ସଂସଦରେ ବିରୋଧୀଙ୍କ ହଙ୍ଗାମା; ମୌସୁମୀ ଅଧିବେଶନର ପ୍ରଥମ ଦିନରେ ଦିନ ୧୨ଟା ପର୍ଯ୍ୟନ୍ତ ମୁଲତବି
ନୂଆଦିଲ୍ଲୀ: ମୌସୁମୀ ଅଧିବେଶନର ପ୍ରଥମ ଦିନରୁ ହିଁ ସଂସଦରେ ରାଜନୈତିକ ଉତ୍ତେଜନା ଦେଖିବାକୁ ମିଳିଛି। ବିଭିନ୍ନ ପ୍ରସଙ୍ଗକୁ ନେଇ ବିରୋଧୀ ଦଳ ସରକାରଙ୍କୁ ଘେରିବା ସହ ଲୋକସଭାରେ ଜୋରଦାର ନାରାବାଜି କରିଥିଲେ। ଏହାଫଳରେ ଗୃହର କାର୍ଯ୍ୟକଳାପ ସ୍ୱାଭାବିକ ଭାବେ ଚାଲିପାରିନଥିଲା ଏବଂ ବାଚସ୍ପତି ଲୋକସଭାର କାର୍ଯ୍ୟକୁ ଦିନ ୧୨ଟା ପର୍ଯ୍ୟନ୍ତ ମୁଲତବି ଘୋଷଣା କରିଛନ୍ତି |
ଗୃହରେ ବିରୋଧୀ ସଦସ୍ୟମାନେ ୱେଲ୍କୁ ଆସି ପ୍ରତିବାଦ କରିବା ସହ ନାରାବାଜି ଜାରି ରଖିଥିଲେ। ବାଚସ୍ପତି ବାରମ୍ବାର ସଦସ୍ୟମାନଙ୍କୁ ନିଜ ନିଜ ଆସନକୁ ଫେରି ଗୃହର କାର୍ଯ୍ୟ ସୁରୁଖୁରୁରେ ଚଳାଇବାକୁ ଅନୁରୋଧ କରିଥିଲେ। ତେବେ ହଟ୍ଟଗୋଳ ଜାରି ରହିବାରୁ ଶେଷରେ ଗୃହର କାର୍ଯ୍ୟକୁ ମୁଲତବି କରିବାକୁ ପଡ଼ିଥିଲା।
ଏପଟେ ଚଳିତ ମୌସୁମୀ ଅଧିବେଶନରେ କେନ୍ଦ୍ର ସରକାର ଏକାଧିକ ଗୁରୁତ୍ୱପୂର୍ଣ୍ଣ ବିଲ୍ ଉପସ୍ଥାପନ କରିବାକୁ ପ୍ରସ୍ତୁତ ଥିବାବେଳେ, ବିରୋଧୀ ଦଳ ବିଭିନ୍ନ ଜନସ୍ୱାର୍ଥ ପ୍ରସଙ୍ଗ ଉଠାଇ ସରକାରଙ୍କୁ ଘେରିବା ପାଇଁ ରଣନୀତି ପ୍ରସ୍ତୁତ କରିଛି। ଏହାକୁ ନେଇ ଆଗାମୀ ଦିନଗୁଡ଼ିକରେ ସଂସଦରେ ତୁମୁଳ ବିତର୍କ ଓ ରାଜନୈତିକ ଟକ୍କର ଦେଖିବାକୁ ମିଳିପାରେ।
