ଟଙ୍କା ଚୋରି ସନ୍ଦେହରେ ଛାତ୍ରୀଙ୍କୁ ପୋଷାକ ଖୋଲିବାକୁ ବାଧ୍ୟ କଲେ ଶିକ୍ଷୟିତ୍ରୀ, ନିଲମ୍ବିତ
ରାଜସ୍ଥାନର ସୱାଇ ମାଧୋପୁର ଜିଲ୍ଲାର ଏକ ସରକାରୀ ବିଦ୍ୟାଳୟରେ ଜଣେ ଶିକ୍ଷୟିତ୍ରୀ ଟଙ୍କା ଚୋରି ସନ୍ଦେହରେ ନବମ ଓ ଏକାଦଶ ଶ୍ରେଣୀର କିଛି ଛାତ୍ରୀଙ୍କୁ ପୋଷାକ ଖୋଲି ତଲାସି କରିଥିବା ଅଭିଯୋଗ ଆସିଛି। ଏହି ଘଟଣାକୁ ନେଇ ଅଭିଭାବକ ଓ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିବାବେଳେ ବିଦ୍ୟାଳୟ ସମ୍ମୁଖରେ ପ୍ରତିବାଦ ମଧ୍ୟ କରାଯାଇଥିଲା। ଅଭିଯୋଗର ପ୍ରାଥମିକ ତଦନ୍ତ ପରେ ସମ୍ପୃକ୍ତ ଶିକ୍ଷୟିତ୍ରୀଙ୍କୁ ନିଲମ୍ବନ କରାଯାଇଛି।
ସୂଚନା ଅନୁଯାୟୀ, ଶିକ୍ଷୟିତ୍ରୀଙ୍କ ପ୍ରାୟ ୧,୦୦୦ ଟଙ୍କା ନିଖୋଜ ହେବା ପରେ ସେ କିଛି ଛାତ୍ରୀଙ୍କୁ ସନ୍ଦେହ କରି ତଲାସି କରିଥିଲେ। ଛାତ୍ରୀମାନେ ଘରକୁ ଫେରି ଘଟଣା ବିଷୟରେ ପରିବାରକୁ ଜଣାଇବା ପରେ ମାମଲା ସାମ୍ନାକୁ ଆସିଥିଲା। ଅନ୍ୟପଟେ, ଅଭିଯୁକ୍ତ ଶିକ୍ଷୟିତ୍ରୀ ପୋଷାକ ଖୋଲାଇ ତଲାସି କରିବା ଅଭିଯୋଗକୁ ଅସ୍ୱୀକାର କରି କେବଳ ଛାତ୍ରୀମାନଙ୍କୁ ପଚରାଉଚରା କରିଥିବା ଦାବି କରିଛନ୍ତି।
ଘଟଣାର ତଦନ୍ତ ପାଇଁ ଶିକ୍ଷା ବିଭାଗ ପକ୍ଷରୁ ବିଭାଗୀୟ ତଦନ୍ତ ଆରମ୍ଭ କରାଯାଇଛି। ଘଟଣାକୁ ସମୟରେ ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ ନ କରିବା ଏବଂ ଗୁରୁତ୍ୱ ନ ଦେଇଥିବାରୁ ବିଦ୍ୟାଳୟର ପ୍ରଧାନଶିକ୍ଷକଙ୍କ ବିରୋଧରେ ମଧ୍ୟ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ସୁପାରିସ କରାଯାଇଛି। ଅଭିଭାବକମାନେ ନିରପେକ୍ଷ ତଦନ୍ତ ସହ ଦୋଷୀଙ୍କ ବିରୋଧରେ କଠୋର ପଦକ୍ଷେପ ଦାବି କରିଛନ୍ତି।
