କେତନ ଅଗ୍ରୱାଲ ହତ୍ୟା ମାମଲା: ପରସ୍ପର ଉପରେ ଦୋଷ ଲଦୁଛନ୍ତି ସିୟା ଓ ଚେତନ
ପୁଣେର ବହୁଚର୍ଚ୍ଚିତ କେତନ ଅଗ୍ରୱାଲ ହତ୍ୟା ମାମଲାରେ ନୂଆ ମୋଡ଼ ଆସିଛି। ୨୫ ବର୍ଷୀୟ କେତନଙ୍କୁ ହତ୍ୟା କରିବା ଅଭିଯୋଗରେ ଗିରଫ ହୋଇଥିବା ତାଙ୍କ ଭାବି ପତ୍ନୀ ସିୟା ଗୋୟଲ (୨୦) ଏବଂ ତାଙ୍କ ପ୍ରେମିକ ଚେତନ ଚୌଧୁରୀ (୨୨) ଏବେ ପରସ୍ପର ଉପରେ ହତ୍ୟା ଷଡ଼ଯନ୍ତ୍ରର ଦୋଷ ଲଦୁଛନ୍ତି। ପୋଲିସ କହିଛି, ଉଭୟଙ୍କ ବୟାନରେ ପରସ୍ପର ବିରୋଧୀ ତଥ୍ୟ ସାମ୍ନାକୁ ଆସୁଛି ଏବଂ ତଦନ୍ତ ଜାରି ରହିଛି।
ଗତ ଜୁନ୍ ୧୮ ତାରିଖରେ ପୁଣେ ନିକଟସ୍ଥ ଲୋହାଗଡ଼ କିଲ୍ଲା ପାଖରେ ଥିବା ଏକ ଖାଇକୁ ଖସିପଡ଼ି କେତନଙ୍କ ମୃତ୍ୟୁ ଘଟିଥିଲା। ପ୍ରଥମେ ଏହାକୁ ଦୁର୍ଘଟଣା ବୋଲି ଧରାଯାଇଥିଲେ ମଧ୍ୟ ପରବର୍ତ୍ତୀ ତଦନ୍ତରେ ପୋଲିସ ଦାବି କରିଛି ଯେ କେତନଙ୍କୁ ଇଚ୍ଛାକୃତ ଭାବେ ତଳକୁ ଠେଲି ଦିଆଯାଇଥିଲା। ଏହି ଘଟଣାରେ ସିୟା ଓ ଚେତନଙ୍କୁ ହତ୍ୟା ଏବଂ ଆପରାଧିକ ଷଡ଼ଯନ୍ତ୍ର ମାମଲାରେ ଗିରଫ କରାଯାଇଛି।
କେତନ ଜଣେ ପ୍ରସିଦ୍ଧ ରିଅଲ୍ ଇଷ୍ଟେଟ୍ ବ୍ୟବସାୟୀଙ୍କ ପୁଅ ଥିବା ସହ ପାରିବାରିକ କମ୍ପାନୀର ନିର୍ଦ୍ଦେଶକ ଥିଲେ। ପୋଲିସ ଉଭୟ ଅଭିଯୁକ୍ତଙ୍କୁ ପଚରାଉଚରା କରୁଥିବା ବେଳେ ଘଟଣାର ସମସ୍ତ ଦିଗକୁ ଖତିଆନ କରୁଛି। ତଦନ୍ତ ଶେଷ ହେବା ପରେ ପ୍ରକୃତ ଷଡ଼ଯନ୍ତ୍ର ଓ ହତ୍ୟାର ଦାୟିତ୍ୱ ସମ୍ପର୍କରେ ସ୍ପଷ୍ଟ ଚିତ୍ର ସାମ୍ନାକୁ ଆସିବ ବୋଲି ପୋଲିସ ସୂଚନା ଦେଇଛି।
