ଭେନେଜୁଏଲାରେ ଦୁଇ ଶକ୍ତିଶାଳୀ ଭୂମିକମ୍ପ, କାରାକାସରେ କୋଠା ଭୁଶୁଡ଼ିଲା; ସୁନାମି ସତର୍କତା ଜାରି
ଭେନେଜୁଏଲାରେ ବୁଧବାର ସନ୍ଧ୍ୟାରେ ପରପର ଦୁଇଟି ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି, ଯାହାଫଳରେ ରାଜଧାନୀ କାରାକାସ ସମେତ ଅନେକ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି। ଆମେରିକାର ଭୂତତ୍ତ୍ୱ ସର୍ବେକ୍ଷଣ (USGS) ଅନୁଯାୟୀ, ପ୍ରଥମ ଭୂମିକମ୍ପର ତୀବ୍ରତା ୭.୧ ଏବଂ କିଛି ମିନିଟ୍ ପରେ ଦ୍ୱିତୀୟ ଭୂମିକମ୍ପର ତୀବ୍ରତା ୭.୫ ରେକର୍ଡ କରାଯାଇଥିଲା। ଏହା ପରେ ଆମେରିକାର ପ୍ରଶାନ୍ତ ମହାସାଗରୀୟ ସୁନାମି ଚେତାବନୀ କେନ୍ଦ୍ର ପୁଏର୍ଟୋ ରିକୋ ଓ ଭର୍ଜିନ୍ ଦ୍ୱୀପପୁଞ୍ଜ ପାଇଁ ସୁନାମି ସତର୍କତା ଜାରି କରିଛି।
USGS ସୂଚନା ଅନୁସାରେ, ପ୍ରଥମ ଭୂମିକମ୍ପ କାରାକାସଠାରୁ ପ୍ରାୟ ୧୬୮ କିଲୋମିଟର ଦୂରରେ କାରିବିଆନ୍ ଉପକୂଳର ମୋରୋନ୍ ନିକଟରେ ୧୩ କିଲୋମିଟର ଗଭୀରତାରେ ଘଟିଥିଲା। ଦ୍ୱିତୀୟ ଭୂମିକମ୍ପ ମୋରୋନ୍ଠାରୁ ପ୍ରାୟ ୧୬ କିଲୋମିଟର ଦୂରରେ ୧୦ କିଲୋମିଟର ଗଭୀରତାରେ ରେକର୍ଡ ହୋଇଥିଲା। କାରାକାସରେ ଅନେକ କୋଠା କ୍ଷତିଗ୍ରସ୍ତ ହୋଇଥିବା ବେଳେ କେତେକ ସ୍ଥାନରେ କୋଠା ଭୁଶୁଡ଼ି ପଡ଼ିଛି। ଭୂମିକମ୍ପ ଅନୁଭୂତ ହେବାମାତ୍ରେ ଲୋକମାନେ ଘର ଓ କାର୍ଯ୍ୟାଳୟ ଛାଡ଼ି ରାସ୍ତାକୁ ଦୌଡ଼ି ଆସିଥିଲେ। ସହରର ବିଭିନ୍ନ ଅଞ୍ଚଳରେ ଧୂଳିର ବଡ଼ ବଡ଼ ମେଘ ଦେଖିବାକୁ ମିଳିଥିଲା।
ଭେନେଜୁଏଲାର ଗୃହମନ୍ତ୍ରୀ ଦିଓସଡାଡୋ କାବେୟୋ କହିଛନ୍ତି ଯେ, କାରାକାସର ଆଲ୍ଟାମିରା ଅଞ୍ଚଳରେ ସ୍ଥିତି ଗୁରୁତର ରହିଛି ଏବଂ ଅନେକ କୋଠା କ୍ଷତିଗ୍ରସ୍ତ ହୋଇଛି। ପରବର୍ତ୍ତୀ ଝଟକାର ଆଶଙ୍କା ଥିବାରୁ ଲୋକଙ୍କୁ କ୍ଷତିଗ୍ରସ୍ତ କୋଠା ଭିତରକୁ ନଯିବାକୁ ପରାମର୍ଶ ଦିଆଯାଇଛି। କିଛି ଲୋକ ଆହତ ହୋଇଥିବା ସୂଚନା ମିଳିଥିବା ବେଳେ ଉଦ୍ଧାରକାରୀ ଦଳ ଓ ଜରୁରୀକାଳୀନ ସେବା ସଂସ୍ଥାଗୁଡ଼ିକ ଘଟଣାସ୍ଥଳରେ ରିଲିଫ୍ ଓ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। କର୍ତ୍ତୃପକ୍ଷ ସମସ୍ତଙ୍କୁ ସତର୍କ ରହିବା ସହ ପରସ୍ପରକୁ ସହଯୋଗ କରିବାକୁ ଆହ୍ୱାନ ଜଣାଇଛନ୍ତି।
