କୁରିଆନଙ୍କ ଇସ୍ତଫା ପରେ BJPରେ ବଡ଼ ଅଦଳବଦଳ ଚର୍ଚ୍ଚା, ଏମ୍ପି ମୁଖ୍ୟମନ୍ତ୍ରୀ ମୋହନ ଯାଦବଙ୍କ ଭୂମିକା ନେଇ ବଢ଼ିଲା ଜଳ୍ପନା
କେନ୍ଦ୍ରୀୟ ଅଲ୍ପସଂଖ୍ୟକ ବ୍ୟାପାର ରାଷ୍ଟ୍ରମନ୍ତ୍ରୀ ଜର୍ଜ କୁରିଆନ ମଙ୍ଗଳବାର ମନ୍ତ୍ରିମଣ୍ଡଳରୁ ଇସ୍ତଫା ଦେବା ପରେ ଭାଜପାରେ ବଡ଼ ଧରଣର ସାଙ୍ଗଠନିକ ଓ ମନ୍ତ୍ରିମଣ୍ଡଳୀୟ ଅଦଳବଦଳ ନେଇ ଚର୍ଚ୍ଚା ଜୋର ଧରିଛି। ରାଜ୍ୟସଭା ସଦସ୍ୟତାର ମିଆଦ ଶେଷ ହେବା ପରେ ଦଳ ତାଙ୍କୁ ପୁନଃ ମନୋନୀତ କରିନଥିବାରୁ ଏହି ପଦକ୍ଷେପକୁ ଆଗାମୀ ରାଜନୈତିକ ପରିବର୍ତ୍ତନର ସଙ୍କେତ ବୋଲି ଦେଖାଯାଉଛି। ଦଳୀୟ ସୂତ୍ର ଅନୁସାରେ, ୨୦୨୯ ଲୋକସଭା ନିର୍ବାଚନ ଓ ତା’ ପୂର୍ବରୁ ହେବାକୁ ଥିବା ବିଭିନ୍ନ ରାଜ୍ୟ ନିର୍ବାଚନକୁ ନଜରରେ ରଖି BJP ନୂତନ ପିଢ଼ିର ନେତୃତ୍ୱକୁ ଆଗକୁ ଆଣିବା ଯୋଜନା କରୁଛି।
ଏହି ପରିପ୍ରେକ୍ଷୀରେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମୋହନ ଯାଦବଙ୍କ ନାମ ମଧ୍ୟ ଚର୍ଚ୍ଚାରେ ଆସିଛି। ଭୂମି କାରବାର ସମ୍ପର୍କିତ କଥିତ ଅନିୟମିତତାକୁ ନେଇ ବିରୋଧୀ ଦଳ ତାଙ୍କ ଇସ୍ତଫା ଦାବି କରୁଥିବା ବେଳେ BJP ଭିତରେ ମଧ୍ୟ ତାଙ୍କ କାର୍ଯ୍ୟଦକ୍ଷତାକୁ ନେଇ ସମୀକ୍ଷା ଚାଲିଥିବା ଖବର ମିଳିଛି। ଏହାସହ ରାଜସ୍ଥାନର ମୁଖ୍ୟମନ୍ତ୍ରୀ ଭଜନଲାଲ ଶର୍ମାଙ୍କ କାର୍ଯ୍ୟଦକ୍ଷତା ନେଇ ମଧ୍ୟ ଦଳ ଓ RSSର କିଛି ମହଳରେ ଅସନ୍ତୋଷ ଥିବା କୁହାଯାଉଛି। ତେବେ ଏହି ସମସ୍ତ ଖବରକୁ ନେଇ କୌଣସି ଆଧିକାରିକ ସ୍ପଷ୍ଟୀକରଣ ଆସିନାହିଁ।
ଅନ୍ୟପଟେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ଅଭିଯୋଗ କରିଛନ୍ତି ଯେ, BJP ନିଜ ମୁଖ୍ୟମନ୍ତ୍ରୀମାନଙ୍କୁ ବଦଳାଇବା ପାଇଁ ଏକ ଯୋଜନାବଦ୍ଧ ଅଭିଯାନ ଚାଲାଇଛି। ସେ କହିଛନ୍ତି ଯେ ମୋହନ ଯାଦବଙ୍କ ବିରୋଧରେ ଆସୁଥିବା ଅଭିଯୋଗଗୁଡ଼ିକ ରାଜନୈତିକ ଉଦ୍ଦେଶ୍ୟପ୍ରଣୋଦିତ। ଏହି ସମୟରେ ପଞ୍ଜାବର BJP ନେତା ରବନୀତ ସିଂହ ବିଟ୍ଟୁଙ୍କୁ ଦଳ ବଡ଼ ଦାୟିତ୍ୱ ଦେବା ନେଇ ମଧ୍ୟ ଚର୍ଚ୍ଚା ଚାଲିଛି। କୁରିଆନଙ୍କ ଇସ୍ତଫାକୁ BJPର ଆଗାମୀ ବଡ଼ ରାଜନୈତିକ ପୁନର୍ଗଠନର ଆରମ୍ଭ ବୋଲି ରାଜନୈତିକ ମହଳରେ ଆଲୋଚନା ହେଉଛି।
