INDIA ମେଣ୍ଟର ମହାବୈଠକ ଆଜି, ବିରୋଧୀ ଏକତାର ପରୀକ୍ଷା; TMC ସଙ୍କଟ ଉପରେ ନଜର
୨୦୨୪ ଲୋକସଭା ନିର୍ବାଚନ ପରେ ପ୍ରଥମ ଥର ପାଇଁ ସଂସଦୀୟ ସମନ୍ୱୟ ବାହାରେ INDIA ମେଣ୍ଟର ପ୍ରମୁଖ ବିରୋଧୀ ଦଳଗୁଡ଼ିକ ସୋମବାର ଦିଲ୍ଲୀରେ ଏକାଠି ହେବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ତୃତୀୟ କାର୍ଯ୍ୟକାଳ 2 ବର୍ଷ ପୂରଣ କରୁଥିବା ବେଳେ, ବିରୋଧୀ ଶିବିରର ଭବିଷ୍ୟତ ରଣନୀତି ଉପରେ ଏହି ବୈଠକରେ ମନ୍ଥନ ହେବ।
କଂଗ୍ରେସ ନେତା ଜୟରାମ ରମେଶଙ୍କ ସୂଚନା ଅନୁସାରେ, ୨୩ଟି ଦଳ ବୈଠକରେ ଯୋଗଦେବାକୁ ସମ୍ମତି ଦେଇଛନ୍ତି। ତେବେ କିଛି ଦଳ ଅନୁପସ୍ଥିତ ରହିବେ। ବିଶେଷ କରି DMK ଏବଂ କଂଗ୍ରେସ ମଧ୍ୟରେ ତାମିଲନାଡୁ ରାଜନୀତିକୁ ନେଇ ମତଭେଦ ଦେଖାଦେଇଥିବା ବେଳେ, କେରଳରେ କଂଗ୍ରେସ-CPM ମଧ୍ୟରେ ବାକ୍ଯୁଦ୍ଧ ମେଣ୍ଟର ଭିତରୁଆ ସମସ୍ୟାକୁ ଆଗକୁ ଆଣିଛି।
ସୂତ୍ର ଅନୁସାରେ, ପଶ୍ଚିମବଙ୍ଗରେ ବଡ଼ ଧରଣର ରାଜନୈତିକ ସଙ୍କଟ ଦେଖାଦେଇଥିବାରୁ ତୃଣମୂଳ କଂଗ୍ରେସ (TMC) ଏହି ବୈଠକ ଡାକିବାକୁ ଜୋର ଦେଇଥିଲା। ଦଳର ସୁପ୍ରିମୋ ମମତା ବାନାର୍ଜୀ ଓ ଅଭିଷେକ ବାନାର୍ଜୀ ଏଥିରେ ଯୋଗଦେବେ। ବଙ୍ଗରେ TMCର ବିପର୍ଯ୍ୟୟ ଏବଂ ଦଳ ଭିତରେ ବିଦ୍ରୋହ ମଧ୍ୟରେ ମମତାଙ୍କ ଏହି ପଦକ୍ଷେପକୁ ରାଜନୈତିକ ସମର୍ଥନ ଖୋଜିବାର ଚେଷ୍ଟା ବୋଲି ଦେଖାଯାଉଛି।
ବୈଠକରେ ପଶ୍ଚିମବଙ୍ଗ ନିର୍ବାଚନ ପରେ ଭୋଟର ତାଲିକା ସଂଶୋଧନ (SIR) ପ୍ରକ୍ରିୟା, ନିର୍ବାଚନ ଆୟୋଗର ଭୂମିକା, ସଂସଦୀୟ ରଣନୀତି ଏବଂ ୨୦୨୯ ଲୋକସଭା ନିର୍ବାଚନ ପାଇଁ ବିରୋଧୀ ଦଳର ଏକତା ଭଳି ପ୍ରସଙ୍ଗ ଉପରେ ଆଲୋଚନା ହୋଇପାରେ।
ତେବେ INDIA ମେଣ୍ଟ ଭିତରେ ବଢ଼ୁଥିବା ମତଭେଦ ଓ ପରସ୍ପର ଦୋଷାରୋପ ଏହି ବୈଠକକୁ ଚ୍ୟାଲେଞ୍ଜିଂ କରିପାରେ। ରାଜନୈତିକ ବିଶ୍ଳେଷକଙ୍କ ମତରେ, ବିରୋଧୀ ଦଳଗୁଡ଼ିକ ପାଇଁ ଏହି ବୈଠକ କେବଳ ରଣନୀତି ନୁହେଁ, ବରଂ INDIA ମେଣ୍ଟର ଭବିଷ୍ୟତ ଏକତାର ମଧ୍ୟ ପରୀକ୍ଷା ହେବ।
