ବିଜୟ-ସଙ୍ଗୀତା ପୁଣି ଏକାଠି ହେବେ କି? ଛାଡ଼ପତ୍ର ମାମଲା ମଧ୍ୟରେ ବଢ଼ିଲା ଚର୍ଚ୍ଚା
ଚେନ୍ନାଇ: ତାମିଲନାଡୁ ମୁଖ୍ୟମନ୍ତ୍ରୀ ଏବଂ ଅଭିନେତା ବିଜୟ ଓ ତାଙ୍କ ପତ୍ନୀ ସଙ୍ଗୀତା ସୋର୍ଣ୍ଣାଲିଙ୍ଗମଙ୍କ ସମ୍ପର୍କକୁ ନେଇ ପୁଣିଥରେ ଚର୍ଚ୍ଚା ଜୋର ଧରିଛି। ଉଭୟଙ୍କ ଛାଡ଼ପତ୍ର ମାମଲା ଜୁନ୍ ୧୫ରେ ଶୁଣାଣି ପାଇଁ ଆସୁଥିବା ବେଳେ, ସେମାନେ ମତଭେଦ ଦୂର କରି ପୁଣି ଏକାଠି ହେବାକୁ ଉଦ୍ୟମ କରୁଥିବା ନେଇ ବିଭିନ୍ନ ମହଲରେ ଆଲୋଚନା ଚାଲିଛି।
ଗଣମାଧ୍ୟମ ରିପୋର୍ଟ ଅନୁଯାୟୀ, ବିଜୟ ଓ ସଙ୍ଗୀତାଙ୍କ ମଧ୍ୟରେ ଆଲୋଚନା ଚାଲିଥିବା ଏବଂ ଉଭୟ ପକ୍ଷ ଶାନ୍ତିପୂର୍ଣ୍ଣ ଭାବେ ସମସ୍ୟାର ସମାଧାନ ଚାହୁଁଥିବା କୁହାଯାଉଛି। ବିଜୟଙ୍କ ମା’ ଶୋଭା ଚନ୍ଦ୍ରଶେଖର ଏହି ମଧ୍ୟସ୍ଥତାରେ ଭୂମିକା ନେଉଥିବା ନେଇ ମଧ୍ୟ ଚର୍ଚ୍ଚା ହେଉଛି। ତେବେ ଏହି ସମସ୍ତ ସୂଚନାକୁ ନେଇ ବିଜୟ କିମ୍ବା ସଙ୍ଗୀତାଙ୍କ ପକ୍ଷରୁ କୌଣସି ସରକାରୀ ପ୍ରତିକ୍ରିୟା ଆସିନାହିଁ।
ସଙ୍ଗୀତା ନିକଟ ଅତୀତରେ ବିଜୟଙ୍କ ଅନେକ ରାଜନୈତିକ ଓ ସାର୍ବଜନିକ କାର୍ଯ୍ୟକ୍ରମରେ ଅନୁପସ୍ଥିତ ରହିବା ପରେ ଦାମ୍ପତ୍ୟ ଜୀବନରେ ଦୂରତା ନେଇ ଗୁଜବ ଆରମ୍ଭ ହୋଇଥିଲା। ସେ ଲଣ୍ଡନରେ ସନ୍ତାନମାନଙ୍କ ସହ ରହୁଥିବା ବେଳେ, ଚଳିତ ବର୍ଷ ଉଭୟଙ୍କ ମଧ୍ୟରେ ମତଭେଦକୁ ନେଇ ଛାଡ଼ପତ୍ର ଆବେଦନ ଦାଖଲ ହୋଇଥିବା କୁହାଯାଇଥିଲା। ଜୁନ୍ ୧୫ର ଶୁଣାଣି ପୂର୍ବରୁ ଉଭୟ ପକ୍ଷ ମଧ୍ୟରେ ସମଝୋତାର ସମ୍ଭାବନା ବଢ଼ିଥିବାରୁ ପୁଣି ମିଳନ ହେବ କି ନାହିଁ ସେନେଇ ପ୍ରଶଂସକ ଓ ରାଜନୈତିକ ମହଲ ଉତ୍ସୁକତାର ସହ ଅପେକ୍ଷା କରିଛନ୍ତି।
