ଇରାନ ଚୁକ୍ତି ନ ହେଲେ ପୁଣି ଆକ୍ରମଣ ଚେତାବନୀ, ନେତନ୍ୟାହୁଙ୍କୁ ‘କଠିନ ବ୍ୟକ୍ତି’ କହିଲେ ଟ୍ରମ୍ପ
ୱାଶିଂଟନ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ସହ ଚାଲିଥିବା ପରମାଣୁ ଚୁକ୍ତି ଆଲୋଚନାକୁ ନେଇ କଡ଼ା ସନ୍ଦେଶ ଦେଇଛନ୍ତି। ସେ କହିଛନ୍ତି, ଯଦି ଇରାନ ଆମେରିକା ସହ ଅନ୍ତିମ ପରମାଣୁ ଚୁକ୍ତିରେ ପହଞ୍ଚିବାରେ ବିଫଳ ହୁଏ, ତେବେ ଆମେରିକା ପୁଣିଥରେ ସାମରିକ ଆକ୍ରମଣ ଆରମ୍ଭ କରିପାରେ। ଏହା ସହିତ ଟ୍ରମ୍ପ ଦାବି କରିଛନ୍ତି ଯେ, ପ୍ରସ୍ତାବିତ ଚୁକ୍ତି କାର୍ଯ୍ୟକାରୀ ହେଲେ ବିଶ୍ୱ ବାଣିଜ୍ୟ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହର୍ମୁଜ୍ ଜଳପଥ ସ୍ଥାୟୀ ଭାବେ ସମସ୍ତଙ୍କ ପାଇଁ ମୁକ୍ତ ରହିବ।
ଏକ ସାକ୍ଷାତକାରରେ ଟ୍ରମ୍ପ ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ୟାହୁଙ୍କୁ “ଅତ୍ୟନ୍ତ କଠିନ ବ୍ୟକ୍ତି” ବୋଲି ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ, ନେତନ୍ୟାହୁ ଆମେରିକା ପ୍ରତି କୃତଜ୍ଞ ରହିବା ଉଚିତ, କାରଣ ଯଦି ଇରାନ ପରମାଣୁ ଅସ୍ତ୍ର ହାସଲ କରିଥାନ୍ତା, ତେବେ ଇସ୍ରାଏଲର ଅସ୍ତିତ୍ୱ ଗୁରୁତର ବିପଦରେ ପଡ଼ିଥାନ୍ତା। ଉଲ୍ଲେଖଯୋଗ୍ୟ, ଆମେରିକା-ଇରାନ ମଧ୍ୟରେ ହୋଇଥିବା ନୂଆ ଚୁକ୍ତି ଆଲୋଚନାରେ ଇସ୍ରାଏଲ ସିଧାସଳଖ ଭାବେ ସାମିଲ ନଥିଲା।
ଟ୍ରମ୍ପଙ୍କ ଏହି ମନ୍ତବ୍ୟ ମଧ୍ୟପ୍ରାଚ୍ୟ ରାଜନୀତିରେ ନୂଆ ଚର୍ଚ୍ଚା ସୃଷ୍ଟି କରିଛି। ଇରାନ ସହ ସମ୍ଭାବ୍ୟ ଚୁକ୍ତିକୁ ନେଇ ଇସ୍ରାଏଲର ଅନେକ ନେତା ଓ ସୁରକ୍ଷା ବିଶେଷଜ୍ଞ ଚିନ୍ତା ପ୍ରକାଶ କରୁଥିବା ବେଳେ, ଟ୍ରମ୍ପଙ୍କ ବୟାନ ଦୁଇ ଦେଶ ମଧ୍ୟରେ କୂଟନୈତିକ ମତଭେଦକୁ ସାମ୍ନାକୁ ଆଣିଛି। ଏବେ ଇରାନ-ଆମେରିକା ଚୁକ୍ତିର ଅନ୍ତିମ ରୂପ ଏବଂ ଏହାର ମଧ୍ୟପ୍ରାଚ୍ୟ ଉପରେ ପ୍ରଭାବ ଉପରେ ସମସ୍ତଙ୍କ ନଜର ରହିଛି।
