ବାଗେଶ୍ୱର ବାବାଙ୍କ ସାନ ଭାଇଙ୍କ ବିରୋଧରେ ଗୁଳିକାଣ୍ଡ ଅଭିଯୋଗ; ଜମି ବିବାଦକୁ ନେଇ ଚାଷୀ ଆହତ
ମଧ୍ୟପ୍ରଦେଶ: ମଧ୍ୟପ୍ରଦେଶର ଛତରପୁର ଜିଲ୍ଲାର ରାଜନଗର ଥାନା ଅନ୍ତର୍ଗତ କୋଡ଼ା ଗାଁରେ ଜମି ବିବାଦକୁ କେନ୍ଦ୍ର କରି ଗୁଳିକାଣ୍ଡ ଘଟିଥିବା ଅଭିଯୋଗ ଆସିଛି। ଆହତ ଚାଷୀ ମୋତିଲାଲ କୁଶୱାହା ଅଭିଯୋଗ କରିଛନ୍ତି ଯେ, ବାଗେଶ୍ୱର ଧାମର ପୀଠାଧିଶ ପଣ୍ଡିତ ଧୀରେନ୍ଦ୍ର କୃଷ୍ଣ ଶାସ୍ତ୍ରୀଙ୍କ ସାନ ଭାଇ ଶାଲିଗ୍ରାମ ଗର୍ଗ ତାଙ୍କ ଉପରେ ଗୁଳି ଚଳାଇଥିଲେ। ଏହି ଘଟଣା ପରେ ଏବେ ସାରା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି ହୋଇଛି।
ଆହତ ଚାଷୀଙ୍କ କହିବା ଅନୁସାରେ, ଉକ୍ତ ଅଞ୍ଚଳର କିଛି ଚାଷୀଙ୍କ ଉପରେ ଜମି ବିକ୍ରି କରିବା ପାଇଁ ଚାପ ପକାଯାଉଥିଲା। ଜମି ବିକ୍ରିକୁ ବିରୋଧ କରୁଥିବା ଲୋକଙ୍କୁ ଧମକ ଓ ମାଡ଼ ମରାଯାଉଥିବା ମଧ୍ୟ ସେ ଅଭିଯୋଗ କରିଛନ୍ତି। ଏହି ଜମି ବିବାଦକୁ ନେଇ ତାଙ୍କ ଉପରେ ଗୁଳି ଚଳାଯାଇଥିବାରୁ ସେ ଆହତ ହୋଇଥିବା ଦାବି କରିଛନ୍ତି।
ଘଟଣା ପରେ ପରିବାର ସଦସ୍ୟ ଓ ଗ୍ରାମବାସୀଙ୍କ ସହାୟତାରେ ଆହତ ଚାଷୀଙ୍କୁ ଜିଲ୍ଲା ହସ୍ପିଟାଲରେ ଭର୍ତ୍ତି କରାଯାଇଛି। ପୁଲିସ ମାମଲାର ତଦନ୍ତ ଆରମ୍ଭ କରିଥିବାବେଳେ ଏଫ୍ଆଇଆର୍ ଓ ସରକାରୀ ବିବୃତ୍ତିକୁ ଅପେକ୍ଷା କରାଯାଉଛି। ଏପର୍ଯ୍ୟନ୍ତ ଶାଲିଗ୍ରାମ ଗର୍ଗ କିମ୍ବା ବାଗେଶ୍ୱର ଧାମ ପକ୍ଷରୁ ଏହି ଅଭିଯୋଗ ଉପରେ କୌଣସି ସରକାରୀ ପ୍ରତିକ୍ରିୟା ଆସିନାହିଁ। ଅଭିଯୋଗର ସତ୍ୟତା ପୁଲିସ ତଦନ୍ତ ପରେ ହିଁ ସ୍ପଷ୍ଟ ହେବ।
