ପୁରୁଷ ମୃତଦେହ ଗୁପ୍ତାଙ୍ଗର ଆକାର ସମ୍ପର୍କିତ ମନ୍ତବ୍ୟକୁ ନେଇ କ୍ଷମା ମାଗିଲେ ମହିଳା ଡାକ୍ତର
କମେଡିଆନ୍ ପ୍ରଣିତ ମୋରେଙ୍କ ଏକ ଶୋ’ରେ କରିଥିବା ବିବାଦୀୟ ମନ୍ତବ୍ୟ ପାଇଁ ମହିଳା ଡାକ୍ତର ସେଜଲ ପାୱାର ସାର୍ବଜନୀନ ଭାବେ କ୍ଷମା ପ୍ରାର୍ଥନା କରିଛନ୍ତି। ସୋସିଆଲ ମିଡିଆରେ ଶୋ’ର ଏକ ଭିଡିଓ କ୍ଲିପ୍ ଭାଇରାଲ ହେବା ପରେ ତାଙ୍କ ବିରୋଧରେ ତୀବ୍ର ସମାଲୋଚନା ଆରମ୍ଭ ହୋଇଥିଲା।
ଭାଇରାଲ ଭିଡିଓରେ ପ୍ରଣିତ ମୋରେ ଡାକ୍ତରମାନେ ପୋଷ୍ଟମର୍ଟମ ସମୟରେ ସବୁବେଳେ ଗମ୍ଭୀର ରହନ୍ତି କି ମଜାକ କରନ୍ତି ବୋଲି ପଚାରିଥିଲେ। ଏହାର ଉତ୍ତରରେ ସେଜଲ ପାୱାର ଆନାଟୋମି ସମ୍ପର୍କିତ ଅନୁଭୂତି ବର୍ଣ୍ଣନା କରିବା ସମୟରେ ପୁରୁଷ ମୃତଦେହଙ୍କ ଗୁପ୍ତାଙ୍ଗର ଆକାରକୁ ନେଇ ସହକର୍ମୀମାନଙ୍କ ମଧ୍ୟରେ ଆଲୋଚନା ହେଉଥିବା କଥା କହିଥିଲେ। ଏହି ମନ୍ତବ୍ୟକୁ ଅନେକେ ଅସମ୍ମାନଜନକ ଓ ଅନୁଚିତ ବୋଲି ଅଭିହିତ କରିଥିଲେ।
ବିବାଦ ବଢ଼ିବା ପରେ ସେଜଲ ପାୱାର ଏକ ଭିଡିଓ ଜାରି କରି କହିଛନ୍ତି, “ମୁଁ ଅତ୍ୟନ୍ତ ଦୁଃଖିତ। ମୁଁ ଏକ ଭୁଲ କଥା କହିଥିଲି ଏବଂ ସେଥିପାଇଁ କ୍ଷମା ମାଗୁଛି। ମୋର କେବେ ବି ଏଭଳି କିଛି କହିବାର ଇଚ୍ଛା ନଥିଲା।” ସେ କହିଛନ୍ତି ଯେ ତାଙ୍କର ମନ୍ତବ୍ୟକୁ ଏଭଳି ଭାବେ ନିଆଯିବ ବୋଲି ସେ ଭାବିନଥିଲେ ଏବଂ ଏହାକୁ ସେ କୌଣସି ପ୍ରକାରେ ଯୁକ୍ତିସଙ୍ଗତ ବୋଲି ପ୍ରମାଣ କରିବାକୁ ଚାହୁଁନାହାନ୍ତି।
ସେ ଆହୁରି କହିଛନ୍ତି ଯେ ଏହି ଘଟଣା ପ୍ରାୟ ଦୁଇ ମାସ ପୂର୍ବରୁ ତାଙ୍କର ପ୍ରଥମ ଷ୍ଟାଣ୍ଡ-ଅପ୍ କମେଡି ଶୋ’ରେ ଘଟିଥିଲା। ସେ ସମୟରେ ସେ ଏତେ ବଡ଼ ପ୍ରତିକ୍ରିୟା ଆସିବ ବୋଲି କଳ୍ପନା କରିନଥିଲେ। ତଥାପି ସେ ନିଜ ମନ୍ତବ୍ୟ ପାଇଁ ସମ୍ପୂର୍ଣ୍ଣ ଦାୟିତ୍ୱ ନେଇଛନ୍ତି ଏବଂ ଏପରି ଭୁଲ ଆଉ ନ ଦୋହରାଇବାକୁ ପ୍ରତିଶ୍ରୁତି ଦେଇଛନ୍ତି।
