ଗୁଏନାରେ ଭୟାବହ ଦୁର୍ଘଟଣା; ସମୁଦ୍ରରେ ବୁଡ଼ିଗଲା ୧୧୬ ଜଣ ଯାତ୍ରୀଙ୍କୁ ନେଇ ଯାଉଥିବା ଫେରି! ଜାରି ରହିଛି ଉଦ୍ଧାର କାର୍ଯ୍ୟ
ଜର୍ଜଟାଉନ: ଦକ୍ଷିଣ ଆମେରିକାର ଗୁଏନାରେ ରବିବାର ଏକ ବଡ଼ ସମୁଦ୍ର ଦୁର୍ଘଟଣା ଘଟିଛି। ୧୧୬ ଜଣ ଯାତ୍ରୀ ଓ ଚାଳକ ଦଳ ସଦସ୍ୟଙ୍କୁ ନେଇ ଯାଉଥିବା ଏମ୍ଭି ବରିମା (MV Barima) ଫେରି ସମୁଦ୍ରରେ ସନ୍ତୁଳନ ହରାଇ ଓଲଟି ପଡ଼ିବା ପରେ ବୁଡ଼ି ଯାଇଛି। ଦୁର୍ଘଟଣା ପରେ ତୁରନ୍ତ ବ୍ୟାପକ ଉଦ୍ଧାର ଅଭିଯାନ ଆରମ୍ଭ କରାଯାଇଥିବା ବେଳେ ଏପର୍ଯ୍ୟନ୍ତ ୫୩ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି।
ସ୍ଥାନୀୟ ପ୍ରଶାସନର ସୂଚନା ଅନୁସାରେ, ଫେରିଟି ରାଜଧାନୀ ଜର୍ଜଟାଉନରୁ ପୋର୍ଟ କେତୁମା ଅଭିମୁଖେ ଯାଉଥିବା ବେଳେ ଆଇରନ ପଣ୍ଟ ନିକଟ ସମୁଦ୍ରରେ ବିଳମ୍ବିତ ରାତିରେ ଦୁର୍ଘଟଣାର ଶିକାର ହୋଇଥିଲା। ଜାହାଜରୁ ତୁରନ୍ତ ଡିଷ୍ଟ୍ରେସ୍ ସିଗ୍ନାଲ୍ ପଠାଯିବା ପରେ ପ୍ରଶାସନ, ନୌସେନା ଏବଂ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ଅଭିଯାନ ଆରମ୍ଭ କରିଥିଲେ।
ଫେରିରେ ମୋଟ ୧୧୬ ଜଣ ଯାତ୍ରୀ ଥିବା ସୂଚନା ମିଳିଥିବା ବେଳେ ଅବଶିଷ୍ଟ ଯାତ୍ରୀ ଓ ଚାଳକ ଦଳ ସଦସ୍ୟଙ୍କ ସନ୍ଧାନରେ ଉଦ୍ଧାରକାରୀ ଟିମ୍ ନିରନ୍ତର ଅଭିଯାନ ଚଳାଇଛି। ଦୁର୍ଘଟଣାର ପ୍ରକୃତ କାରଣ ଜଣାପଡ଼ି ନଥିବା ବେଳେ ପ୍ରଶାସନ ଘଟଣାର ତଦନ୍ତ ଆରମ୍ଭ କରିଛି।
