କଂଗ୍ରେସକୁ କ୍ଷମା ମାଗିବେ କି ମମତା ? ୩୦ ବର୍ଷ ପୁରୁଣା ନିଷ୍ପତ୍ତିକୁ ନେଇ ବଙ୍ଗ କଂଗ୍ରେସର ସର୍ତ୍ତ
ପଶ୍ଚିମବଙ୍ଗ: କୋଲକାତାରେ ଆୟୋଜିତ ହେବାକୁ ଥିବା ‘ବଳିଦାନ ଦିବସ’ କାର୍ଯ୍ୟକ୍ରମକୁ ନେଇ ପଶ୍ଚିମବଙ୍ଗର ରାଜନୀତି ପୁଣି ଚର୍ଚ୍ଚାରେ ଆସିଛି। ପଶ୍ଚିମବଙ୍ଗ କଂଗ୍ରେସ କମିଟି (ପିସିସି) ପକ୍ଷରୁ ତୃଣମୂଳ କଂଗ୍ରେସ ସୁପ୍ରିମୋ ମମତା ବାନାର୍ଜୀଙ୍କୁ ଏହି କାର୍ଯ୍ୟକ୍ରମରେ ଯୋଗଦେବା ପାଇଁ ଆମନ୍ତ୍ରଣ କରାଯାଇଛି। ତେବେ ଏଥିପାଇଁ ଏକ ସର୍ତ୍ତ ମଧ୍ୟ ରଖାଯାଇଛି। ବଙ୍ଗ ପିସିସି ସଭାପତି ଶୁଭଙ୍କର ସରକାର କହିଛନ୍ତି, ମମତା ବାନାର୍ଜୀ ଯଦି ୧୯୯୭ ମସିହାରେ କଂଗ୍ରେସ ଛାଡ଼ିବାକୁ ଭୁଲ ବୋଲି ସର୍ବସମ୍ମୁଖରେ ସ୍ୱୀକାର କରନ୍ତି, ତେବେ ତାଙ୍କୁ ସ୍ୱାଗତ କରାଯିବ।
ଶୁଭଙ୍କର ସରକାର କହିଛନ୍ତି, ୧୯୯୩ ଜୁଲାଇ ୨୧ର ଯୁବ କଂଗ୍ରେସ ଆନ୍ଦୋଳନ ଓ ତାହାର ଇତିହାସକୁ ସମ୍ମାନ ଦେବା ଆବଶ୍ୟକ। ସେହି ଆନ୍ଦୋଳନରେ ପୁଲିସ ଗୁଳିରେ ୧୩ ଜଣଙ୍କ ମୃତ୍ୟୁ ଘଟିଥିଲା। ପରେ ମମତା ବାନାର୍ଜୀ କଂଗ୍ରେସ ଛାଡ଼ି ୧୯୯୭ରେ ତୃଣମୂଳ କଂଗ୍ରେସ ଗଠନ କରିଥିଲେ। କଂଗ୍ରେସର ମତ ଅନୁଯାୟୀ, ସେହି ନିଷ୍ପତ୍ତିକୁ ଯଦି ମମତା ଭୁଲ ବୋଲି ମାନିନେବେ, ତେବେ ତାହା ରାଜନୀତିରେ ଏକ ସକାରାତ୍ମକ ବାର୍ତ୍ତା ଦେବ ଏବଂ ଅତୀତର ଭୁଲ ସୁଧାରିବାର ପ୍ରୟାସ ଭାବେ ବିବେଚିତ ହେବ।
ଏପଟେ, ପଶ୍ଚିମବଙ୍ଗର ବଦଳୁଥିବା ରାଜନୈତିକ ସମୀକରଣକୁ ନେଇ ଏହି ବୟାନ ଗୁରୁତ୍ୱ ହାସଲ କରିଛି। ନିକଟ ଅତୀତରେ ତୃଣମୂଳ କଂଗ୍ରେସର ଅନେକ ନେତା ଦଳ ଛାଡ଼ିଥିବା ବେଳେ, ବିରୋଧୀ ଶିବିରରେ ନୂଆ ସମୀକରଣକୁ ନେଇ ଚର୍ଚ୍ଚା ଜୋର ଧରିଛି। ତେବେ ମମତା ବାନାର୍ଜୀ କଂଗ୍ରେସର ଏହି ସର୍ତ୍ତକୁ ଗ୍ରହଣ କରିବେ କି ନାହିଁ, ସେନେଇ ଏପର୍ଯ୍ୟନ୍ତ ତାଙ୍କ ପକ୍ଷରୁ କୌଣସି ପ୍ରତିକ୍ରିୟା ଆସିନାହିଁ।
