ଦିଲ୍ଲୀରେ ମମତା, TMC ସାଂସଦଙ୍କ ବିଦ୍ରୋହ ନେଇ ବଢ଼ିଲା ଚିନ୍ତା
ଟିଏମସି ମୁଖ୍ୟ ମମତା ବାନାର୍ଜୀ ରବିବାର ଦିଲ୍ଲୀ ପହଞ୍ଚିଥିବା ବେଳେ ଦଳ ଭିତରେ ବିଦ୍ରୋହର ଆଶଙ୍କା ଆହୁରି ଜୋର ଧରିଛି। ପଶ୍ଚିମବଙ୍ଗ ବିଧାନସଭାରେ ବିଧାୟକମାନଙ୍କ ବିଚ୍ଛିନ୍ନତା ପରେ ଏବେ ଲୋକସଭା ଓ ରାଜ୍ୟସଭାର କିଛି ସାଂସଦ ମଧ୍ୟ ଅଲଗା ରାସ୍ତା ଧରିପାରନ୍ତି ବୋଲି ଚର୍ଚ୍ଚା ଚାଲିଛି। ଏହି ପରିସ୍ଥିତିରେ ମମତା ବାନାର୍ଜୀ ଇଣ୍ଡିଆ ମେଣ୍ଟର ବୈଠକରେ ଯୋଗଦେବା ସହ ଦଳୀୟ ସାଂସଦମାନଙ୍କୁ ଏକତାବଦ୍ଧ ରଖିବାକୁ ଉଦ୍ୟମ କରୁଛନ୍ତି।
ଦଳୀୟ ସୂତ୍ର ଅନୁଯାୟୀ, ବଙ୍ଗ ବିଧାନସଭାରେ ଯେପରି ବିଧାୟକମାନେ ଅଲଗା ଗୋଷ୍ଠୀ ଗଠନ କରିଥିଲେ, ସେହିପରି ଲୋକସଭାରେ ମଧ୍ୟ କିଛି ସାଂସଦ ନୂଆ ଗୋଷ୍ଠୀ ଗଠନ ପାଇଁ ପ୍ରସ୍ତୁତି କରୁଥିବା ଖବର ମିଳିଛି। ଟିଏମସିର ରାଜ୍ୟସଭା ସାଂସଦ ସୁଖେନ୍ଦୁ ଶେଖର ରାୟ କହିଛନ୍ତି ଯେ ବିଧାନସଭାରେ ଯାହା ଘଟିଛି, ତାହାର ପ୍ରଭାବ ଲୋକସଭାରେ ମଧ୍ୟ ଦେଖାଯାଇପାରେ। ତେବେ ରାଜ୍ୟସଭାରେ ଏପର୍ଯ୍ୟନ୍ତ ସେଭଳି ପ୍ରକ୍ରିୟା ଆରମ୍ଭ ହୋଇନଥିବା ସେ ସ୍ପଷ୍ଟ କରିଛନ୍ତି।
ଦିଲ୍ଲୀ ପହଞ୍ଚିବା ପରେ ମମତା ବାନାର୍ଜୀ ଓ ଅଭିଷେକ ବାନାର୍ଜୀ ଆମ୍ ଆଦମୀ ପାର୍ଟି ମୁଖ୍ୟ ଅରବିନ୍ଦ କେଜ୍ରିୱାଲଙ୍କ ସହ ଆଲୋଚନା କରିଥିଲେ। ଟିଏମସି ପକ୍ଷରୁ କୁହାଯାଇଛି ଯେ ଦେଶର ବିରୋଧୀ ଶକ୍ତିଙ୍କୁ ଏକତ୍ର କରିବା ଓ ଆଗାମୀ ରାଜନୈତିକ ରଣନୀତି ନେଇ ବୈଠକରେ ବିସ୍ତୃତ ଆଲୋଚନା ହୋଇଛି। ତେବେ ଦଳର କିଛି ସାଂସଦ ସୋମବାର ଇଣ୍ଡିଆ ବ୍ଲକ୍ ବୈଠକ ସମୟରେ କୌଣସି ବଡ଼ ପଦକ୍ଷେପ ନେଇପାରନ୍ତି ବୋଲି ଟିଏମସି ନେତୃତ୍ୱ ଆଶଙ୍କା କରୁଛି।
ବର୍ତ୍ତମାନ ଲୋକସଭାରେ ଟିଏମସିର ୨୮ ଏବଂ ରାଜ୍ୟସଭାରେ ୧୩ ଜଣ ସାଂସଦ ଅଛନ୍ତି। ଦଳ ଭିତରେ ଅସନ୍ତୋଷ ବଢ଼ୁଥିବା ବେଳେ ମମତା ବାନାର୍ଜୀଙ୍କ ଏହି ଦିଲ୍ଲୀ ଗସ୍ତକୁ ରାଜନୈତିକ ଭାବେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଦେଖାଯାଉଛି।
