ଅପରେସନ ‘ଟାଇଗର ୩.୦’କୁ ନେଇ ମହାରାଷ୍ଟ୍ର ରାଜନୀତିରେ ହଇଚଇ; ଉଦ୍ଧବ ଶିବିରର ୧୪ ବିଧାୟକ ସିନ୍ଦେ ଦଳକୁ ଯିବା ଚର୍ଚ୍ଚା
ମହାରାଷ୍ଟ୍ର ରାଜନୀତିରେ ପୁଣି ଥରେ ଦଳବଦଳ ଚର୍ଚ୍ଚା ଜୋର ଧରିଛି। ଉଦ୍ଧବ ଠାକ୍ରେଙ୍କ ନେତୃତ୍ୱାଧୀନ ଶିବସେନା (ୟୁବିଟି)ର ୧୪ ଜଣ ବିଧାୟକ ଏକନାଥ ସିନ୍ଦେଙ୍କ ଶିବିରରେ ସାମିଲ ହୋଇପାରନ୍ତି ବୋଲି ମହାରାଷ୍ଟ୍ର ସରକାରର ମନ୍ତ୍ରୀ ଗୁଲାବରାଓ ପାଟିଲ ଦାବି କରିଛନ୍ତି। ତାଙ୍କର ଏହି ବୟାନ ପରେ ରାଜ୍ୟର ରାଜନୈତିକ ମହଲରେ ହଇଚଇ ସୃଷ୍ଟି ହୋଇଛି।
ଗୁଲାବରାଓ ପାଟିଲ କହିଛନ୍ତି ଯେ, ‘ଅପରେସନ ଟାଇଗର ୩.୦’ ଆରମ୍ଭ ହୋଇସାରିଛି ଏବଂ ଖୁବ୍ଶୀଘ୍ର ଉଦ୍ଧବ ଶିବିରର ୧୪ ଜଣ ବିଧାୟକ ସିନ୍ଦେ ଗୋଷ୍ଠୀରେ ଯୋଗ ଦେବେ। କିଛିଦିନ ପୂର୍ବରୁ ଶିବସେନା (ୟୁବିଟି)ର ୬ ଜଣ ସାଂସଦ ସିନ୍ଦେ ଶିବିରକୁ ଯାଇଥିବା ପରେ ଏବେ ବିଧାୟକଙ୍କୁ ନେଇ ମଧ୍ୟ ଚର୍ଚ୍ଚା ବଢ଼ିଛି। ତେବେ ପାଟିଲଙ୍କ ଏହି ଦାବି ତାଙ୍କ ଦଳର ଅନ୍ୟ ମନ୍ତ୍ରୀ ଉଦୟ ସାମନ୍ତଙ୍କ ବୟାନ ସହ ସାମଞ୍ଜସ୍ୟ ରଖୁନାହିଁ। ସାମନ୍ତ ପୂର୍ବରୁ କହିଥିଲେ ଯେ, ‘ଅପରେସନ ୩.୦’ ଭଳି କୌଣସି ଅଭିଯାନ ଚାଲିନାହିଁ।
ବର୍ତ୍ତମାନ ଶିବସେନା (ୟୁବିଟି)ର ୨୦ ଜଣ ବିଧାୟକ ଥିବାବେଳେ, ସେଥିରୁ ୧୪ ଜଣ ଯଦି ଦଳ ଛାଡ଼ନ୍ତି, ତେବେ ଏହା ଉଦ୍ଧବ ଠାକ୍ରେଙ୍କ ପାଇଁ ବଡ଼ ରାଜନୈତିକ ଝଟକା ସାବ୍ୟସ୍ତ ହେବ। ଏହା ସହ କଂଗ୍ରେସ ବିଧାୟକ ବିଜୟ ୱାଦିତ୍ୱାର ମଧ୍ୟ ସିନ୍ଦେ ଗୋଷ୍ଠୀରେ ଯୋଗ ଦେଇପାରନ୍ତି ବୋଲି ଚର୍ଚ୍ଚା ଜୋର ଧରିଛି। ତେବେ ଏପର୍ଯ୍ୟନ୍ତ ଏହି ଦାବିଗୁଡ଼ିକର ସ୍ୱତନ୍ତ୍ର ଭାବେ କୌଣସି ସରକାରୀ ପୁଷ୍ଟି ହୋଇନାହିଁ।
