‘କକଟେଲ୍ ୨’କୁ A ସର୍ଟିଫିକେଟ୍ କାହିଁକି? ବୁଝିପାରୁନାହାନ୍ତି ଶାହିଦ କପୁର
ଅଭିନେତା ଶାହିଦ କପୁର ଅଭିନୀତ ‘କକଟେଲ୍ ୨’କୁ ସେନ୍ସର ବୋର୍ଡ ପକ୍ଷରୁ A ସର୍ଟିଫିକେଟ୍ ଦିଆଯିବା ନେଇ ପ୍ରଶ୍ନ ଉଠାଇଛନ୍ତି। ସୋସିଆଲ ମିଡିଆରେ ପ୍ରଶଂସକଙ୍କ ସହ ଆଲୋଚନା ବେଳେ ଶାହିଦ କହିଛନ୍ତି ଯେ ଫିଲ୍ମରେ ଏପରି କୌଣସି ଦୃଶ୍ୟ କିମ୍ବା ବିଷୟ ନାହିଁ ଯାହାକୁ ନେଇ ଦର୍ଶକଙ୍କ ଆପତ୍ତି ରହିପାରେ। ଏହା ତିନି ଜଣଙ୍କ କାହାଣୀ ଏବଂ ପରିବାର ସହ ବସି ଦେଖିହେବ ବୋଲି ସେ କହିଛନ୍ତି।
ଫିଲ୍ମ ମୁକ୍ତି ପୂର୍ବରୁ ଏହାର କାହାଣୀକୁ ନେଇ ବିଭିନ୍ନ ଗୁଜବ ଚର୍ଚ୍ଚା ହୋଇଥିଲା। ରଶ୍ମିକା ମନ୍ଦାନା ଓ କୃତି ସାନନଙ୍କ ଚରିତ୍ର ମଧ୍ୟରେ ପ୍ରେମ ସମ୍ପର୍କ ରହିଥିବା ଏବଂ ଫିଲ୍ମରେ ‘ଥ୍ରିସମ୍’ ଦୃଶ୍ୟ ଥିବା ନେଇ ଚର୍ଚ୍ଚା ହୋଇଥିଲା। ତେବେ କୃତି ସାନନ ସ୍ପଷ୍ଟ କରିଛନ୍ତି ଯେ ଫିଲ୍ମରେ କୌଣସି ସମଲିଙ୍ଗୀ ପ୍ରେମ କାହାଣୀ ନାହିଁ ଏବଂ ଏହା କେବଳ ତିନି ଜଣଙ୍କ ଭାବନାତ୍ମକ ସମ୍ପର୍କକୁ ନେଇ ନିର୍ମିତ।
ହୋମି ଅଡାଜାନିଆଙ୍କ ନିର୍ଦ୍ଦେଶିତ ଏହି ଫିଲ୍ମରେ ଶାହିଦ କପୁର, ରଶ୍ମିକା ମନ୍ଦାନା ଓ କୃତି ସାନନ ମୁଖ୍ୟ ଭୂମିକାରେ ଅଭିନୟ କରିଛନ୍ତି। ଜୁନ୍ ୧୯ରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ରରେ ଜଣେ ଦମ୍ପତିଙ୍କ ସମ୍ପର୍କରେ ତୃତୀୟ ବ୍ୟକ୍ତିଙ୍କ ପ୍ରବେଶ ପରେ ସୃଷ୍ଟି ହେଉଥିବା ଜଟିଳ ପରିସ୍ଥିତିକୁ ଦେଖାଯାଇଛି।
