ଓଡ଼ିଶା ଡଟ୍ ନ୍ୟୁଜ୍4/04/2025 at 9:17 AM
ଭୁବନେଶ୍ବର: ରାତି ପାହିଲେ ବାବା ଲିଙ୍ଗରାଜଙ୍କ ରୁକୁଣା ରଥଯାତ୍ରା । ମହାପ୍ରଭୁ ଲିଙ୍ଗରାଜ ଦୋଳଗୋବିନ୍ଦ ଓ ଭଉଣୀ ରୁକୁଣା ରଥରେ ବିଜେ ହୋଇ ମାଉସୀ ଘରକୁ ଯାତ୍ରା କରିବେ । ଏନେଇ ମନ୍ଦିର ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । ରଥ ଖଳାରେ ରଥ ନିର୍ମାଣ ଶେଷ ହୋଇଥିବା ବେଳେ ଆଜି ମନ୍ଦିର ପ୍ରଶାସନକୁ ହସ୍ତାନ୍ତର କରିବେ ସେବାୟତ । ସେପଟେ ସୌନ୍ଦର୍ଯ୍ୟକରଣ, ଆଲୋକୀକରଣ, ଫୁଲ ସଜ୍ଜା ଓ ସ୍ବଛତା ନେଇ ବିଏମସି ବ୍ୟାପକ ପ୍ରସ୍ତୁତି କରିଛି ।
ଶନିବାର ହେବ ଲିଙ୍ଗରାଜଙ୍କ ରୁକୁଣା ରଥଯାତ୍ରା । ରଥ ଖଳାରେ ୬୫ ଜଣ ସେବାୟତ ଦୀର୍ଘ ୧୦ ଦିନ ଲଶଗି ରଥ ନିର୍ମାଣ କରିଛନ୍ତି । ଆଜି ମନ୍ଦିର ପ୍ରଶାସନକୁ ହସ୍ତାନ୍ତର ପରେ ସନ୍ଧ୍ୟାରେ ରଥ ପ୍ରତିଷ୍ଠା କରାଯିବ । ସେପଟେ ଏକାମ୍ର ସାଂସ୍କୃତିକ ପ୍ରକାଶନ ପକ୍ଷରୁ ୬ ଦିନ ଧରି ଲିଙ୍ଗରାଜ ଫେଷ୍ଟିଭାଲ ପାଳନ ହେବ । ୧୧ଟି ରାଜ୍ୟର ୩୬ଟି ଗ୍ରୁପ କଳାକାରଙ୍କ ଦ୍ଵାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ । ଏଥିରେ ୮ ଶହରୁ ଊର୍ଦ୍ଧ୍ବ କଳାକାର ସାମିଲ ହେବେ । ପ୍ରତ୍ୟେକ ଦିନ ୬ଟି ଗ୍ରୁପ, ୩ ଓଡ଼ିଶାର ଓ ୩ଟି ଗ୍ରୁପ ଓଡ଼ିଶା ବାହାରୁ ଆସିବେ ।
ରୁକୁଣା ରଥଯାତ୍ରା ନେଇ ବିଏମସି ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଲିଙ୍ଗରାଜ ମନ୍ଦିର ପାଖରୁ ନେଇ ରଥ ରୋଡ ସବୁର ପରିଷ୍କାର କରାଯିବ । ୫ରୁ ୯ ତାରିଖ ପର୍ଯ୍ୟନ୍ତ ମନ୍ଦିରରୁ ମରିଚିକୋଟ ଛକ ପର୍ଯ୍ୟନ୍ତ ଆଲୋକମାଳାରେ ସଜାଯିବ । ଫୁଲରେ ସଜେଇ ହେବ ମନ୍ଦିର । ବିଭିନ୍ନ ସ୍ଥାନରେ ଅସ୍ଥାୟୀ ଶୌଚାଳୟ ସହ ପ୍ରାଥମିକ ଚିକିତ୍ସାଳୟ କରାଯିବ । ଜରୁରୀ ପରିସ୍ଥିତି ପାଇଁ ଆମ୍ବୁଲାନ୍ସ ପ୍ରସ୍ତୁତ ରହିବ । ଖରାକୁ ଦେଖି ବିଭିନ୍ନ ସ୍ଥାନରେ ପିଇବା ପାଣି ଘୋଳ ଦହି ଆଦିର ବ୍ୟବସ୍ଥା କରାଯାଇଛି । ମ୍ୟୁନିସପାଲିଟି ହସ୍ପିଟାଲରେ ଗାଡି ପାର୍କିଂ ପାଇଁ ବାରଣ କରାଯାଇଛି । ୫ ତାରିଖ ଅପରାହ୍ନ ୩ଟାରେ ରଥଟଣା ଆରମ୍ଭ ହେବ । ଏହାର ୬ ଦିନ ପରେ ବାହୁଡା ଯାତ୍ରା ।