ଜାତିସଂଘ ସୁରକ୍ଷା ପରିଷଦରେ ଅସ୍ଥାୟୀ ସଦସ୍ୟତା ପାଇଁ ଭାରତର କୂଟନୀତିକ ଅଭିଯାନ ଆରମ୍ଭ
ନୂଆଦିଲ୍ଲୀ:୨୦୨୮-୨୯ କାର୍ଯ୍ୟକାଳ ପାଇଁ ଜାତିସଂଘ ସୁରକ୍ଷା ପରିଷଦ (UNSC)ର ଅସ୍ଥାୟୀ ସଦସ୍ୟ ହେବା ଲକ୍ଷ୍ୟରେ ଭାରତ ନିଜର ନିର୍ବାଚନୀ ଅଭିଯାନ ଆରମ୍ଭ କରିଛି। ନ୍ୟୁୟର୍କସ୍ଥିତ ଜାତିସଂଘ ମୁଖ୍ୟାଳୟରେ ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର ଏହି ଅଭିଯାନର ଶୁଭାରମ୍ଭ କରି କହିଛନ୍ତି ଯେ, ଭାରତ ଶାନ୍ତି ପ୍ରତିଷ୍ଠା, ବିକାଶରେ ସହଭାଗିତା ଏବଂ ନିୟମ-ଆଧାରିତ ବିଶ୍ୱ ବ୍ୟବସ୍ଥା ପ୍ରତି ସର୍ବଦା ପ୍ରତିବଦ୍ଧ ରହିଆସିଛି। ସେ ‘SHANTI’ (Securing Holistic Advancement through Norms, Trust and Integrity) ଭିଜନ୍ ମାଧ୍ୟମରେ ଭାରତର ବିଶ୍ୱ ଦୃଷ୍ଟିକୋଣକୁ ଉପସ୍ଥାପନ କରିଥିଲେ।
ଅଭିଯାନ ଆରମ୍ଭ ପରେ ଜୟଶଙ୍କର ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସଙ୍କୁ ଭେଟି ପଶ୍ଚିମ ଏସିଆ, ୟୁକ୍ରେନ ଓ ସୁଦାନର ପରିସ୍ଥିତି ସମେତ ବିଭିନ୍ନ ବିଶ୍ୱସ୍ତରୀୟ ପ୍ରସଙ୍ଗ ଉପରେ ଆଲୋଚନା କରିଥିଲେ। ଏହା ସହ ଭାରତ-ଜାତିସଂଘ ସହଯୋଗକୁ ଆହୁରି ସୁଦୃଢ଼ କରିବା ଉପରେ ମଧ୍ୟ ଉଭୟଙ୍କ ମଧ୍ୟରେ ବିଚାରବିମର୍ଶ ହୋଇଥିଲା। କାର୍ଯ୍ୟକ୍ରମରେ ବିଭିନ୍ନ ଦେଶର ସ୍ଥାୟୀ ପ୍ରତିନିଧି, କୂଟନୀତିଜ୍ଞ ଓ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ଆସନ୍ତା ବର୍ଷ ଜୁନ୍ରେ ୨୦୨୮-୨୯ କାର୍ଯ୍ୟକାଳ ପାଇଁ ୟୁଏନଏସସି ଅସ୍ଥାୟୀ ସଦସ୍ୟ ପଦର ନିର୍ବାଚନ ହେବ। ଏସିଆ-ପ୍ରଶାନ୍ତ ଗୋଷ୍ଠୀର ଏକମାତ୍ର ଆସନ ପାଇଁ ଭାରତ ଓ ତାଜିକିସ୍ତାନ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେବ। ଭାରତ ପୂର୍ବରୁ ଆଠ ଥର ସୁରକ୍ଷା ପରିଷଦର ଅସ୍ଥାୟୀ ସଦସ୍ୟ ରହିସାରିଛି ଏବଂ ଏଥର ମଧ୍ୟ ବିଶ୍ୱ ଶାନ୍ତି, ବହୁପକ୍ଷୀୟ ସହଯୋଗ ଓ ସୁରକ୍ଷା ପ୍ରସଙ୍ଗରେ ନିଜର ସକ୍ରିୟ ଭୂମିକାକୁ ଆହୁରି ସୁଦୃଢ଼ କରିବାକୁ ଲକ୍ଷ୍ୟ ରଖିଛି।
