ନିଜର ଭୁଲ ସ୍ୱୀକାର କଲା ଆଇସିସି!
ବିରାଟ କୋହଲି ଦିନିକିଆ ରାଙ୍କିଙ୍ଗ୍ ରେ ପୁଣି ଥରେ ନମ୍ବର ୱାନ୍ ହୋଇଛନ୍ତି । ନିକଟରେ ଆଇସିସି ପକ୍ଷରୁ ପ୍ରକାଶିତ ଏକ ତାଲିକାକୁ ନେଇ ପ୍ରଶଂସକଙ୍କ ମଧ୍ୟରେ ଦ୍ଵନ୍ଦ ସୃଷ୍ଟି ହୋଇଥିଲା । ଆଉ ଏବେ ଆଇସିସି ତାର ତ୍ରୁଟି ସୁଧାରିଛି । ସୂଚନା ଅନୁସାରେ, ଆଇସିସି ତାର ପ୍ରଥମ ତାଲିକା ସେୟାର କରି ବିରାଟ କୋହଲି ତାଙ୍କ କ୍ୟାରିୟରରେ ୮୨୫ ଦିନ ପାଇଁ ନମ୍ବର ୱାନ୍ ସ୍ଥାନରେ ଥିବା ଦର୍ଶାଇଥିଲା । କିନ୍ତୁ ବାସ୍ତବରେ ଦେଖିବାକୁ ଗଲେ, ବିରାଟ କୋହଲି ୧୫୪୭ ଦିନ ପାଇଁ ନମ୍ବର ୧ ଦିନିକିଆ ବ୍ୟାଟର ଅଛନ୍ତି । ଅର୍ଥାତ ଆଇସିସି ପକ୍ଷରୁ ପ୍ରକାଶିତ ହୋଇଥିବା ତାଲିକାରେ ୭୨୨ ଦିନ କଟାଯାଇଥିଲା । ତେବେ ଏହି ତ୍ରୁଟିକୁ ସୁଧାରିଛି ଅନ୍ତର୍ଜାତୀୟ କ୍ରିକେଟ ପରିଷଦ ।
ସୂଚନାଯୋଗ୍ୟ, ବିରାଟ କୋହଲି ତାଙ୍କ ଦିନିକିଆ କ୍ୟାରିୟରରେ ମୋଟ ୧୫୪୭ ଦିନ ପାଇଁ ନମ୍ବର-ୱାନ ରାଙ୍କିଙ୍ଗ୍ ରେ ବଜାୟ ରଖିଛନ୍ତି । ସେ ୨୦୧୭ ରୁ ୨୦୨୧ ମଧ୍ୟରେ ଲଗାତାର ୧୨୫୭ ଦିନ ପାଇଁ ନମ୍ବର-ୱାନ ରାଙ୍କିଙ୍ଗ୍ ବଜାୟ ରଖିଛନ୍ତି । ଭାରତୀୟ ବ୍ୟାଟର ମାନଙ୍କ ମଧ୍ୟରେ ସବୁଠାରୁ ଅଧିକ ସମୟ ପାଇଁ ତାଙ୍କର ରେକର୍ଡ ରହିଛି | ତେବେ ଏହି ତାଲିକାରେ ୱେଷ୍ଟଇଣ୍ଡିଜର ମହାନ ଖେଳାଳି ଭିଭିଆନ ରିଚାର୍ଡସ ପ୍ରଥମରେ ରହିଛନ୍ତି, ଯିଏ ତାଙ୍କ କ୍ୟାରିୟରରେ ମୋଟ ୨୩୦୬ ଦିନ ପାଇଁ ଶୀର୍ଷରେ ରହିଛନ୍ତି ।
ICC ରାଙ୍କିଙ୍ଗ୍ ଘୋଷଣା ପ୍ରକାଶିତ କରିବା ସମୟରେ ଏକ ଗୁରୁତ୍ୱପୂର୍ଣ୍ଣ ଭୁଲ କରିଥିଲା । ସରକାରୀ ପୋଷ୍ଟ ଅନୁସାରେ, ସେମାନେ ବିରାଟଙ୍କ ମୋଟ ନମ୍ବର ୱାନ୍ ଦିନକୁ ୮୨୫ ଭାବରେ ତାଲିକାରେ ଦର୍ଶାଇଥିଲେ । ଯେତେବେଳେ ପ୍ରକୃତ ସଂଖ୍ୟା ହେଉଛି ୧୫୪୭ ଦିନ । ତାଲିକାରେ ବିରାଟଙ୍କ ମୋଟ ଦିନ ସଂଖ୍ୟା ୭୨୨ ଦିନ ହ୍ରାସ କରିଥିଲେ । ଆଇସିସି ପକ୍ଷରୁ ଏହି ତ୍ରୁଟି ସୋସିଆଲ ମିଡିଆରେ ପ୍ରଶଂସକ ଏବଂ କ୍ରିକେଟ୍ ପ୍ରେମୀଙ୍କ ମଧ୍ୟରେ ଦ୍ଵନ୍ଦ ସୃଷ୍ଟି କରିଥିଲା । ଏହି ଘଟଣାରେ ଅନେକ ୟୁଜର୍ସ ଆଇସିସିକୁ ଟ୍ୟାଗ୍ କରି ପ୍ରଶ୍ନ କରିଥିଲେ ଯେ, ଏତେ ଗୁରୁତ୍ୱପୂର୍ଣ୍ଣ ରେକର୍ଡ ସହିତ ଏପରି ଭୁଲ କିପରି ହୋଇପାରିବ? ପରେ ଆଇସିସି ଭୁଲ ସ୍ୱୀକାର କରି ଏହି ପୋଷ୍ଟକୁ ହଟାଇ ଦେଇଥିବା ଜଣାପଡିଛି।ଭାରତୀୟ ବ୍ୟାଟର ବିରାଟ କୋହଲି ଦୀର୍ଘ ୪ ବର୍ଷ ପରେ ଆଇସିସି ଦିନିକିଆ ବ୍ୟାଟର ତାଲିକାରେ ପ୍ରଥମ ସ୍ଥାନକୁ ଫେରିଥିଲେ । ତେବେ ବୁଧବାର ପ୍ରକାଶିତ ତାଲିକାରେ ବିରାଟ ୭୮୫ ପଏଣ୍ଟ ସହ ଶୀର୍ଷ ସ୍ଥାନରେ ଅଛନ୍ତି । ଏହାକୁ ନେଇ ଭାରତୀୟ କ୍ରିକେଟ ପ୍ରେମୀ ବେଶ ଖୁସି ହୋଇଥିଲେ । କିନ୍ତୁ କୋହଲିଙ୍କ ସ୍ଥାନ ଅପରିବର୍ତ୍ତିତ ରହିବକି ? କାରଣ ନ୍ୟୁଜିଲାଣ୍ଡର ତାରକା ବ୍ୟାଟର ଡାଲିଲ୍ ମିଚେଲ ଯେଉଁ ଫର୍ମରେ ଅଛନ୍ତି ଲାଗୁଛି ବିରାଟଙ୍କୁ ଟପିଯିବେ । ସୂଚନା ରହିଛିଯେ, ମିଚେଲ ୭୮୪ ପଏଣ୍ଟରେ ରହିଛନ୍ତି | ଏବଂ ବିରାଟଙ୍କଠୁ ମିଚେଲ ମାତ୍ର ଗୋଟିଏ ପଏଣ୍ଟରେ ପଛରେ ରହିଛନ୍ତି | ଭାରତ-ନ୍ୟୁଜିଲାଣ୍ଡ ଦ୍ୱିତୀୟ ଦିନିକିଆରେ ବିରାଟ ୨୩ ରନ୍ କରିଥିଲେ । ଡାରିଲ ମିଚେଲ ୧୩୧ ରନର ମ୍ୟାଚ ଖେଳିଥିଲେ । ତେବେ ଏହି ପାଳି ପରେ ତାଙ୍କର ଅଙ୍କ ଆହୁରି ବଢ଼ିଯାଇ ପାରେ ବୋଲି ଅନୁମାନ ହେଉଛି । ଯଦି ତୃତୀୟ ଦିନିକିଆରେ ବିରାଟ ଏକ ବଡ଼ ସ୍କୋର ନ କରନ୍ତି ହୁଏତ ତାଙ୍କ ପୋଜିସନ ନମ୍ୱର ୱାନ୍ ରୁ ତଳକୁ ଖସିଯାଇପାରେ ବୋଲି ଅନୁମାନ କରାଯାଉଛି ।
