ଜନ୍ତର-ମନ୍ତରରେ ଶାନ୍ତିପୂର୍ଣ୍ଣ ଭାବେ ଶେଷ ହେଲା କକ୍ରୋଚ୍ ଜନତା ପାର୍ଟିର ବିକ୍ଷୋଭ, ୬ ଜଣଙ୍କୁ ଅଟକ ରଖିଲା ଦିଲ୍ଲୀ ପୁଲିସ
କକ୍ରୋଚ୍ ଜନତା ପାର୍ଟି (CJP) ସମର୍ଥକଙ୍କ ଦ୍ୱାରା ଆୟୋଜିତ ବିକ୍ଷୋଭ ଶନିବାର ଦିଲ୍ଲୀର ଜନ୍ତର-ମନ୍ତରରେ ଶାନ୍ତିପୂର୍ଣ୍ଣ ଭାବେ ଶେଷ ହୋଇଛି। ସ୍କୁଲ ଛାତ୍ରଛାତ୍ରୀ, କଲେଜ ପଢୁଆ, ବିଭିନ୍ନ ପ୍ରତିଯୋଗିତାମୂଳକ ପରୀକ୍ଷାର ପ୍ରାର୍ଥୀ ଓ ଅଭିଭାବକଙ୍କ ସମେତ ଶତାଧିକ ଲୋକ ଏଥିରେ ଯୋଗ ଦେଇଥିଲେ। ଶିକ୍ଷା ବ୍ୟବସ୍ଥାରେ ବଢୁଥିବା ଅନିୟମିତତାକୁ ନେଇ ଚିନ୍ତା ପ୍ରକାଶ କରି ସେମାନେ ଏହି ଆନ୍ଦୋଳନରେ ସାମିଲ ହୋଇଥିଲେ।
ସାମାଜିକ କର୍ମୀ ସୋନମ ୱାଙ୍ଗଚୁକ୍ ମଧ୍ୟ ବିକ୍ଷୋଭରେ ଯୋଗ ଦେଇ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିକୁ ସମର୍ଥନ କରିଥିଲେ। କକ୍ରୋଚ୍ ଜନତା ପାର୍ଟିର ସଂସ୍ଥାପକ ଅଭିଜିତ ଦୀପକେ କହିଥିଲେ ଯେ, ସରକାର ସେମାନଙ୍କ ଦାବି ଉପରେ ଧ୍ୟାନ ଦେବା ପରିବର୍ତ୍ତେ ସଂଗଠନର ସୋସିଆଲ ମିଡିଆ କାର୍ଯ୍ୟକଳାପକୁ ନେଇ ଅଧିକ ଚର୍ଚ୍ଚା କରୁଛନ୍ତି। NEET, ନିଯୁକ୍ତି ପରୀକ୍ଷା ଓ ଅନ୍ୟାନ୍ୟ ପରୀକ୍ଷାରେ ହୋଇଥିବା କଥିତ ଅନିୟମିତତା ପାଇଁ ଶିକ୍ଷାମନ୍ତ୍ରୀଙ୍କ ଇସ୍ତଫା ସେମାନଙ୍କ ମୁଖ୍ୟ ଦାବି ବୋଲି ସେ କହିଥିଲେ।
ଏହି ସମୟରେ ଦୁଇ ଗୋଷ୍ଠୀ ମଧ୍ୟରେ ସମ୍ଭାବ୍ୟ ମୁହାଁମୁହିଁ ପରିସ୍ଥିତିକୁ ଏଡାଇବା ପାଇଁ ଦିଲ୍ଲୀ ପୁଲିସ ୬ ଜଣଙ୍କୁ ଅଟକ ରଖିଥିଲା। ପୁଲିସ ଅନୁସାରେ, ଏହା କେବଳ ପ୍ରତିରୋଧମୂଳକ ପଦକ୍ଷେପ ଥିଲା ଏବଂ ସମଗ୍ର ବିକ୍ଷୋଭ କାର୍ଯ୍ୟକ୍ରମ ଶାନ୍ତିପୂର୍ଣ୍ଣ ଭାବେ ସମାପ୍ତ ହୋଇଛି।
