ଜୋରହାଟ ଏୟାରବେସରେ ଦୁର୍ଘଟଣାଗ୍ରସ୍ତ ବାୟୁସେନାର ଏଏନ-୩୨ ବିମାନ, ଲାଣ୍ଡିଂ ପରେ ଲାଗିଲା ନିଆଁ
ଆସାମର ଜୋରହାଟ ଏୟାରବେସରେ ଭାରତୀୟ ବାୟୁସେନାର ଏକ ଏଏନ-୩୨ ପରିବହନ ବିମାନ ଦୁର୍ଘଟଣାଗ୍ରସ୍ତ ହୋଇଛି। ପ୍ରାରମ୍ଭିକ ସୂଚନା ଅନୁଯାୟୀ, ବିମାନଟି ଅବତରଣ କରିବା ପରେ ହଠାତ୍ ନିଆଁ ଲାଗିଯାଇଥିଲା। ଜୋରହାଟ ଏୟାରବେସ ଭିତରେ ଏହି ଅଘଟଣ ଘଟିଥିବା ବେଳେ ଏୟାରବେସର ଅଗ୍ନିଶମ ବାହିନୀ ଓ ଜରୁରୀକାଳୀନ ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ନିୟନ୍ତ୍ରଣ କରିଥିଲେ। ଦୁର୍ଘଟଣା ପରେ ବିମାନଟି ଦୁଇ ଖଣ୍ଡ ହୋଇଯାଇଥିବା ଜଣାପଡ଼ିଛି।
ରିପୋର୍ଟ ଅନୁସାରେ, ବିମାନଟି ନିର୍ଦ୍ଧାରିତ ରନୱେରେ ସଠିକ୍ ଭାବେ ଅବତରଣ କରିପାରିନଥିଲା ଏବଂ ଏୟାରବେସର ଅନ୍ୟ ଏକ ସ୍ଥାନରେ ଅବତରଣ କରିଥିଲା। ଅବତରଣ ପରେ ବିସ୍ଫୋରଣ ସଦୃଶ ଶବ୍ଦ ସହ ନିଆଁ ଲାଗିଥିବା କୁହାଯାଉଛି। ଏହାଫଳରେ ବିମାନଟି ଭାଙ୍ଗି ଦୁଇ ଭାଗ ହୋଇଯାଇଥିଲା। ତେବେ ଦୁର୍ଘଟଣାର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
ଜୋରହାଟର ରୋଉରିଆ ବାୟୁସେନା ଘାଟି ଉତ୍ତର-ପୂର୍ବ ଭାରତରେ ଭାରତୀୟ ବାୟୁସେନାର ଏକ ପ୍ରମୁଖ ସାମରିକ ଘାଟି ଭାବେ ପରିଚିତ। ଏଠାରୁ ସାମରିକ ଅଭିଯାନ, ଲଜିଷ୍ଟିକ୍ ସହାୟତା ଏବଂ ରଣନୈତିକ କାର୍ଯ୍ୟକଳାପ ପରିଚାଳନା କରାଯାଇଥାଏ। ବିମାନରେ ଥିବା କ୍ରୁ ସଦସ୍ୟ ଓ ଅନ୍ୟ ବାୟୁସେନା କର୍ମଚାରୀଙ୍କ ଅବସ୍ଥା ସମ୍ପର୍କରେ ଏପର୍ଯ୍ୟନ୍ତ ସରକାରୀ ଭାବେ କୌଣସି ସୂଚନା ମିଳିନାହିଁ। ଭାରତୀୟ ବାୟୁସେନା ଘଟଣାର ତଦନ୍ତ ଆରମ୍ଭ କରିଥିବା ବେଳେ ଶୀଘ୍ର ବିସ୍ତୃତ ରିପୋର୍ଟ ପ୍ରକାଶ ପାଇବ ବୋଲି ଆଶା କରାଯାଉଛି।
