୬୦ ବର୍ଷ ବୟସରେ ଫେସବୁକ୍ରେ ମିଳିଲା ଜୀବନସାଥୀ, ପ୍ରେମ କାହାଣୀ କହିଲେ ଅଭିନେତ୍ରୀ ସୁହାସିନୀ ମୁଲେ
‘ଲଗାନ୍’ ଓ ‘ଜୋଧା ଅକବର’ ଭଳି ଚର୍ଚ୍ଚିତ ଚଳଚ୍ଚିତ୍ରରେ ଅଭିନୟ କରିଥିବା ଅଭିନେତ୍ରୀ ସୁହାସିନୀ ମୁଲେ ୬୦ ବର୍ଷ ବୟସରେ ନିଜ ଜୀବନସାଥୀଙ୍କୁ ପାଇଥିଲେ। ଏକ ସାକ୍ଷାତକାରରେ ସେ କହିଛନ୍ତି ଯେ, ଏହା ପୂର୍ବରୁ ସେ ନିଜ ଚିନ୍ତାଧାରା ସହ ମେଳ ଖାଉଥିବା ଉପଯୁକ୍ତ ସାଥୀଙ୍କୁ ଖୋଜି ପାରିନଥିଲେ। ତାଙ୍କ ସ୍ୱାମୀ ଅତୁଲ ଗୁରୁତ୍ୱପୂର୍ଣ୍ଣ ବୈଜ୍ଞାନିକ ହୋଇଥିବା ବେଳେ ସେମାନଙ୍କର ପରିଚୟ ଫେସବୁକ୍ ମାଧ୍ୟମରେ ହୋଇଥିଲା।
ସୁହାସିନୀ କହିଛନ୍ତି, ଜଣେ ସହ-ଅଭିନେତାଙ୍କ ପରାମର୍ଶରେ ସେ ଫେସବୁକ୍ରେ ଯୋଗ ଦେଇଥିଲେ। ସେଠାରେ ଅତୁଲଙ୍କ ପ୍ରୋଫାଇଲ୍ ଦେଖି ତାଙ୍କ ପ୍ରତି ଆଗ୍ରହ ବଢ଼ିଥିଲା। ଲାର୍ଜ ହାଡ୍ରନ୍ କଲାଇଡର୍ (LHC) ଉପରେ କାମ କରୁଥିବା ଅତୁଲଙ୍କୁ ସେ ବିଜ୍ଞାନ ସମ୍ପର୍କିତ ଏକ ପ୍ରଶ୍ନ ପଚାରି ମେସେଜ୍ କରିଥିଲେ। ଏହା ପରେ ଦୁହେଁଙ୍କ ମଧ୍ୟରେ ଇ-ମେଲ୍ ଯୋଗେ କଥାବାର୍ତ୍ତା ଆରମ୍ଭ ହୋଇଥିଲା ଏବଂ ଧୀରେ ଧୀରେ ସମ୍ପର୍କ ଗଭୀର ହୋଇଥିଲା।
ଅଭିନେତ୍ରୀଙ୍କ କହିବା ଅନୁସାରେ, ଅତୁଲ କେବେ ସିଧାସଳଖ ବିବାହ ପ୍ରସ୍ତାବ ଦେଇନଥିଲେ, କିନ୍ତୁ ଜୀବନସାଥୀ ଖୋଜୁଥିବା ଇଙ୍ଗିତ ଦେଇଥିଲେ। ଆରମ୍ଭରେ ସୁହାସିନୀ ଏହାକୁ ଗୁରୁତ୍ୱ ଦେଇନଥିଲେ। ତେବେ ସମୟ ସହିତ ଦୁହେଁ ପରସ୍ପରକୁ ବୁଝିପାରିଥିଲେ ଏବଂ ପରେ ବିବାହ କରିଥିଲେ। ସୁହାସିନୀଙ୍କ ଏହି ପ୍ରେମ କାହାଣୀ ଏବେ ସୋସିଆଲ୍ ମିଡିଆରେ ବେଶ ଚର୍ଚ୍ଚାର ବିଷୟ ପାଲଟିଛି।
