ଭୁବନେଶ୍ୱରର ଅର୍ଚ୍ଚନା ଏନକ୍ଲେଭରେ ବୁଲା କୁକୁରକୁ ନିର୍ଯାତନା ଅଭିଯୋଗ, ଗୋଡ଼ ଭାଙ୍ଗିବା ପରେ କ୍ଷୋଭ
ଭୁବନେଶ୍ୱର: ଭୁବନେଶ୍ୱରର ଆଇଟିଇଆର୍ ଇଞ୍ଜିନିୟରିଂ କଲେଜ ପଛପାର୍ଶ୍ୱରେ ଥିବା ଅର୍ଚ୍ଚନା ଏନକ୍ଲେଭ ହାଉସିଂ କଲୋନିରେ ଏକ ବୁଲା କୁକୁର ଉପରେ ନିର୍ଯାତନା ଘଟଣାକୁ ନେଇ ଉତ୍ତେଜନା ସୃଷ୍ଟି ହୋଇଛି। ଜଣେ ବରିଷ୍ଠ ନାଗରିକଙ୍କ ବାରମ୍ବାର ଆକ୍ରମଣ ଯୋଗୁଁ ଏକ ସାତ ମାସର ଅନାଥ ବୁଲା କୁକୁରର ଗୋଡ଼ ଭାଙ୍ଗି ଯାଇଥିବା ଅଭିଯୋଗ ହୋଇଛି। ସ୍ଥାନୀୟ ବାସିନ୍ଦାଙ୍କ କହିବା ଅନୁସାରେ, ସମ୍ପୃକ୍ତ ବ୍ୟକ୍ତି ଜଣକ ବୁଲା କୁକୁରମାନଙ୍କ ଉପରେ ଆକ୍ରମଣ କରୁଥିବା ନେଇ ପୂର୍ବରୁ ମଧ୍ୟ ଅନେକ ଥର ପାଟିତୁଣ୍ଡ ହୋଇଥିଲା।
କୁକୁରଟି ଗୁରୁତର ଭାବେ ଆହତ ହେବା ପରେ କଲୋନିର କିଛି ପଶୁପ୍ରେମୀ ମହିଳା ଏହାକୁ ଉଦ୍ଧାର କରି OUAT ପଶୁ ଚିକିତ୍ସାଳୟକୁ ନେଇଥିଲେ। ସେଠାରେ ଡାକ୍ତରମାନେ ଅସ୍ତ୍ରୋପଚାର କରି ଭାଙ୍ଗି ଯାଇଥିବା ଗୋଡ଼ରେ ପ୍ଲାଷ୍ଟର କରିଥିଲେ। ବର୍ତ୍ତମାନ କୁକୁରଟି ସୁସ୍ଥ ହେଉଥିବା ବେଳେ ସ୍ଥାନୀୟ ପଶୁପ୍ରେମୀମାନେ ଏହାର ଯତ୍ନ ନେଉଛନ୍ତି।
ଘଟଣାକୁ ନେଇ ବାସିନ୍ଦା ଓ ପଶୁପ୍ରେମୀମାନେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ସେମାନଙ୍କ କହିବା କଥା, ବୁଲା ପଶୁମାନଙ୍କ ପ୍ରତି ଏଭଳି ନିଷ୍ଠୁର ବ୍ୟବହାର କୌଣସି ସଭ୍ୟ ସମାଜରେ ଗ୍ରହଣୀୟ ନୁହେଁ। ଘଟଣାର ତଦନ୍ତ କରାଯିବା ସହ ଦୋଷୀଙ୍କ ବିରୋଧରେ ଆଇନଗତ ପଦକ୍ଷେପ ନେବାକୁ ସେମାନେ ଦାବି କରିଛନ୍ତି।
