କିଛି ମିନିଟ୍ ବିଳମ୍ବରେ ଭାଙ୍ଗିଗଲା ଡାକ୍ତର ହେବାର ସ୍ୱପ୍ନ; NEET ପରୀକ୍ଷା କେନ୍ଦ୍ର ବାହାରେ ବେହୋସ୍ ହେଲେ ଦିନମଜୁରିଆ ବାପା
ଡାକ୍ତର ହୋଇ ଲୋକଙ୍କ ଜୀବନ ବଞ୍ଚାଇବାର ସ୍ୱପ୍ନ ଦେଖୁଥିବା ୧୮ ବର୍ଷୀୟା ରାଗିନୀ ବିଶ୍ୱକର୍ମାଙ୍କ ପାଇଁ ରବିବାର ଏକ ଦୁଃଖଦ ଦିନ ହୋଇ ରହିଗଲା। ମଧ୍ୟପ୍ରଦେଶର ବିଦିଶାରେ ହୋଇଥିବା NEET ପୁନଃପରୀକ୍ଷାରେ ଯୋଗଦେବାକୁ ସେ ବାପାଙ୍କ ସହ ପରୀକ୍ଷା କେନ୍ଦ୍ରକୁ ପହଞ୍ଚିଥିଲେ। କିନ୍ତୁ ବର୍ଷା ଓ ରାସ୍ତାରେ ଟାୟାର ପଙ୍କଚର ହୋଇଯିବାରୁ ସେମାନେ କିଛି ମିନିଟ୍ ବିଳମ୍ବରେ ପହଞ୍ଚିଥିଲେ। ନିର୍ଦ୍ଧାରିତ ସମୟ ପରେ ପ୍ରବେଶ ନମିଳିବାରୁ ରାଗିନୀଙ୍କ ଦିନମଜୁରିଆ ବାପା ଉମେଶ ବିଶ୍ୱକର୍ମା ଭାବବିହ୍ୱଳ ହୋଇ ପରୀକ୍ଷା କେନ୍ଦ୍ର ବାହାରେ ବେହୋସ୍ ହୋଇ ପଡ଼ିଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଘଟଣାଟି ଚର୍ଚ୍ଚାର ବିଷୟ ପାଲଟିଛି।
କୁରୱାଇ ତହସିଲର କୁଲହନ ଗାଁର ରାଗିନୀ ଅତ୍ୟନ୍ତ ସାଧାରଣ ପରିବାରରୁ ଆସିଛନ୍ତି। ଅଷ୍ଟମ ଶ୍ରେଣୀ ପରେ ଉଚ୍ଚଶିକ୍ଷା ପାଇଁ ସେ ପ୍ରତିଦିନ ଦୂର ଯାତ୍ରା କରୁଥିଲେ। ଝିଅର ପଢ଼ା ପାଇଁ ପରିବାର ଋଣ କରି ସ୍କୁଟର କିଣିଥିଲେ ଏବଂ ସ୍ୱୟଂସହାୟକ ଗୋଷ୍ଠୀରୁ ପ୍ରାୟ ୭୦ ହଜାର ଟଙ୍କା ଋଣ ନେଇଥିଲେ। ଦ୍ୱାଦଶ ଶ୍ରେଣୀରେ ଭଲ ଫଳାଫଳ ପରେ ମିଳିଥିବା ସ୍କଲାରଶିପ୍ ଟଙ୍କାରେ ଲ୍ୟାପଟପ୍ କିଣି ସେ NEET ପ୍ରସ୍ତୁତି କରୁଥିଲେ। ପରିବାର ଅନୁସାରେ, ସେ ପ୍ରତିଦିନ ୮ରୁ ୧୦ ଘଣ୍ଟା ପଢ଼ୁଥିଲେ ଏବଂ ଡାକ୍ତର ହୋଇ କାର୍ଡିଓଲୋଜିଷ୍ଟ ହେବାର ସ୍ୱପ୍ନ ଦେଖୁଥିଲେ।
ପରୀକ୍ଷା କେନ୍ଦ୍ରରେ ପହଞ୍ଚିବା ପରେ କିଛି ବିଳମ୍ବିତ ଛାତ୍ରଛାତ୍ରୀଙ୍କ ସହ ରାଗିନୀଙ୍କୁ ଭିତରକୁ ନିଆଯାଇଥିଲା। କିନ୍ତୁ ବାୟୋମେଟ୍ରିକ୍ ଯାଞ୍ଚ ପ୍ରକ୍ରିୟା ନିର୍ଦ୍ଧାରିତ ସମୟ ସୀମା ମଧ୍ୟରେ ସମ୍ପୂର୍ଣ୍ଣ ନହେବାରୁ ସେ ପରୀକ୍ଷା ଦେଇପାରିନଥିଲେ। ଅଧିକାରୀମାନେ କହିଛନ୍ତି ଯେ, ଜାତୀୟ ନିୟମ ଅନୁଯାୟୀ ବାୟୋମେଟ୍ରିକ୍ ଯାଞ୍ଚ ବିନା କୌଣସି ପ୍ରାର୍ଥୀଙ୍କୁ ପରୀକ୍ଷା ଦେବାକୁ ଅନୁମତି ଦିଆଯାଇପାରିବ ନାହିଁ। ବିଦିଶା ଜିଲ୍ଲାର ଚାରିଟି କେନ୍ଦ୍ରରେ ଆୟୋଜିତ ଏହି ପରୀକ୍ଷାରେ ୧,୭୦୦ରୁ ଅଧିକ ପ୍ରାର୍ଥୀ ଯୋଗଦେଇଥିଲେ। ତେବେ ରାଗିନୀଙ୍କ ଘଟଣା ନିୟମ ଓ ମାନବିକତା ମଧ୍ୟରେ ସନ୍ତୁଳନ ନେଇ ନୂଆ ଚର୍ଚ୍ଚା ସୃଷ୍ଟି କରିଛି।
