ଶାଢ଼ୀ ଗଦା ତଳେ ଲୁଚିଥିଲେ ଟିଏମସି ନେତା, ପୁଲିସ ତଲାସିରେ ଧରାପଡ଼ିଲେ
ପଶ୍ଚିମବଙ୍ଗର ହାୱଡ଼ା ଜିଲ୍ଲାରେ ଜଣେ ତୃଣମୂଳ କଂଗ୍ରେସ (ଟିଏମସି) ନେତାଙ୍କ ଗିରଫଦାରୀକୁ ନେଇ ଏକ ଚର୍ଚ୍ଚିତ ଘଟଣା ସାମ୍ନାକୁ ଆସିଛି। ପୁଲିସ ଗିରଫରୁ ବଞ୍ଚିବା ପାଇଁ ସେ ଏକ କପଡ଼ା ଦୋକାନର ଷ୍ଟୋର ରୁମ୍ରେ ଶାଢ଼ୀ ଗଦା ତଳେ ଲୁଚି ରହିଥିଲେ। ହେଲେ ପୁଲିସର ତଲାସି ସମୟରେ ତାଙ୍କର ଲୁଚିବା ଉଦ୍ୟମ ବିଫଳ ହୋଇଥିଲା ଏବଂ ଶେଷରେ ସେ ଧରାପଡ଼ିଥିଲେ।
ଗିରଫ ହୋଇଥିବା ନେତାଙ୍କୁ ବ୍ରହ୍ମାନନ୍ଦ ଚକ୍ରବର୍ତ୍ତୀ ବୋଲି ଚିହ୍ନଟ କରାଯାଇଛି। ସେ ହାୱଡ଼ାର ଉଦୟନାରାୟଣପୁର ଥାନା ଅନ୍ତର୍ଗତ ବିଳାସପୁର ଅଞ୍ଚଳର ସ୍ଥାନୀୟ ଟିଏମସି ନେତା। ସ୍ଥାନୀୟ ଲୋକମାନେ ସରକାରୀ ଆବାସ ଯୋଜନା ପାଣ୍ଠିରୁ ବଟି ଆଦାୟ କରିଥିବା ଅଭିଯୋଗ ଆଣିବା ପରେ ପୁଲିସ ତାଙ୍କୁ ଖୋଜୁଥିଲା। ଗିରଫ ଭୟରେ ସେ ଏକ କପଡ଼ା ଦୋକାନରେ ଥିବା ବିଡ଼ା ବିଡ଼ା ଶାଢ଼ୀ ତଳେ ଲୁଚି ରହିଥିଲେ।
ତେବେ ତଲାସି ସମୟରେ ପୁଲିସର ସନ୍ଦେହ ହେବାରୁ ଶାଢ଼ୀ ବଣ୍ଡଲଗୁଡ଼ିକୁ ହଟାଇଥିଲା। ଏହାପରେ ବ୍ରହ୍ମାନନ୍ଦ ଚକ୍ରବର୍ତ୍ତୀ ଗଦା ତଳେ ଲୁଚିଥିବା ଦେଖାଯାଇଥିଲା ଏବଂ ପୁଲିସ ତାଙ୍କୁ ଗିରଫ କରିଥିଲା। ଘଟଣାବେଳର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ସୂଚନା ଅନୁସାରେ, ସେ ୨୦୨୧ ପଶ୍ଚିମବଙ୍ଗ ବିଧାନସଭା ନିର୍ବାଚନ ପରବର୍ତ୍ତୀ ରାଜନୈତିକ ହିଂସା ସମ୍ବନ୍ଧୀୟ ଅଭିଯୋଗରେ ମଧ୍ୟ ତଦନ୍ତର ସମ୍ମୁଖୀନ ହେଉଛନ୍ତି। ପୁଲିସ କହିଛି ଯେ, ତାଙ୍କ ବିରୋଧରେ ଆସିଥିବା ଅଭିଯୋଗଗୁଡ଼ିକର ତଦନ୍ତ ଜାରି ରହିଛି।
