ଦୋକାନରେ ଭୟଙ୍କର ଅଗ୍ନିକାଣ୍ଡ! ଜଳିଗଲେ ବାପ-ପୁଅ
ଭୁବନେଶ୍ଵର,୧୫।୩: ଖୋର୍ଦ୍ଧା ସାନପଦର ଅଞ୍ଚଳରେ ଏକ ଅଭାବନୀୟ ଘଟଣା ଘଟିଛି । ଏକ ଦୋକାନରେ ଭୟଙ୍କର ଅଗ୍ନିକାଣ୍ଡ ଘଟିଛି । ଯେଉଁଥିରେ ବାପା ଓ ପୁଅ ଦୋକାନରେ ସୋଇଥିବା ଅବସ୍ଥାରେ ସଂପୂର୍ଣ୍ଣ ଭାବେ ଜଳି ଯାଇଛନ୍ତି । ମୃତକ ଦୁହେଁ ହେଉଛନ୍ତି ସାନପଦର ଗାଁର ରାଜେଶ କୁମାର ସାହୁ ଓ ତାଙ୍କ ପୁଅ ଲକ୍ଷ୍ମୀଧର ସାହୁ ।
ସୂଚନା ଅନୁସାରେ, ସାନପଦର-ଦେଉଳି ରାସ୍ତାର ବିନ୍ଧ୍ୟଗିରି ପାହାଡ଼କୁ ଯିବା ରାସ୍ତାକଡ଼ରେ ବାପ-ପୁଅ ଏକ ଚା ଦୋକାନ କରିଥିଲେ । କାଲି ବିଳମ୍ବିତ ରାତିରେ ଦୋକାନରେ ହଠାତ୍ କୌଣସି କାରଣରୁ ନିଆଁ ଲାଗି ଯାଇଥିଲା । ଯାହା ଫଳରେ ଶୋଇଥିବା ଅବସ୍ଥାରେ ହିଁ ବାପ ପୁଅ ଜୀବନ୍ତ ଦଗ୍ଧ ହୋଇଯାଇଛନ୍ତି । ତେବେ କିପରି ଆଉ କେଉଁ କାରଣରୁ ଦୋକାନରେ ନିଆଁ ଲାଗିଲା ତାହା ଏ ପର୍ଯ୍ୟନ୍ତ ଜଣାପଡିନାହିଁ ।
