର ଶିକାର ହେଉଛନ୍ତି | ସେଥିପାଇଁ ସରକାର ଏକ ନୂଆ ପଦକ୍ଷେପ ନେଇଛନ୍ତି | ଏଣିକି ପ୍ରତ୍ୟେକ ନୂଆ ସ୍ମାର୍ଟଫୋନରେ ସାଇବର ସୁରକ୍ଷା ଆପ୍ ରହିବ ଯାହାର ନାମ “ସଞ୍ଚାର ସାଥୀ” ରଖାଯାଇଛି । କେନ୍ଦ୍ର ସରକାର ସ୍ମାର୍ଟଫୋନ୍ କମ୍ପାନୀଗୁଡ଼ିକୁ ସରକାରଙ୍କ ସାଇବର ସୁରକ୍ଷା ଆପ୍ ସହ ସ୍ମାର୍ଟଫୋନ୍ ବିକ୍ରୟ କରିବାକୁ ନିର୍ଦ୍ଦେଶ ଦେଇଛନ୍ତି ।
ଏହି ନ୍ୟୁ ଆପ୍ କୁ କାର୍ଯ୍ୟକାରୀ କରିବା ପାଇଁ ଆପଲ୍, ସାମସଙ୍ଗ, ଭିଭୋ, ଓପୋ ଏବଂ ଶାଓମି ଭଳି ମୋବାଇଲ୍ କମ୍ପାନୀଗୁଡ଼ିକୁ ୯୦ ଦିନ ସମୟ ସୀମା ଦିଆଯାଇଛି। ବ୍ୟବହାରକାରୀମାନେ ଏହାକୁ ଡିଲିଟ୍ କିମ୍ବା ଅକ୍ଷମ କରିପାରିବେ ନାହିଁ। ଏବେ ସଫ୍ଟୱେର୍ ଅପଡେଟ୍ ମାଧ୍ୟମରେ ପୁରୁଣା ଫୋନ୍ରେ ଏହି ଆପ୍ ଇନଷ୍ଟଲ୍ ବା ସଂସ୍ଥାପିତ ହେବ।
ଏହି ନିର୍ଦ୍ଦେଶ ଏପର୍ଯ୍ୟନ୍ତ ସାର୍ବଜନୀନ ହୋଇନାହିଁ, ଏହାକୁ ବ୍ୟକ୍ତିଗତ ଭାବରେ କିଛି କମ୍ପାନୀଗୁଡ଼ିକୁ ପଠାଯାଇଥିବା ସୂଚନା ମିଳିଛି । ସାଇବର ଠକେଇ, ନକଲି ଆଇଏମ୍ଇଆଇ IMEI ନମ୍ବର ଏବଂ ଫୋନ୍ ଚୋରି ଭଳି ଅପରାଧିକ କାର୍ଯ୍ୟକଳାପକୁ ରୋକିବା ପାଇଁ ଏହାକୁ ମୋବାଇଲ୍ ଫୋନ୍ମାନଙ୍କରେ ଇନଷ୍ଟଲ କରିବାକୁ ବାଧ୍ୟତାମୂଳକ କରାଯାଇଛି । ନକଲି ଆଇଏମ୍ଇଆଇ ଦ୍ୱାରା ହେଉଥିବା ସାଇବର ଠକେଇ ସବୁକୁ ରୋକିବା ପାଇଁ ଏହି ଆପ୍ ଆବଶ୍ୟକ ବୋଲି ଜଣେ ବରିଷ୍ଠ ସରକାରୀ ଅଧିକାରୀ ସୂଚନା ଦେଇଛନ୍ତି ।
ତେବେ ଏହା ପୂର୍ବରୁ ଜାଣି ନିଅନ୍ତୁ ସଂଞ୍ଚାର ସାଥୀ ଆପ୍ କ’ଣ, ଏବଂ ଏହା କିପରି ସାଇବର୍ ସୁରକ୍ଷା ଯୋଗାଇ ଦେବ ! ସଞ୍ଚାର ସାଥୀ ଆପ୍ ହେଉଛି କେନ୍ଦ୍ର ସରକାରଙ୍କ ଅଧୀନରେ ତିଆରି ହୋଇଥିବା ଏକ ସାଇବର ସୁରକ୍ଷା ଆପ୍ ,। ଯାହାକୁ ୧୭ ଜାନୁଆରୀ, ୨୦୨୫ରେ ଲଞ୍ଚ୍ କରାଯାଇଥିଲା । ବର୍ତ୍ତମାନ, ଏହା ପ୍ଲେ ଷ୍ଟୋରଗୁଡ଼ିକରେ ଡାଉନଲୋଡ୍ ପାଇଁ ଉପଲବ୍ଧ , କିନ୍ତୁ ବର୍ତ୍ତମାନ ନୂତନ ଫୋନ୍ ପାଇଁ ଏହା ବାଧ୍ୟତାମୂଳକ କରାଯାଇଛି । ଏହି ଆପ୍ ବ୍ୟବହାରକାରୀଙ୍କୁ କଲ୍, ମେସେଜ୍ କିମ୍ବା ହ୍ୱାଟ୍ସଆପ୍ ଚାଟ୍ ସ୍ପାମ୍ ବୋଲି ଦର୍ଶାଇବାରେ ସାହାଯ୍ୟ କରିବ। ଏବଂ ଏହା ଆଇଏମଆଇ ନମ୍ବର ଯାଞ୍ଚ କରି ଚୋରି କିମ୍ବା ହଜିଯାଇଥିବା ଫୋନ୍ଗୁଡ଼ିକୁ ସନ୍ଧାନ କରିବାରେ ସାହାଯ୍ୟ ମଧ୍ୟ କରିବ |
ତେବେ ଭାରତରେ ୧.୨ ବିଲିୟନରୁ ଅଧିକ ମୋବାଇଲ୍ ବ୍ୟବହାରକାରୀ ଅଛନ୍ତି, ଯାହା ବିଶ୍ୱର ସର୍ବବୃହତ ବଜାର, କିନ୍ତୁ ନକଲି କିମ୍ବା ଡୁପ୍ଲିକେଟ୍ ଆଇଏମ୍ଇଆଇ ନମ୍ବର ଯୋଗୁଁ ସାଇବର ଅପରାଧ ଦିନକୁ ଦିନ ବୃଦ୍ଧି ପାଉଛି। ଆଇଏମ୍ଇଆଇ ହେଉଛି ଏକ ଅନନ୍ୟ ୧୫-ଅଙ୍କ କୋଡ୍ ଯାହା ଫୋନ୍କୁ ଚିହ୍ନଟ କରିବାରେ ସାହାଯ୍ୟ କରିଥାଏ।
ଅପରାଧୀମାନେ ଟ୍ରାକିଂରୁ ବଞ୍ଚିବା, ଲୋକଙ୍କୁ ଠକିବା କିମ୍ବା କଳା ବଜାରରେ ଚୋରି ଫୋନ୍ ବିକ୍ରି କରିବା ପାଇଁ ଏହାକୁ କ୍ଲୋନ୍ କରିଥାଆନ୍ତି। ସରକାର କହିଛନ୍ତି ଯେ, ଏହି ଆପ୍ ପୋଲିସକୁ ଡିଭାଇସ୍ ଟ୍ରେସ୍ କରିବାରେ ସାହାଯ୍ୟ କରିବ। ସେପ୍ଟେମ୍ବରରେ ୨.୨୭୬ ନିୟୁତ ଡିଭାଇସ୍ ଟ୍ରାକ୍ କରାଯାଇଥିବା ସରକାରୀ ସୁତ୍ରକୁ ଜଣାପଡିଛି ।
ତେବେ ଏହା ଦ୍ୱାରା କମ୍ପାନୀ ଗୁଡିକ ଉପରେ ମଧ୍ୟ ପ୍ରଭାବ ପଡିପାରେ | ଖାସ କରି ଆପଲ୍ ପାଇଁ ବିଶେଷ କଷ୍ଟକର, କାରଣ କମ୍ପାନୀର ନୀତି ସରକାରୀ କିମ୍ବା ତୃତୀୟ-ପକ୍ଷ ଆପ୍ଗୁଡ଼ିକର ପ୍ରି-ଇନଷ୍ଟଲେସନ୍ ନିଷିଦ୍ଧ କରିଥାଏ। ପୂର୍ବରୁ ଆପଲ୍ କମ୍ପାନୀ ଆଣ୍ଟି-ସ୍ପାମ୍ ଆପ୍ଗୁଡ଼ିକୁ ନେଇ ସରକାରୀ ନିୟାମକଙ୍କ ସହ ଅନେକ ଥର ବିବାଦର ସମ୍ମୁଖୀନ ହୋଇଛି। ଶିଳ୍ପ ବିଶେଷଜ୍ଞମାନେ ବିଶ୍ୱାସ କରନ୍ତି ଯେ, ଆପଲ୍ କମ୍ପାନୀ ଏହି ସମ୍ପର୍କିତ ସରକାରଙ୍କ ସହିତ କିଛି ଆଲୋଚନା କରିପାରେ। ଆପଲ୍ ବ୍ୟବହାରକାରୀଙ୍କୁ ସ୍ୱେଚ୍ଛାକୃତ ପ୍ରମ୍ପ୍ଟ ପ୍ରଦାନ କରିବାକୁ ମଧ୍ୟ ପରାମର୍ଶ ଦେଇପାରେ। ତଥାପି, କୌଣସି କମ୍ପାନୀ ଏପର୍ଯ୍ୟନ୍ତ ଏହି ନିର୍ଦ୍ଦେଶ ଉପରେ ମନ୍ତବ୍ୟ ଦେଇନାହାନ୍ତି ।
ଅନ୍ୟପଟେ ଏହି ପଦକ୍ଷେପ ଦ୍ୱାରା ଫୋନ୍ ବ୍ୟବହାରକାରୀମାନେ ସିଧାସଳଖ ଭାବେ ଲାଭ ପାଇବେ। ଯଦି କୌଣସି ଫୋନ୍ ଚୋରି ହୋଇଯାଏ, ତେବେ ଏହା ଆଇଏମ୍ଇଆଇ ଯାଞ୍ଚ କରି ତୁରନ୍ତ ଏହାକୁ ଅବରୋଧ କରିପାରିବ। ଠକେଇ କଲ୍ ରିପୋର୍ଟ କରିବା ଦ୍ୱାରା ସାଇବର ଅପରାଧ ମଧ୍ୟ ହ୍ରାସ ପାଇବାର ସମ୍ଭାବନା ରହିଛି |
